احنا مين

خدت بالك إن معظم القصص والمواقع اللي بتتكلم عن السفر على الإنترنت بتبقى عن الأجانب مش عننا احنا؟ مع إن الشرق الأوسط من أكتر المناطق في العالم اللي الناس بتسافر منها وليها، ولا علشان احنا مش ملونين وعينينا زُرق يعني؟ ده السبب اللي Safareya اتعملت علشانه، عشان تبقى صوت كل اللي بيسافروا من سكان الشرق الأوسط وشمال أفريقيا.

سفرية - Safareya بقت أول موقع أونلاين بيتكلم عن السفر والمشاكل اللي ممكن تقابلك كمسافر عربي من أول التأشيرة بتاعتك، فمش هتضطر تدخل على ١٠٠ جروب وتاخد أجازة من الشغل عشان تسأل في السفارة وتروح تلاقيها قفلت، ولحد هتعمل إيه هناك، وتتصرف ازاي مع الثقافات واللغات المختلفة، هتلاقي فين مطاعم الأكل المناسبة، وإيه المزارات اللي ماتستاهلش تضيع وقتك عليها، وأهم حاجة هتعمل إيه مع الشطافة.

وهنقولك كل افتكاسات السفر اللي تخلي حياتك أسهل، من أول ازاي توضب شنطتك من غير ما صاحبك يتنطط عليها علشان تقفل، إزاي تحسن تصويرك، إيه أفضل شنطة هتحتاجها في سفرك، ولحد الزخانيق في كل البلد اللي أهلها بس هم اللي عارفينها. ومواضيع فيها كل الحاجات اللي محتاج تعرفها عن مكان معين، عشان ما تحتاجش تعذب نفسك مع ٦٠٠٠ ويب سايت وفي الآخر ما تلاقيش اللي انت محتاجه.