share this article

اللي راح الأردن قبل كده عارف شكل الطبيعة والجبال الموجودة هناك، دروب للمشي Hiking وسط الجبال وخبايا ودهاليز ميعرفهاش غير اللي حافظين الجبل، وعادة عشان تعرف تمشي وسط الجبال محتاج تكون مع مرشد حافظ كويس أوي الطرق؛ بالتالي الموضوع أكبر من واحد صاحبك عايش هناك أو راح كتير فممكن ياخدك يفرّجك على البلد، الموضوع محتاج إحترافية ودرجة خبرة معينة عشان تبقى مرشد في الأماكن دي.

ده السبب اللي خلّى وزارة السياحة والآثار الأردنية بالتعاون مع السفارة الفرنسية في عمّان؛ يقرروا يقدموا فرصة للي حابب يبقى مرشد سياحي للنوع ده من المغامرة والرياضات سواء مشي أو hike أو أي شكل من أشكال السياحة وسط الجبال والطبيعة، وهيعملوا تدريب من خلال المدرسة الوطنية الفرنسية لمرشدي الجبال (ENSA) ومجلس السياحة الأردني والجمعية الأردنية لمتسلقي الجبال؛ وبالتنسيق مع الجمعية الملكية لحماية الطبيعة وجمعية أدلّاء السياح الأردنية.

كل الجهات والجمعيات دي اجتمعوا عشان أهمية إنهم يوصلوا في الآخر لمرشدين سياحيين محترفين في النوع ده من السياحة، وعشان كده التدريب هيتقسم لأربع نواحي هيشتغلوا عليها، مرشدين لرحلات المشي Hiking، مدربين في الجبال، مدربين لرياضات التسلق ومرشدين للرياضات المائية سواء في الشلالات أو الأنهار Canyoning.

وعشان تقدر تقدّم على فرصة التدريب دي؛ محتاج شوية أوراق من ضمنها شهادة كفاءة في الإسعافات الأولية (مش أقدم من 3 سنين)، شهادة طبية تثبت قدرتك على الرياضات الجبلية (مش أقدم من 3 شهور وممكن تاخدها من أي مركز طبي)، وصحيفة الحالة الجنائية أو فيش وتشبيه، ده غير إن كل اللي هيقدموا هيتعملهم اختبارات لياقة حسب هما مقدمين لأنهي تدريب من التدريبات اللي في البرنامج.

التقديم مفتوح لحد 15 سبتمبر 2019 من خلال استمارة التقديم اللي في اللينك، ولو محتاج تعرف تفاصيل أكتر ممكن تشوف موقع الجمعية الأردنية لمتسلقي الجبال.