share this article

جربت تنام تحت غطاء من النجوم، ومفيش أي مصدر ضوء حواليك غير القمر؟ هل فرشت العشب ليلا وتلحفت الفضا؟ زاهدا فيما سيأتي ناسيا ما قد مضى؟ لو الإجابة آه، فإنت عارف تجربة التخييم قد إيه بتبقى ممتعة، ومن أحلى المغامرات اللي ممكن تقضيها في حياتك. الجميل إن التخييم مش لازم تبقى تجربة تتعمل مرة في السنة، ومش ضروري تروح غابة في أمريكا عشان تعرف تخيم، في أماكن كتير جوه مصر ممكن تطلع فيها بخيمتك وتنسى كل حاجة، دول شوية منهم.

الصحراء الغربية
الصحراء الغربية فيها أكثر من مكان ممكن تخيم فيه، بين سيوة والواحات، زي الفرافرة، الداخلة، الخارجة، البحرية، نبدأ بسيوة.

سيوةمصدر الصورة:pinterest
سيوة تعتبر من أجمل الواحات في مصر، وتعتبر مكان بيجتمع فيه كل أنواع السياحة وممكن تقرأ كل حاجة عن سيوة من المقال ده، اللي هنتكلم عنه هنا هو التخييم، وطبعًا لو في تخييم ممكن يبقي من خلال كامبات في الصحراء، اللي بتوصل ليها عن طريق مكتب سفاري أو دليل من سيوة، بعدها تأجر عربيات الدفع الرباعي وتعمل أحلى سفاري في الصحراء.

الواحات الداخلة والخارجة
مصدر الصورة: GettyImages
الواحات تقريبا ٩ ساعات من القاهرة، وتعتبر عالم تاني من السكون والهدوء اللي مش هتشوف زيهم كتير في حياتك، خصوصًا لإنها مش واخده حقها أوي في الإعلام، فتقريبًا مش هيبقي في غيرك في الصحراء، وعلشان تقدر تخيم في الصحراء، هتحتاج عربية دفع رباعي.

واحة الفرافرةمصدر الصورة: bengalinomad
الفرافرة حوالي ٥ ساعات من القاهرة، فيها رحلات سفاري وتخييم لأحلى منطقتين في مصر، الصحراء البيضاء وكهف الجارة، وبرضه لازم عربية دفع رباعي علشان تقدر توصل لهم.

الواحات البحرية
واحة عظيمة جدًا في كل حاجة، ألوان السماء، أهل المكان، وكمية الصفاء والسلام النفسي اللي هتقابله هناك غير طبيعي، المنطقة المشهورة في الواحات البحرية للتخييم هي الصحراء السوداء. دي كانت زمان جدًا منطقة بركانية، وفعلًا تجربة لازم تعيشها مرة في حياتك.

مصدر الصورة: identity-mag

أبو جالوم مصدر الصورةpinterest
هي محمية طبيعية موجودة بين نويبع ودهب، ودي حرفيًا تقدر تخيم فيها قدام البحر كده، يعني تفتح الخيمة على منظر البحر والسما وجبال سيناء العظيمة.

راس شيطان مصدر الصورة: identity-mag
هي منطقة على ساحل نويبع وفيها كامبات كتيرة ممكن تأجر فيها خوشة -يعني خيمة من الخوص على البحر- وفي بعض الأماكن ممكن تسمح لك تخيم فيها بالخيمة بتاعتك.

القلعان، مرسى علممصدر الصورة: 7-ayam
دي فعلا من الكنوز المخفية في مصر، ومش كتير يعرفوا إنك ممكن تاخد الخيمة بتاعتك وتطلع تخيم هناك، في أحلى حتة من البحر الأحمر، اللي بنسميها مالديف مصر.

راس محمدمصدر الصورة: liquidadventuresdahab
مكان مشهور جدًا بالغطس، والمحمية كمان مفتوحة للتخييم، طبعًا إنك تكون في النقطة اللي بيحاوطك البحر فيها من كل اتجاه هيبقى أحلى حاجة عملتها.

وادي الحيتانمصدر الصورة: pinterest
بعد شوية المناطق اللي ممكن تخيم في على البحر، نرجع تاني للصحراء، ونروح وادي الحيتان في صحراء الفيوم، مكان رصد مهم جدًا لكواكب ونجوم كثيرة بتظهر عندنا.

وادي دجلة مصدر الصورة: visiteiffel
ودي قطعة جوه القاهرة، وناس كتير مش عارفة إنها مفتوحة للتخييم، يعني نص ساعة من بيتك وتقدر تقضي ليلة وسط الصحراء، وتبقي محظوظ لو قدرت تشوف الغزال المصري أو الثعالب هناك.

وادي الريان، الفيومالمصدر: الفيوم واحة الجمال
وادي الريان كمان من المحميات الطبيعية الجميلة اللي ممكن تخيم فيها، وهتشوف مناظر كتير طبيعية زي الشلالات اللي في الصورة.