share this article

عشان تتسلق جبل، محتاج تقهر مخاوفك وتعدي من حاجات إنت مكنتش تتخيل إنك تقدر تعديها، الموضوع محتاج إرادة، تركيز، وقوة بدنية كبيرة عشان تتسلق قمة جبل ارتفاعها كام ألف متر. في أبريل ده، أعلى قمة في العالم هتشهد حدث تاريخي لما أكبر عدد من العرب من جنسيات مختلفة يحاولوا يتسلقوا إيفرست. في 2016 حاول فريق عسكري من 13 إماراتي تسلق إيفرست، بس المرة دي أكبر عدد عرب من جنسيات مختلفة هيبقوا مع بعض ع الجبل في نفس الوقت.

شريف العبد (المصدر شريف العبد)

المشاركين في التسلق على معاد مع أعلى نقطة ع الأرض فوق مستوى سطح البحر بارتفاع حوالي 9000 متر. المجموعة اللي هتحاول تتسلق الجبل تتضمن المصري شريف العبد، اللي بيحاول يكون تاني مصري يوصل لللقمة بعد المغامر والمتسلق عمر سمرة. شريف طالع مع شريكته في التسلق نيللي عطار، اللبنانية المقيمة في السعودية وشغالة كمدربة لياقة ورقص، ومؤسسة مركز لتعليم الاتنين في الرياض.

 نيللي عطار (المصدر نيللي عطار)

في تلاتة كمان من لبنان، رائدة الأعمال اللبنانية المقيمة في دبي فاطمة (تيما) دريان مغامرة، بقالها كتير بتستعد لإيفرست، المغامر والمتسلق أفيديس كالبكليان، وفي كمان جويس عزام، اللي من قريب جدًا صعدت سادس قمة من أعلى سبعة في العالم لما طلعت جبل فينسون، كده باقي لها جبل إيفرست بس عشان تبقى عملت تحدي السبع قمم. في ست كمان هتحاول تعمل الإنجاز ده، السعودية منى شهاب اللي بقالها كتير مصدر إلهام لمتسلقات الجبال والمغامرات من المنطقة.

تيما دريان (المصدر تيما دريان)

في اتنين من الأردن كمان رايحين المغامرة دي، دولورس الشلة أول امرأة عربية تتسلق جبل ماناسلو في نيبال، وإيمان المجالي، مدربة اللياقة المعتمدة، الاتنين هيحاولوا يكونوا أول نساء من الأردن يتسلقوا إيفرست.

مجموعة العرب دي هيحاولوا يتسلقوا الجبل ف أبريل، ولمدة شهرين، هيواجهوا الجبل ومخاوفهم، وإحنا بنأمل يقهروا الاتنين. خليكوا متابعين القترة الجاية دي وهننزل أخبارهم أول بأول.