share this article

مش كل السفريات ينفع تسافرها لوحدك، وحتى لو هينفع فالأحلى إنك تكون مع ناس تعيش معاهم مغامرة جديدة وتتشاركوا مع بعض في حاجة بتحبوها وتجمعكم، من ضمن الحاجات دي رياضات تسلق الجبال ودروب المشي hiking، ولو كل المغامرات والقصص اللي سمعت عنها من ناس حريفة جبال قبل كده خلتك تحس إنك محتاج مهارات عالية أو تدريب محترفين عشان توصل للمرحلة بتاعتهم، فنحب نقولك إنه لأ مش كل رحلات تسلق الجبال والـhiking محتاجة محترفين، وهنقولك على مجموعة من الشركات والناس اللي بتعمل رحلات من النوع ده هيحطوا رجلك على أول طريق المغامرة.

مصر

DUSK

ناس عارفين كويس هما بيعملوا ايه وبيشتغلوا في المجال ده من 2017، هما 6 أشخاص بيحبوا السفر وقرروا إنهم يشاركوا ده مع بقية الناس اللي بتحب السفر زيهم، بس عندهم رحلة هي الأشهر في الرحلات اللي ممكن تطلعها معاهم وبتبقى في المقطم، اسمها Gear of Freedom، بتبقى عبارة عن كورسات وتدريب على تسلق الحبال وسط الجبل، وفيه zip lining، بس كمان بيعملوا رحلات كتير لسينا في حالة لو طموحك عالي أوي ومش كفاية بالنسبالك جبل المقطم ومحتاج جبال وصحرا أكتر.

INSIGHTS SEEKERS

هم مدركين القوة الخارقة اللي في الصحراء، وإزاي الصحراء بتساعد الناس يكتشفوا نفسهم ويتغيروا للأحسن، عشان كده هم من 2015 بيعملوا رحلات في سينا، مشي وسط الجبال hiking، تسلق وركوب خيل، وبالطريقة دي بيغرقوا في جمال الطبيعة، كل رحلاتهم بيبقى فيها جلسات تأمل وحاجات كتير تهدي روحك وتخليك ترجع بالك رايق.

EGYPT HIKING COMMUNITY

اللي ناس كتير متعرفهوش إن مصر فيها مجموعات hikers كبيرة وناس غاوية الجبال، والحلو إنهم دايماً مستعدين يرحبوا بهايكرز جداد ويساعدهم بكل طريقة ممكنة، وأعتقد مفيش أحسن من صحبة عارفة كويس هي بتعمل إيه ومتمرسة وسط الجبال والصحراء، ممكن تطلع معاهم رحلات في مصر أو بره مصر.

درب سيناء

أعتقد الاسم شارح نفسه فهندخل في الموضوع على طول، الدرب طوله 550 كم، واللي عملوه ومسئولين عنه هم الـ8 قبائل اللي في المنطقة، الموضوع مش العشا البدوي حوالين النار والسهرة اللطيفة مع الشاي على الحطب؛ لكن إنك تعيش الحياة البدوية طول مدة الرحلة، وبالطريقة دي الثقافة والموروث البدوي بيفضل عايش، وأنت بتستمتع مش بس بالمشي لمسافاة طويلة في الطبيعة لكن بقصص بتسمعها وبتعمل صداقات جديدة.

درب جبال البحر الأحمر

هو الأخ الأصغر لدرب سيناء، وقدر في وقت قصير جداً إنه يجذب سياح كتير لدرجة إنه دخل في قائمة مجلة Time ضمن أعظم 100 مكان في العالم، الدرب موجود في الغردقة على مسافة 170 كم وبتحتاج 10 أيام عشان تمشيه كله، بس إنت في الواقع لما بتكون في رحلة معاهم إنت مش بس بتبسط نفسك لكن كمان بتساعد في التنمية المستدامة لحياة البدو اللي هناك، لأن بوجود الدرب بقى عندهم فرص عمل ودخل من غير ما يكونوا مضطرين يسيبوا مجتمعاتهم، وتقدر من خلال صفحة الدرب على فيسبوك تشوف الرحلات الجديدة اللي أعلنوا عنها وهتبقى في سنة 2020 عشان يادوب تبتدي تخطط من دلوقتي.

لبنان

DALE CORAZON

لبنان طول الوقت معروفة بجمال الطبيعة، الجبال العالية، وشجر الأرز ودايما في أغاني أشعار في جمال لبنان، مستني إيه عشان تخرج تشوف الطبيعة دي؟ DALE CORAZON بيخلوك تستمتع في يوم واحد في رحلات مشي hiking في كل ركن في لبنان، من 2011 هدفهم يخلوا الناس تشوف سحر لبنان بكل الطبيعة اللي فيها ومن أطلال لحضارات مختلفة في كل بقاع لبنان.

الأردن

WILD JORDAN

طبعا بيفرجوك على الحياة البرية والطبيعة في الأردن، بس الأهم إن أرباحهم بتروح لحماية الأماكن دي والإهتمام بيها، ولما تعرف إنهم في المجال ده من 2003 هتطمن على الآخر وتحط في بطنك بطيخة صيفي، واللي هيريحك أكتر إن رحلاتهم بتفتح سوق للحرف اليدوية يعني بتقدر توفر فرص عمل للعائلات، وبكده إنت مش هتكون بس بتتفسح لكن بتخلي حياة ناس تانيين أحسن .. أعتقد مفيش أحسن من كده.

الإمارات العربية المتحدة

UAE TREKKERS

طبعاً من الاسم قلت إنهم بيعملوا رحلات في الإمارت وده تقريبا تلت الحقيقة، لأنهم بيعملوا رحلات في عُمان وفي حتت كتير في العالم كمان، ومفيش حاجة هتفكر فيها مش هتلاقيها عندهم من رحلات مشي عائلية لغاية رحلات تتفرج فيها على بيض السلاحف وهو بيفقس، وكمان لو وقتك ضيق وأجازتك مش طويلة هتقدر تلاقي عندهم رحلات يوم واحد، ولو مغامر مغوار عندهم رحلات كذا يوم، ومن يوم ما بدأوا في 2011 وهم مابطلوش يوروا الناس سحر الحياة البرية في الأمارات وعُمان والعالم.