share this article

المغامر المصري علي عبده هيحاول يحقق رقم قياسي تالت في موسوعة جينيس للأرقام القياسية بأطول مسافة على موتوسيكل كهربائي؛ واللي هينطلق بيه لمسافة 25 ألف كيلو متر؛ يعدّي فيهم على كل محافظات مصر بهدف إنه يوعّي الناس بمشاكل البيئة وتغير المناخ؛ وعشان الهدف ده اختار الموتوسيكل الكهربائي لأول مرة في رحلاته اللي هيخليه مش محتاج يستهلك أي وقود أو يسبب تلوث للبيئة من العوادم. 

علي عبده كان ابتدى سلسلة مغامراته في 2013 برحلة حوالين مصر برضه كان الهدف منها إنه يعرّف المصريين على بلدهم، وفي 2016 عمل رقم قياسي برحلة حوالين مصر على موتوسيكل في 7 أيام بس، واللي كان هدفه فيها إنه يثبت للناس إنهم يقدروا يزوروا أي حتة في مصر في أي وقت حتى لو على موتوسيكل، وبعدها بسنة في 2017 كسر الرقم القياسي في موسوعة جينيس في أطول مسافة يقطعها رياضي بموتوكروس خلال 24 ساعة بس.

في المغامرة الجديدة هيكون معاه فريق دعم كبير أولهم وزارة الإنتاج الحربي ووزارة الشباب والرياضة، وبرنامج الأمم المتحدة الإنمائي اللي بيدعمه بشكل أساسي عشان اهتمامهم بقضايا البيئة والترويج للتنمية المستدامة في محافظات مصر.

المصدر: الشروق