share this article

اختيار السكوتر أو الموتوسيكل عشان يكون هو الوسيلة اللي بتعتمد عليه عشان تروح من مكان لمكان في مصر هو أكيد اختيار عملي؛ حاجة بمنتهى البساطة بتوفر عليك وقت ومجهود وزحمة يومية وفلوس بنزين كتير، لكن إنك كمان تاخد السكوتر وتلف بيه مصر؛ دي بقى تجربة سفر مش زي أي تجربة تانية هتخليك تشوف البلد بتفاصيل معدتش عليك قبل كده، ده اللي بيحصل في "تحدي عبور مصر" اللي بيجمع محبي الموتوسيكلات والسكوتر من 2011 عشان يلفوا بيه محافظات وأماكن كتير في البلد، برعاية وزارة السياحة وهيئة تنشيط السياحة.

التحدي السنة دي هيكون من 17 لـ26 أكتوبر، وهيقطع مسافة 2650 كيلو متر على 8 مراحل؛ بعد ما كان 1700 كيلو بس في أول سنة اتعمل فيها، والمحطة الأولى في 2019 في الإسكندرية، بعدها القاهرة ويمشي بطول وادي النيل لغاية المنيا؛ وبعدين للواحات الخارجة في الصحراء الغربية، وبيرجع تاني لوادي النيل في الأقصر، هيبقى فيه يوم راحة في مدينة الأقصر، وبعدها هيبدأ خط سير الرجوع وهيتحرك لبرنيس؛ اللي هيقضوا المسافرين فيها ليلة على شط البحر الأحمر بعد ما يعدوا في الصحراء الشرقية، وبعدها الرالي هيتجه للغردقة، والعين السخنة قبل المحطة الأخيرة في القاهرة.

الفكرة في التحدي مش بس إنها فرصة للمصريين إنهم يستكشفوا بلدهم على سكوتر أو موتوسيكل، لكن كمان هي فرصة لتشجيع السياحة خصوصاً إن بييجي أجانب كتير يشتركوا في التحدي سواء جايين بموتوسيكلاتهم أو السكوتر بتاعهم من بلدهم، أو كمان يقدروا يأجروا موتوسيكل أو سكوتر بأسعار مختلفة بيوفروه المنظمين للحدث.

عشان تعرفوا تفاصيل أكتر وإزاي تقدروا تشاركوا في المغامرة ممكن تدخلوا على موقع تحدي عبور مصر.