غامر

اطلاق درب جديد للمشي (Hiking) في جبال البحر الأحمر

اطلاق درب جديد للمشي (Hiking) في جبال البحر الأحمر
المصدر:Ben Hoffler

أول رحلة هتبقى في أوائل شهر 4 بمشاركة المغامر عمر سمرة

2019/01/28
share this article

في الوقت اللي بتتجه فيه مصر ناحية السياحة المستدامة، أعلن مؤسسين مشروع درب سيناء وعمر سمرة إنهم هيعملوا درب جبال البحر، وهو بطول 170 كيلو متر، ويعتبر طريق جديد لهواة المشي الطويل لإنه بيتمشي في مدة 10 أيام. المسؤول عن تنظيم رحلات ال hiking هي قبيلة "المَعزة"وهي أكبر قبيلة بدوية في مصر، والمسؤولين عن المشروع وتنفيذه هو Ben Hoffler و المغامر عمر سمرة.
درب البحر الأحمر يعتبر أول درب يتعمل في المنطقة القريبة من الغردقة، والحاجة الوحيدة اللي شبهه هو درب سيناء، وهم الإتنين  بيوفروا فرصة للمغامرين والرحالة إنهم يتمتعوا بجمال الطبيعة، ويجربوا الحياة البرية ويشوفوا مناطق جميلة من مصر والشرق الأوسط. من أجمل مميزات الدرب ده إنه جنب المطار فمش هياخد منك وقت في إنك تروح وتجرب مغامرة جديدة. بالتالي ده بيدي الفرصة لقبيلة "مَعزة" في إن يتوفر لهم أشغال مناسبة لمهارتهم، ويوروا الناس عمق جمال وحكمة المشي في الصحراء، لأنهم أكتر ناس عارفين بيها وبدروبها، من ناحية تانية الدرب أخد من البدو وقت طويل جدًا عشان يعملوه، وهم لسه محتاجين الدعم والتشجيع لنشر فكرتهم بوجود درب جديد!

" درب البحر الأحمر بيفتح فرصة قانونية للمجتمع البدوي في إنه يلاقي شغل وكمان هي نوع سياحة جديدة بيحافظ على المعرفة القديمة، والمهارات والتجارب الحقيقية في إنها تعيش وتستمر في عالم مُتغير دايمًا" بين هوفلر. 

"مرعي أبو مسلم" من عشيرة "شخمان" وشيخ قبيلة المَعزة وواحد من مؤسسين الدرب الأحمر، بيسعى في إنهم يوفروا وظايف للمجتمع البدوي. ده على الناحية التانية محتاج تشجيع ودعم لتدريب البدو على معلومات أساسية تخص المنطقة اللي عايشين فيها زي الطرق، وأساميها، أسامي ينابيع المياه وأمكانهم و تاريخ الدرب وكل حاجة السياح هيكوكنوا مهتمين يعرفوها.

درب البحر الأحمر بيعدي من جبل شايب البنات اللي بارتفاع 1,782متر، فتعرف تكشف من فوق قمة جبل أبو دخان، وجبل أم عناب..

 طول ما إنت ماشي في الدرب هتلاقي تراث وتاريخ الرومان في كل حتة من أول المدينتين القدامى اللي موجدين بطول الدرب المونس كلوديانوس ومونت بروفريتس، وإن رفعت عينك لفوق هتقدر تشوف الحصون القديمة وأبراج المراقبة.

من حمامات الزمرد في الوديان السودة الصخرية في جبل أبو دخان للصخور العتيقة الممتدة من جبل قطار لجبل أم عناب.
شوف الصور واتملي بجمال المنظر.





 الرحلة اللي جاية هتطلع في أوائل شهر أربعة وهيكون طالع فيها المغامر عمر سمرة.