share this article

لو حاولت تفكر في أعظم اختراع للبشرية، الإنترنت غالبًا هيبقى من أول تلاتة، لو مكانش رقم واحد. بس على الرغم من ده، ومن مميزاته الكتير جدًا، لما تشوف أطفال معظم وقتها بيضيع في مواقع التواصل الاجتماعي وفي اللعب الأونلاين، غصب عنك هتبتدي تفكر إن الإنترنت مش كل جوانبه مشرقة. الأجيال الصغيرة بقوا مسحولين مع التكنولوجيا ومعتمدين عليها بشكل كبير جدًا، لدرجة صعب معاها تلاقي طفل بيعرف يعمل حاجة ملهاش علاقة بالتكنولوجيا. عشان كده Muricata، اللي بتتبع شركة Wild Guanabana، بس بتهتم بالسن الصغير، بيحاولوا يغيروا مفهوم الأطفال عن المتعة، وعن إزاي ممكن ينبسطوا.

Muricata بتوري الأطفال طرق بديلة عشان ينبسطوا، ويتعلموا مهارات جديدة زي أساسيات النجاة في البرية ومهارات القيادة، الاعتماد على النفس، ازاي يبقى عندهم وعي اجتماعي وبيئي، وحاجات تانية كتير، غير طبعًا الحركة الكتير والمجهود البدني اللي بيعوض عن القعدة الكتير على الكنبة للفرجة على التلفزيون واللعب على الموبايل. بيحاولوا كمان يقدموهم لحاجات في الطبيعي عمرهم ما هيتعرضوا ليها ولا يقابلوها.

المعسكر الجاي بتاعهم هيبقي مميز جدًا، والأطفال المفروض هيعيشوا تجربة معاشوهاش قبل كده. معسكر الربيع بتاع Muricata هيبقى 5 ليالي، 6 أيام، في سهل حشيش، والأطفال هيعملوا أنشطة كتير جدًا. المعسكر للأعمار من 7 إلى 15 سنة، وهيبتدي يوم 26 أبريل ويخلص 1 مايو.

الأطفال مستنيهم حاجات زي مشي مسافات طويلة، سنوركلينج، ركوب خيل، تجديف وصنع قوارب، رحلات في غواصات ومراكب، ده غير إنهم هيحضروا جلسات عن ريادة الأعمال وازاي ممكن تبتدي شركتك، الفضاء، علم الفلك، ودروس طبخ كمان! هيتعلموا ازاي يعملوا نار، ومهارات تانية مهمة جدًا في البرية، غير طبعًا ألعاب كتير هيلعبوها عشان ينبسطوا ويتعلموا حاجة جديدة في نفس الوقت مع كل نشاط.

الهدف من الجلسات والورش اللي هيحضروها عن مواضيع مختلفة، زي الفضاء، مش إن الطفل يبقى عالم ذرة في ساعتها، الموضوع الهدف منه إنه يعرف أساسيات موضوع معين، والأهم من ده إثارة اهتمام الطفل بالموضوع عشان يرجع يبتدي يجري وراه ويتعلم عنه، ويمكن يبقى ده حياته في المستقبل.

تكلفة المعسكر 3900 جنيه، وعشان تعرف تفاصيل أكتر عن الحجز، خش على صفحة الإيفينت.

مصدر الصور: Muricata