share this article

لو نفسك تبقى متسلق جبال أو بتفكر مع دخلة السنة الجديدة إنك محتاج تعمل hikes أكتر، أو تتوحد مع الطبيعة أكتر عشان تفصل شوية من دوشة المدينة؛ أو حتى تعمل مغامرة جديدة غير سفرياتك المعتادة؛ فمش لازم خالص تاخد بعضك وتروح جبل ايفرست عشان تعمل ده، مش لازم أصلاً تروح بلاد بعيدة أو أطول قمم عشان تحقق ده، دول عربية كتير حوالينا مليانة جبال مؤهلة إنها تستقبل سياح ورياضيين ومتسلقين جبال، أماكن كتير مش محتاجة أصلاً إنك تكون متدرب أو طلعت جبال قبل كده، وأماكن تستاهل إنك تجرب تحطها في الـbucketlist بتاعتك لأنها هتوريك مناظر بانورامية في كل بلد غير أي حاجة تانية ممكن تشوفها.

جمعنالكم 10 جبال في 8 بلاد عربية تقدر تروحهم في أي وقت يكونوا نقطة إنطلاقك لرياضة تسلق الجبال.

1- جبل سانت كاترين - مصرمصدر الصورة: St. Katherine

أي حد عايش في مصر وموضوع الجبال بيزغلل عينيه بتبقى دايماً بدايته هي جبل سانت كاترين، أعلى جبل في مصر موجود في جنوب سيناء وارتفاعه 2650 متر، وعلى حسب لياقتك البدنية هتتحدد عدد الساعات اللي تحتاجها عشان توصل للقمة في رحلة الطلوع، واللي غالباً بتبقى في الشتا مع درجة حرارة تحت الصفر، يمكن كمان الجبل هو من الأماكن القليلة في مصر اللي بينزل فيها التلج.

معظم الناس بتحب تطلع سانت كاترين بالليل بحيث يوصلوا القمة يتفرجوا على لحظة شروق الشمس، اللي معاها بيختفي تقريباً كل التعب اللي حصل وقت التسلق، لكن غير الشروق كمان المنظر البانورامي فوق هو عبارة عن جبال البحر الأحمر اللي منهم قمم تانية كتير الناس بتحب تطلعها زي جبل موسى، ويمكن لأن المنطقة معروفة بالسياحة الدينية بسبب وجود دير سانت كاترين فيها؛ ف ده بيخلي المكان فيه طابع روحاني غير فكرة تسلق الجبال والسياحة البيئية.

2- جبل توبقال - المغرب مصدر الصورة: tripsavvy

توبقال موجود في المغرب وأعلى قمة في سلسلة جبال الأطلس بارتفاع 4167 متر، وهو دايماً من أول الاختيارات اللي بيروحلها متسلقي الجبال لكذا سبب، ارتفاعه؛ والظروف المناخية بتاعته، يعني مع الحر في الصيف أو التلج اللي بيغطي الجبل في الشتا؛ في الحالتين طلوع الجبل بيبقى فيه تحدي كبير مع كمان ارتفاعه العالي.

وعشان إقبال السياح والرياضيين على تسلق توبقال، المكان فيه مخيمات ومعسكرات يقدروا الناس يستريحوا فيها في رحلة طلوعهم للقمة واللي عادة بتاخد من أول 3 أيام ما بين يومين طلوع ويوم نزول، أو عدد أيام أكتر على حسب فترات الراحة اللي في النص واللي برضه بتعتمد على اللياقة البدنية للمجموعة اللي بتحاول تتسلق الجبل. 

حوالين الجبل كمان فيه مجموعة جبال تانية أصغر شوية وأسهل إلى حد ما في التحدي، بحيث لو حبيت تبدأ بالتدريج ومتروحش على أصعب وأعلى جبل مرة واحدة، لكن في الآخر توبقال مش من الجبال المتصنفة إنها للمحترفين بس أو الرياضيين اللي طلعوا جبال كتير قبل كده، بيحتاج بس شوية مذاكرة للتقنيات اللي هتحتاجها لما تتسلق الجبل، وإزاي تتعامل لو حصلت عاصفة تلجية مثلاً وإنت طالع، وده بيحصل في بداية أي رحلة للجبل مع الشركات والمرشدين هناك.

3- جبل أم الدامي - الأردن مصدر الصورة: worlderingaround

موجود في وادي رم وهو أعلى جبل في الأردن بارتفاع 1854 متر، ورغم إنه أعلى واحد لكن معظم الناس أو السياح بيروحوا جبل رم أكتر من جبل أم الدامي؛ ده لأنه موجود في آخر وادي رم بعيد عن معظم المخيمات اللي الناس بتنزل فيها هناك، لكن المنظر من فوق يستاهل يتراحله مخصوص لأنه عبارة عن وادي رم وصحراء السعودية اللي بتبان من فوق، ولو روحت في يوم السما صافية ومفيش ضباب كتير؛ تقدر تشوف البحر الأحمر والجبال بتاعته، يعني ميكس ألوان أحمر وأصفر وأزرق حسب عينيك جايبة أنهي منظر من التلاتة.

طلوع الجبل نفسه بيحتاج من ساعتين لخمس ساعات حسب اللياقة البدنية لكل شخص؛ بس ميعتبرش من الجبال الصعب طلوعها؛ غير بس شوية أجزاء في الطريق صخرية ومنحدرة،  وعشان توصل لنقطة البداية اللي تطلع منها الجبل؛ الطريق بتاعه كله في الصحرا بالتالي لازم عربية 4x4 في طريق مدته ساعة ونص من مركز زوار وادي رم، وسهل تلاقي مرشدين من البدو في أي كامب هتنزل فيه في وادي رم يوصلوك لحد مكان طلوع الجبل.

4- جبل رم - الأردن مصدر الصورة: wikimedia

بفرق 100 متر عن جبل أم الدامي؛ جبل رم ارتفاعه تقريباً 1754 متر عن سطح البحر، وهو الجبل اللي السياح ومتسلقي الجبال بتروحله أكتر من أم الدامي لأنه أقرب لأماكن تخييم الناس في وادي رم، وطبعاً المنظر البانورامي بتاعه من فوق هو عبارة عن قرية ووادي رم.

يُفضل إنك متحاولش تروح لوحدك، وسهل برضه أيا كان الكامب أو المكان اللي إنت فيه إنك تلاقي مرشد أو حد من البدو وأهل المكان تروح معاه رحلة تطلع الجبل، غير كمان مركز زوار وادي رم اللي بيعمل جولات سياحية كتير في الوادي حسب إنت عايز تعمل إيه هناك.

5- جبل جيس - الإمارات مصدر الصورة: photographylife

جبل جيس هو جزء من سلسلة جبال اسمها "جبال الحجر" موجودة في الإمارات وفي سلطنة عمان، لكن "جيس" هي أعلى قمة في دولة الإمارات بتوصل لحد ارتفاع 1934 متر فوق مستوى سطح البحر، وفي الوقت اللي الإمارات معروفة فيه زي بقية دول الخليج بالجو الحر المبالغ فيه في شهور الصيف؛ جبل جيس بيبقى هو المهرب لأي حد بيدوّر على فسحة مختلفة في البلد ومش في مول، ومش في درجة حرارة تجيب ضربة شمس آخر اليوم! ده لأن درجة الحرارة فوق الجبل في شهور الصيف بتبقى أقل 10 درجات من العادي في بقية المدن، يعني ممكن توصل لـ31 درجة مئوية.

متعة الجبل ده تحديداً إنه مزار سياحي جاهز لأي حد ياخد شنطته ورا ضهره وينطلق، فيه مسارات للمشي hike تقدر تنزّل الخريطة بتاعتها وتختار المسار اللي هتمشي فيه من ضمن 6 مسارات في الجبل من أول كيلو لحد 6 كيلو، وفيه يفط وعلامات طول الطريق تعرّفك إنت فين، غير كمان الأنشطة الترفيهية اللي عاملينها زي إن فيه فوق عند القمة أطول مسار zip lining في العالم متسجل في موسوعة جينيس للأرقام القياسية.

تقدر تدخل على الموقع الخاص بجبل جيس عشان تعرف كل تفاصيل الأنشطة المتاحة والمسارات اللي تحب تستكشفها.

6- جبل القرنة السوداء - لبنان مصدر الصورة: annahar

من أشهر الحاجات عن لبنان هي الجبال؛ خصوصاً إن كلها مناظر طبيعية وجبال خضرا بتخليك تشوف البلد كلها طول ما إنت طالع، أو جبال مغطيها التلج في الشتا وشايف القمم البيضا بتاعتها من شوارع بيروت تحت، لكن "القرنة السوداء" ظروفها مختلفة شوية، هي أعلى قمة جبل في بلاد الشام كلها مش في لبنان بس واصلة لحد ارتفاع 3093 متر، وعلى كل المناظر الطبيعية اللي مغطية لبنان دي؛ القرنة السودا مكان ظروفه مختلفة ومفيهوش طبيعة مغطية الطريق وإنت طالع، ده كمان اللي بيخلي الجو برد جداً طول السنة مش بيعدّي 15 درجة في عز شهور الصيف لأن مفيش أشجار أو أي حاجة تصد الرياح والبرد، وطبعاً مغطيها التلج في شهور الشتا بيبقى طوله أكتر من 10 متر وبيفضل لحد شهر يونيو عشان يسيح!

أقرب حاجة لجبل القرنة السودا هو مدينة بشري اللي معظم السياح بيروحوها عشان أشجار الأرز، ووادي قاديشا اللي برضه بيتعمل فيه hikes كتير، من هناك تقدر تروح لوحدك تطلع قرنة السودا أو مع أي شركة سياحة من المنتشرين اللي بيعملوا الرحلات دي.

7- الجبل الأسود - السعوديةمصدر الصورة: elevation

في الجزء الغربي من السعودية؛ فيه سلسلة جبال طويلة جداً اسمها "جبال السروات" ماشية بالتوازي مع البحر الأحمر من خليج العقبة فوق في الأردن لحد اليمن في الجنوب، الجبل الأسود هو واحد من ضمن السلسلة دي وأعلى نقطة فيها في السعودية، ارتفاعه بيوصل لـ2900 متر عن سطح الأرض، واتسمى كده لأنه من كتر الزرع والشجر اللي مغطي الجبل كله وبسبب الضباب اللي بيبقى فيه من كتر ارتفاعه؛ بيبان من بعيد أوي إن لونه أسود.

الجبل ده طلوعه أو الـhike فيه متعتبرش حاجة صعبة لأنه أصلاً عايش فيه ناس وقبائل كتير بتشوفها طول الطريق وانت طالع، متعته إنك بتعيش تجربة أصيلة وسط أهل المكان، ومن الجبال المؤهلة إنها تستقبل سياح وزوار طول الوقت لأن ارتفاع المكان وطبيعته بتخلي مصورين ومغامرين كتير يروحوا هناك.

تقدر توصل للمكان على جوجل مابس لأن جنبه منتزه اسمه منتزه السودة على اسم الجبل، وممكن تروح بعربيتك وخيمتك وتختار المكان اللي عايز توصله سواء فوق خالص على القمة أو في النص في أي حتة في الجبل بمساعدة السكان المحليين هناك.

8- جبل شمس - عمانمصدر الصورة: bucketlistly

رغم إن عمان من البلاد المستخبية اللي مش بنعرف عنها حاجات كتير؛ بس فيه معلومة معروفة لأي حد بيحب السفر وهي إن فيها أحلى مناظر طبيعية بتخليها الفسحة المفضلة بالذات للي عايش في السعودية والإمارات؛ لأنها بتتراح بالعربية في طريق سفر قصير جداً، ومن ضمن الأماكن اللي الناس بتروحلها أول حاجة هي جبل شمس؛ أعلى قمة في سلسلة جبال الحجر وارتفاعه بيوصل لأكتر من 3000 متر، لدرجة إنه اسمه "جبل شمس" عشان من كتر ارتفاعه بيبقى هو أول نقطة تشوف الشمس في عمان وآخر نقطة بتغرب عنها الشمس.

طبيعة الجبل ده صخرية بس حواليها وديان كتير وشجر ونخل حتى على الجبل نفسه، غير إن برضه الجو فيه بيبقى حلو في الصيف والشتا، ولأنه من الأماكن اللي بيجيلها سياح كتير من أول المغامرين والمصورين المحترفين اللي جايين عشان شوية لقطات من فوق القمة، لحد العائلات والناس اللي جاية بعربياتها وبتخيم في الوادي تحت أو على الجبل نفسه.

جبل شمس على بُعد 240 كيلو من العاصمة مسقط، وممكن تروح مع مرشد أو شركة سياحة في أي رحلة من الرحلات الكتير اللي بيعملوها للجبل، أو بالعربية لمحافظة الداخلية؛ ومن هناك فيه طريق (درب مشي) اسمه W4 هياخد منك حوالي 5 أو 6 ساعات لحد ما توصل للقمة، وسهل تمشي على الخريطة بتاعته لأن الطريق نفسه متظبط ومعمول أسوار كمان في أجواء منه.

9- الجبل الأخضر - عمان مصدر الصورة: Matador Network

زي جبل شمس بس أقل شوية في الارتفاع؛ الجبل الأخضر هو واحد من سلسلة جبال الحجر، وواضح من الاسم إنه "الأخضر" بسبب كمية أشجار الفاكهة اللي موجودة فيه، لدرجة إنهم من 2011 أعلنوا إن الجبل بالمنطقة اللي حواليه بقوا محمية طبيعية عشان يحافظوا على شكل الحياة النباتية والحيوانات اللي فيه.

ولأنه محمية فطبعاً المكان متظبط جداً للسياح وكمان فيه أماكن للإقامة في المنطقة، غير إنه على بُعد ساعتين تقريباً من العاصمة مسقط، ومش محتاج تعتمد على شركة أو مرشد لأنه طريق تسلق الجبل سهل؛ بتوصل عند مدخل المحمية من على جوجل مابس عادي جداً، تاخد خريطة للمكان وتبتدي رحلة الصعود إلى القمة، مع الأخذ في الاعتبار إن شهر أغسطس هو أحلى وقت تعمل فيه الرحلة دي لأن شهور الصيف هناك بيبقى الجو فيها حلو جداً.

10- جبل لالّة خديجة - الجزائر مصدر الصورة: reddit

في الجزء الشمالي الغربي من قارة أفريقيا هتلاقي جبال الأطلس؛ سلسلة جبال طويلة جداً ممتدة في تونس والجزائر والمغرب، من ضمنهم جبل "لالة خديجة" تالت أعلى قمة في الجزائر بارتفاع 2308 متر، ورغم إن فيه جبلين تانيين أعلى منه بس اللي بيروح لالة خديجة بيبقى الغرض أكتر هو متعة الطريق وطبيعة الجبل نفسه، أكتر من نقطة إنه الأعلى ولا لأ.

درجة الحرارة القليلة معظم شهور السنة هناك بتخلي الجبل متغطي تلج في الشتا، وعبارة عن وديان وشجر وغابات خضرا في الصيف، غير كمان إنه طريق الطلوع نفسه كله قرى وناس عايشين عشان كده سهل لو حد عايز ياخد بعضه ويطلع الجبل وهيلاقيه على جوجل مابس عادي، أو من خلال مرشد من السكان المحليين هناك.