share this article

خلال الفترة اللي فاتت شفنا تغييرات كتير أوي بتحصل في السعودية، مهرجانات سياحية وترفيهية وحفلات فيها نجوم عالميين ومشاهير من كل حتة في العالم، وفجأة ابتدينا نشوف ناحية تانية من السعودية قرروا يكملوها بإنهم يسهلوا اجراءات الفيزا لـ50 بلد في العالم ما بين فيزا أونلاين وفيزا عند الوصول، غير كمان إن الفيزا السياحية نفسها بقت سهلة للي عايز يروح يتفسح؛ وبعدها بشوية قرروا يسمحوا للستات إنهم يحجزوا في الفنادق من غير محرم، يعني تسهيلات كتير فتحت مجال واسع لسياحة في السعودية بس فضل السؤال: هو فيه أصلاً حاجات كتير تتعمل هناك؟ عشان كده جمعنالك 16 مكان سياحي تقدر تروحهم في السعودية وتشوفها بشكل مختلف.

1- حافة نهاية العالم المصدر: inspirock

هما بالغوا شوية في التسمية لأن طبعاً دي مش حافة نهاية العالم ولا حاجة؛ بس المكان اتعرف بالاسم ده بسبب ارتفاعه 300 متر عن سطح الأرض، يخليك تقف فوق تشوف منظر بانورامي طبيعي كإنك واقف على قمة العالم؛ واسمه الحقيقي "جبل فهرين" وبيعتبر جزء من طريق أكبر بكتير كان هو اللي بيوصل بين اليمن وبلاد فارس زمان وبتعدي عليه القوافل التجارية والمسافرين.

الطريق الأكبر هو سلسلة جبال طويق الممتدة بطول 1000 كيلو متر من نجران في الجنوب للقصيم في الشمال، ورغم إن طبعاً مبقاش فيه قوافل ولا تجار بيعدوا في الطريق ده دلوقتي، لكن تقدر تشوف المسارات بتاعتهم والطرق اللي كانوا بيمشوا فيها، وتقدر تقضي ليلة تخيّم في المكان تتفرج على النجوم بالليل؛ أو تصحى على شروق الشمس وتشوف المنظر من فوق.

عشان توصل للمكان ممكن تمشي على الخريطة على جوجل مابس بس لازم تعرف إنك هتحتاج عربية 4x4 تدخلك جوة لأنه من بعد البوابة مش هيبقى فيه طريق أو أسفلت للعربيات العادية، الطريق في الصحرا بس.

2- خشم زبيدة وإصبع فيصلالمصدر: Faisal Bin Zarah

خشم زبيدة هو كمان واحد من الطرق بتاعة القوافل والتجار زمان، وبرضه جزء من سلسلة جبال طويق، على بُعد 50 كيلو من حافة العالم، وتقدر من عنده تشوف منظر تاني للصحراء والرمال الناعمة اللي هناك، وتقدر تشوف "إصبع فيصل" أو جبل الإصبع، أو فيه ناس كمان بتسميه "الخنصر"، المهم إن كلها أسامي ليها دعوة بأصابع الإيد!

الجبل ده عبارة عن تشكيلات صخرية وجيولوجية اترسبت واتشكلت بالمنظر ده على مدار ملايين السنين لحد ما أخدت الشكل النهائي اللي شبه الإصبع كده، وعشان توصل هناك ممكن تكتب في جوجل مابس (near the Edge of the World) وهتلاقي المكان طلعلك على طول.

3- كثبان النجومالمصدر: Pinterest

رغم إننا لسه في الصحرا بس شكل الكثبان الرملية في المنطقة دي يخليك تحس إنك رحت كوكب تاني، على مساحة 1300 كيلو هتلاقي صحراء الدهناء، وهي صحراء بتربط بين أكبر صحاري شبه الجزيرة العربية؛ صحراء الربع الخالي وصحراء النفود الكبير.

الناس هناك بتسمي صحراء الدهناء دي بـ"العروق" لأن فيه أجزاء فيها خطوط شبه عروق الدم اللي في جسم الإنسان، وده لأن لونها بين الأحمر والبني بسبب إن الرملة فيها أكسيد الحديد (مركّب كيميائي بيبقى لونه أحمر)، ولأن شكل الخطوط دي مع اللون الأحمر مع التلال المرتفعة شوية عن الأرض والأجزاء المنخفضة بيخلوا المنظر أوقات يبان كإنه شبه مسارات النجوم في السما، ومن هنا كان اسمها كثبان النجوم.

طبعاً لأن الموضوع عبارة عن صحرا في صحرا وشوية رملة كتير جنب بعض؛ بالتالي صعب إن حد ياخد بعضه ويروح يستكشف، بس في جميع الأحوال هتلاقي المكان موجود على جوجل مابس ويُفضّل إنك تروح مع شركة سياحة أو على الأقل مرشد يكون حافظ الطريق لأن برضه مفيش أسفلت أو طريق ممهد.

4- جبال الركّابالمصدر: Hudson Mckenzie

فاكرين المتاهة اللي كانت في التحدي الأخير في فيلم Harry Potter And The Goblet of Fire؟ والمشهد الدرامي اللي لورد فولدمورت بيموّت فيه سيدريك؟ في جبال الركّاب هتقدر تعيش وسط متاهة شبه الفيلم بس من غير دراما ولا لورد فولدمورت!

شكل الجبال والوديان الضيقة أو الـcanyons اللي هناك ساحر، وهتلاقي كمان نقوش على الصخور عمرها أكتر من 2000 سنة، بس الفكرة بقى إنك متقدرش تروح هناك لوحدك، لازم يكون مع حد من السكان المحليين، غير إنك لازم تختار وقت في السنة يكون الجو فيه كويس لأن فيه أوقات بيكون فيها مطر وسيول بتغرق الوديان تماماً.

5- جبال اللوزالمصدر: Arab News

مفيش لفة طويلة نشرح بيها سبب الاسم لأنه بكل بساطة اتسمى كده بسبب أشجار اللوز اللي كانت بتتزرع على الجبال هناك، بس مش دي النقطة اللي الناس بتحب تروح جبال اللوز عشانها، السبب الرئيسي هو إن ده المكان الوحيد وسط صحراء السعودية اللي لما تروحله في الشتا هتلاقي تلج، تلج حقيقي من اللي بنشوفه في لبنان بيغطي المنطقة والجبال كلها.

الجبال دي هي أعلى نقطة في منطقة تبوك في شمال غرب السعودية، وارتفاعها بيوصل لأكتر من 2500 متر؛ عشان كده في الشتا بيبقى فيها تلج بسبب درجة الحرارة القليلة جداً وكمان لقربها من البحر الأحمر، يعني لو سفريتك في الشتا وحابب تغير شوية موود الصحرا؛ افتح جوجل مابس وانطلق إلى جبال اللوز.

6- طيب الاسم المصدر: Bookisha

على الساحل الشرقي لخليج العقبة وعلى بُعد 15 كيلو من مركز مقنا في منطقة تبوك؛ هتلاقي جبل "طيب الاسم"، هيقابلك في الأول صخور جرانيت ارتفاعها حوالي 600 متر ونخل كتير يعتبروا هما البوابة اللي بتاخدك بعد كده للوديان الضيقة اللي جوة (canyons).

تقدر هناك تعمل hike في طريق طوله 5 كيلو حواليك نخل كتير ومياه وواحات صغيرة طول الطريق، ويُقال كمان إن المنطقة دي كانت هي أرض مدين اللي قعد فيها سيدنا موسى قبل ما يحرر شعبه من مصر، وهي برضه الأرض اللي رجعلها بعد كده.

الميزة في المكان ده إنك سهل تروحله على جوجل مابس وتتمشى وتستكشف من غير ما تحتاج مرشد أو شركة سياحة معاك.

 7- النفود الكبيرالمصدر: hiveminer

إحنا جبنا سيرة النفود الكبير دي من شوية في مكان تاني صح؟ لما كنا بنتكلم عن كثبان النجوم وقلنا إن النفود الكبير واحدة من أكبر صحاري شبه الجزيرة العربية، مساحتها أكتر من 100 ألف كيلو متر مربع وعلى 3 مناطق في حائل والجوف وتبوك، ومن كتر مساحتها الكبيرة كان طبيعي جداً إن يلاقوا فيها آثار بتدل على حياة وبشر كانوا عايشين في الصحرا دي زمان، ومعهد ماكس بلانك أعلن إنه لقى فيها حفريات (عضم من جسم إنسان) عمرها أكتر من 85 ألف سنة، تعتبر أقدم حفريات يلاقوها لإنسان برة نطاق الحفريات اللي بيلاقوها في أفريقيا وبلاد الشام.

وطبعاً إذا كان لقوا حفريات يبقى أكيد المكان مليان ترسبات صخرية وأحجار اتشكلت على مدار آلاف السنين وكوّنت أشكال فنية كتير في وسط الصحرا، اللي بالمناسبة برضه من الأماكن اللي تقدر تستكشفها مع نفسك وهتلاقي المكان موجود على جوجل مابس، المهم عربية 4x4 عشان تعرف تمشي وسط الصحرا.

8- صحراء محجةالمصدر: Twitter/Al Zaaqi

لسه في صحراء النفود بس في الجنوب الغربي كده من وسط الرمال الكتير؛ هتلاقي أقواس صخرية اتكونت على مدار السنين وبقت كإنها منحوتات ضخمة جداً، منهم واحد على شكل الألماسة وطوله أكتر من 40 متر، وواحد تاني ارتفاعه 160 متر وعلى نقوشات كتير جداً.

تقدر لما تروح هناك تتسلق الأقواس الصخرية دي أو تعدّي من جواها بالعربية، في الحالتين هيكون المنظر والمكان جميل جداً.

9- وادي قراقرالمصدر: iqraa

بيبقى فيه سحر وإحساس تاني كده لما تشوف مياه وخضرة وحياة وسط الصحرا، وده بالظبط اللي موجود في وادي قراقر، قريب من قرية الديسة في منطقة تبوك مكان محاوطاه منحدرات وأقواس صخرية بيوصل طولها في حتت من الوادي لـ500 متر، والطريق نفسه عبارة عن 15 كيلو تقدر تتمشى فيهم أو تعمل hike وطول الطريق هتلاقي مياه جارية وكمية زرع ونخل وحشائش في الأرض؛ بس حتى الحشائش مش القصيرة اللي بتبقى في ملاعب الكورة؛ لأ دي فيه منها طوله 3 متر! غير إن برضه وادي قراقر من الأماكن اللي سهل توصلها لما تحط اسم المكان على جوجل مابس.

10- فوهة بركان الوعبةالمصدر: CNN Arabia

هو الموضوع يخض في الأول؛ بس هو مش بركان نشط يعني؛ هي فوهة بركان خامدة موجودة شمال طريق الرياض مكة بحوالي 100 كيلو، قريبة من قرية مشهورة هناك اسمها أم الدوم.

المكان ده مفيش رواية ثابتة اتقالت عنه؛ لكن الباحثين الجيولوجيين قالوا إن سبب تكوين الحفرة بالمنظر ده هو اختلاط الحمم البركانية بالمياه الجوفية من آلاف السنين؛ فحصل الإنفجار اللي نتج عنه الحفرة اللي شايفينها في الصورة دي واللي قطرها بيوصل لـ2 كيلو متر، ومع الوقت بقى حواليها نخل وزرع كتير بيثبت إن فعلاً الأرض تحتها مياه جوفية.

الحلو هناك إن المكان من سنة 2017 اتعمله خطة تطوير كبيرة جداً، وبقى فيه مراكز لخدمات السياح وتقدر تعمل تخييم أو تستمتع بالمنظر البانورامي من فوق، غير كمان رحلات السفاري اللي بتتعمل في المكان وللمزارع والمناطق القريبة اللي الزوار بيعتبروها فسحة حلوة.

عشان توصل لفوهة بركان الوعبة؛ اكتب اسم المكان على جوجل مابس وهتوصل بسهولة.

11- جبال السرواتالمصدر: Wikipedia

جبال السروات هي أطول سلسلة جبلية في المملكة؛ موجودة على الناحية الغربية من البلد بطولها كلها من الشمال لحد اليمن في الجنوب في صنعاء، وبسبب قربها من البحر الأحمر فالجو هناك مش صحراوي خالص؛ درجة الحرارة مش بتزيد عن 35 درجة، وبيبقى فيها موسمين مطر أساسيين في مارس وأبريل؛ وموسم تاني في شهور الصيف.

بسبب المطر ده؛ الجبال بيبقى لونها أخضر طبعاً عشان الزرع والخضرة اللي بتطلع في المكان، غير إن المنحدرات والطرق المنخفضة بطول الجبال بتخليك تقدر تتحرك بالعربية وسطهم وتقدر تقف في حتت معينة تتفرج وتتمتع بالمناظر الطبيعية وتكمل تروح لنقطة تانية، وسهل تروحها تستكشف بنفسك لو مشيت على الموقع على جوجل مابس.

12- الجبل الأخضرالمصدر: aseertourism

واحدة من أهم وأجمل المدن اللي فيها مناظر طبيعية في المملكة هي أبها؛ ومش بعيد عنها أوي في الجزء الجنوبي هتلاقي الجبل الأخضر، والحقيقة الجبل أخضر حرفياً سواء لو شفته بالنهار بسبب الزرع اللي عليه، أو حتى بالليل لأنهم عاملين اضاءة خضرا حوالين الجبل كله.

المكان مجهز تماماً هناك للخروجات والفسح بعد ما تدفع تذكرة دخول على البوابة تحت، وتبدأ بعد كده تطلع الجبل بالعربية وتتفرج على المنظر حواليك وإنت طالع، أو بعد ما توصل فوق وتشوف المنظر البانورامي اللي بتشوف منه أبها كمان، غير إن الوصول لهناك سهل جداً لأنه بيعتبر خروجة مش مشوار في الصحرا أو لمكان بعيد، وهتلاقيه على جوجل مابس.

13- الجبل الأسود المصدر: Wikipedia

الجبل الأسود هو واحد من سلسلة جبال السروات وأعلى نقطة فيها؛ ارتفاعه بيوصل لـ2900 متر عن سطح الأرض، وكمان مش بعيد عن مدينة أبها؛ حوالي 10 كيلو بس ناحية الغرب، اتسمى كده لأنه من كتر الزرع والشجر اللي مغطي الجبل كله وبسبب الضباب اللي بيبقى فيه من كتر ارتفاعه؛ بيبان من بعيد إن لونه أسود.

يعتبر من الجبال اللي الفسحة فيها حلوة أوي، لإنه فيه ناس عايشين على الجبل وبيوت ومزارعين وناس بتربي حيوانات، يعني طول الطريق هتتكعبل في ناس سواء سكان الجبل والقبائل اللي هناك أو الناس اللي واخدين عربياتهم وطالعين يتفرجوا على المكان، وفيه شركات سياحة كتير أو مرشدين بيعملوا رحلات هناك لو كنت مش عايز تروح سايق، رغم إن برضه الطريق سهل على جوجل مابس لأنه بيوديك لمنتزه اسمه منتزه السودة.

14- الجبل الأبيض  المصدر: Abdullah Alturaigy

لسه مكملين في الجبال الملونة؛ خلصنا الأخضر والأسود نيجي للأبيض بقى .. بس هنا فوهة بركان تاني، في جبال اسمها "حرة خيبر" في محافظة خيبر في منطقة المدينة المنورة، وبتعتبر المفضلة للسياح أو السعوديين نفسهم رغم إنها مش أكبر من فوهة الوعبة اللي لسه متكلمين عليها فوق، بس بسبب إن فيها خطوط اتكونت من الصخور من مادة معينة على مدار آلاف السنين بتخلي لونها يبان أبيض شوية وسط الرملة.

عشان كده هتلاقي ناس كتير بتروح هناك سواء بعربياتها أو تاخد الخيم بتاعتها وتبات، أو يعملوا hike في المكان، هو سهل إنك تروحله لو مشيت على جوجل مابس، بس إحنا شخصياً ننصحك تروح مع شركة سياحة بتعمل رحلات أو مع مرشد سياحي عشان تستفيد من حجم المعلومات والتاريخ اللي هيتحكيلك عن المكان ده؛ بالذات لو كنت بتحب الجيولوجيا وعلم طبقات الأرض.

15- جبال فيفاء المصدر: Explore Saudi Arabia

تحسوا فجأة من الصورة إن المكان ده في سريلانكا أو جبال لبنان، بس هو موجود في السعودية عادي، سلسلة جبال فيفاء في منطقة جازان في الجنوب الغربي للمملكة، وزي مانتو شايفين الجبل متغطي بالزرع والشجر وبيوت الناس اللي عايشين هناك، عشان كده دي بتعتبر تجربة أصيلة أوي لو عايز تشوف حياة الناس في المكان، غير إن كل الخروجات اللي ممكن تستكشف بيها المكان هي عبارة عن قمم في كذا حتة فوق الجبل، كل واحدة فيهم هتخليك تشوف منظر بانورامي مختلف.

بس الفكرة إن كتر ارتفاع أجزاء معينة في الجبل وانحدارها بيخلي الطريق صعب جداً لأي حد مش من أهل المنطقة أو مش متعود على الطريق والطلوع والنزول في حارات ضيقة وخطر، عشان كده الأسهل إنك توصل لأول المكان بجوجل مابس عادي وبعدين تكمل بوسائل المواصلات التقليدية اللي أهل البلد بيعتمدوا عليها لأنهم متعودين على الطرق كل يوم، غير إنهم اخترعوا وسيلة مواصلات ونقل بيتحركوا بيها تقدر تقول إنها شبه التلفريك بس بدائية جداً.

16- صحراء الربع الخالي المصدر: canvascluboman

صحراء الربع الخالي هي أكبر صحراء رملية في العالم، موجودة في 4 بلاد هما السعودية واليمن وعُمان والإمارات، بس الجزء الأكبر منها موجود في السعودية على مساحة 600 ألف كيلو متر مربع تقريباً، وكثبان رملية بيوصل ارتفاعها لـ250 متر، ورغم إن اسمها "الربع الخالي" وحرفياً هي اتسمت كده لأنها كانت فاضية ومفيهاش أي أنشطة أو حياة بشرية، بس لأنهم اكتشفوا فيها ثروات كتير جداً زي البترول والغاز الطبيعي والمعادن؛ هتقدر تلاقي دلوقتي مراكز ومحطات شركة النفط الوطنية موجودة هناك.

وفي 2015 قرر فريق من الرحّالة إنهم يعدّوا في الربع الخالي من صلالة في عُمان لحد الدوحة في قطر في 45 يوم، ومشيوا على نفس الطريق اللي كان مشي عليه رحّالة قبل كده لأول مرة من 85 سنة .. لو عينيك لمعت وحابب تعمل زيهم هتلاقي المكان على جوجل مابس عادي، بس لو مش عايز تروح تشق طريقك في الصحرا وسط الرمال اللانهائية؛ هتلاقي شركات ومرشدين سياحيين كتير هناك تطلع معاهم رحلة تخييم أو سفاري.

ترجمة: ندى عبد ربه