share this article

على مدار آخر 10 سنين ابتدت تنتشر ثقافة الهايكينج في مصر على نطاق واسع، وبرغم إنها موجودة من سنين، لكن ابتدى يبقالها قاعدة عريضة من المحبين اللي بيحاولوا يكتشفوا كل يوم أماكن أكتر، أو يخلقوا هم دروب جديدة ليهم يمشوا فيها، عشان كده جمعنالكم هنا أشهر 8 دروب في مصر، تقدروا تستمتعوا فيها بالطبيعة.

درب جبل سانت كاترين

المصدر: Sharmboatsrental

من أشهر الدروب في مصر، المميز فيه إن الدرب بياخدك لجبال كتيرة ومسطحات مياة طبيعية وآثار تاريخية. مناسب للناس اللي بتحب المغامرة والتخييم. بتحتاج 5 أيام للمشي طبعًا دة من غير تسلق جبل سانت كاترين. الرحلة في الغالب بتبدأ من سانت كاترين وبتتمشوا 6 كيلو لجبل نجا ومن قمته اللي بتلبغ 1,830 متر. بتقدر تشوف المشهد كله من فوق، بيكون منظر رائع. بعديها ممكن تعمل هايكينج 25 كيلو وتوصل للمسطحات المائية الصافية وقلعة عباس باشا في جبل عباس وبتنتهي رحلة الهايكينج عند دير سانت كاترين، وتقدر من هناك تشتري هدايا تذكارية.

درب جبل موسى
المصدر: YouTube

درب جبل موسى مش في نفس شهرة درب سانت كاترين لأنه فيه نزلات وطلعات كتير، فيمكن يبقى مُرهق شوية، وساعات بيقوله عليه جبل موسى أو جبل سيناء، وطوله 2,285 متر. المميز في جبل موسى هو البعد الروحاني الديني للموضوع، بما إنك بتمشي على نفس خطى سيدنا موسى على الجبل. أحسن وقت في إنك تتطلع على الجبل يا إما ساعة الشروق أو الغروب، وهو مش بعيد أبدَا عن جبل سانت كاترين فممكن تروحهم هما الإتنين سوا.

الأودية الملونة في نويبعالمصدر:mostafa-elrefai

أقرب مدينة للوديان (Canyons) هي نوبيع، بتفضل تعمل هايكينج 800 متر لحد ما توصل وتتفرج على جمال الكانيونات بألوانها المدرجة. واللي اتلونت نتيجة المد والجذر اللي حصل من زمان في البحر الأحمر، فإصطبغت الصخور باللون ده، ودي صخور مكونة من الحصى والجير والجرانيت. بعد التمشية الطويلة ممكن تروح تتعشى في كامبات البدو وتتفرج على النجوم.

اللاجون ف دهب المصدر: alittlenomad

يعتبر درب ساحلي بياخدك لمياه صافية جميلة، وجبال سيناء. وطول الطريق بتكون شايف البدو اللي بيحاولوا يرحبوا بيك دايمًا. الدرب هيوصلك لمحمية رأس أبو جالوم اللي ممكن تتغدى فيها غدوة حلوة من إيد البدو، وبعدين آخر محطة هتقف فيها هي اللاجون.

محمية وادي دجلة في القاهرة المصدر: Olivia Heredia

لو عايز تفصل من دوشة القاهرة وفي نفس الوقت مش هيظبط معاك أوي إنك تسافر براها، ممكن تعمل هايكينج في محمية وادي دجلة في المعادي. طولها حوالي 30 كيلو والأرض مسطحة فمش مرهقة في المشي وممتعة أوي. الوادي فيه صخور من الجير ارتفاعها 50 متر، كمان هتشوف وديان اتكونت من مياة الأمطار، وحيوانات زي غزلان، و أرانب برية، وذئاب حمرة، وعدد كبير من الحشرات و الزواحف. ممكن وإنت هناك تعمل أنشطة غير الهايكينج و تجرب تركب عجل أو تجري أو تعمل مع صحابك حفلة باربيكيو أو تسلق جبال أو تخييم.
 
درب الفيوم aljazeera  المصدر:aljazeera

درب الفيوم بيمر بمناطق كتير لها طبيعتها الخاصة زي وادي الريان، ومناقير الريان وقصور العرب، ووادي البطيخ، وبيوصل لوادي الحيتان. وادي الحيتان هيكون مناسب ليك أكتر لو لسه مبتدأ في الهايكينج، هو طريق مسطح مفيهوش انعواجات كتير فـدة هيكون سلس شوية عليك. أحلى حاجة لما تتمشى في مكان بيشيل روحانيات دينية أو أثار ثقافية أو اكتشاف تاريخي لأن دة بيتنقل لقلبك طول ما إنت ماشي وبتحس إنك في طريق ما علشان هتقابل حاجة مهمة زي واحة مياه أو مسطح زراعي. بالنسبة لوادي الحيتان فهو مهم لأن اليونسكو اعتبرته الوادي اللي بيثبت تطور الحيتان من أسلاف برية لثديات بتعيش في المحيط ودة هتلاقيه في متحف الحفريات في واحات الفيوم اللي تم افتتاحه في 2016. عادي إنك تزهق من المشي الطويل وتبقى عايز تجرب أنشطة تانية زي التخييم، والتزلج على الرملة، أو التجديف، ممكن كمان تعمل مع صحابك حفلة باربكيو، يمكن تحب تشوف النجوم، تركب حصان أو إنك بس تتفرج على الإكتشافات التاريخية. أظن ده أحسن إقتراح في إنك لو أول مرة تعمل هايكينج إنك تختار مكان في أنشطة تانية عشان تعرف تنبسط بوقتك قدر الإمكان.

درب سيناء
المصدر:Independent 

في 2016 اعتبرت النقابة البريطانية لكتاب الرحلات درب سيناء من أفضل المشاريع السياحية الجديدة. وهو يعتبر أطول درب للهايكينج في مصر، بيبدأ من خليج العقبة وبيتنهي عند سانت كاترين. المميز في الدرب دة إنه له هدف في تنمية المجتمعات البدوية وتوفير شغل ليهم قانوني من خلال مساعدة وإرشاد السياح وغيرهم للمشي في الدرب ومحاولات للحفاظ على التراث البدوي. دلوقتي طول الدرب 550 كيلو متر وبياخد 42 يوم هايكينج مع 8 قبائل بدوية. المشي في درب سيناء مش هدفه الأساسي بس مجرد إنك بتمشي، لأن بمشيك ده إنت بتدعم مجتمعات تانية إنها تلاقي شغل، تلاقي فرصة إنها تحافظ على تراثهم وتكون بتدعم السياحة المستدامة صديقة البيئة وبتشجع البدو اللي تعبوا سنين عشان يحولوا الأرض القاحلة دي لدرب يدب فيه رجليك ومعاها الحياة.

درب البحر الأحمر المصدر: Red Sea Mountain Trail

درب جديد لسه بيتعمل بمساعدة مؤسسين درب سيناء و "عمر سمرة" و "بين هوفلر" هيكون طوله 170 متر ويتمشي في 10 أيام. المميز فيه إنه جنب الغردقة وهو أول درب يتعمل برة نطاق سيناء، وهدفه الكشف عن مناطق أثرية رومانية. درب البحر الأحمر بيعدي من جبل شايب البنات اللي ارتفاعه 1,782 متر، فتعرف تكشف من فوقه قمة جبل أبو دخان، وجبل أم عناب. و هدفه برضه إنه يوفر الشغل والفرص للمجتمعات البدوية. هم محتاجين الدعم والتشجيع ونشر فكرتهم لأن البدو في المنطقة دي مش متعودين على السياح فمحتاجين ياخدوا دورات تدريبية عن الإرشاد السياحي والمعلومات اللي تخص الممرات وأساميها طول الدرب، أسامي الآبار وأماكنها وتاريخ المنطقة بتراثها، وأسامي النباتات اللي بتنمو في المنطقة دي.