share this article

 لأول مرة، مصر قررت تدمج سياحة المغامرة في الوفد المصري اللي طالع يحضر World Travel Market في لندن، اللي بيجمع مقدمي الخدمات والرحلات السياحية من العالم كله. المتسلق والمغامر عمر سمرة هيروح كالممثل الوحيد لسفر المغامرات من مصر عن طريق شركته Wild Guanabana. واحدة من أهم النقط اللي Wild Guanabana هتركز عليها في لندن هي درب سيناء – درب طوله 550 كيلومتر في جنوب سيناء ومتنظم عن طريق القبائل اللي في الدرب. عمر سمرة، مؤسس والرئيىس التنفيذي للشركة، بيقولنا "إحنا بنأمل إننا نوضح أهمية النوع ده من السفر المستدام وعايزين نثبت إنه يقدر يخلق فرص عمل للناس في المجتمعات دي وكمان يبقى حاجة تشد السياح".

بالتركيز على درب سيناء ونوع السياحة المستدامة اللي بيوفره، عمر وشركته بيأملوا إنهم يحطوا نموذج ناجح للسياحة المستدامة اللي الهدف منها مش بس إن السائح يتفسح ويتبسط. عمر بيقولنا "الرحلة مينفعش بس تبقى عشان السائح يتبسط، لازم يبقى ليها تأثير إيجابي على المجتمعات المحلية وموفري الخدمات، سواء عايشين في قرى أو قبائل أو أماكن بعيدة، الناس دي لازم تستفاد من الرحلات". وده اللي Wild Guanabana كانت بتعمله بالتعاون من درب سيناء السنة ونص اللي فاتوا، بسبب التعاون ده قدروا يساعدوا أهل القبائل اللي على الدرب إنهم يعيشوا حياة أحسن ويبقوا في دائرة الأضواء.

بعيدًا عن Wild Guanabana، عمر سمرة كمان هيحضر الملتقى بصفته سفير لسياحة المغامرات من مصر، بيقولنا "عايزين نبين للناس اللي هتحضر من بلاد تانية – بالذات إنجلترا – ازاي بنعمل رحلاتنا في مصر وقد إيه هي أمان. عملنا رحلات كتير الفترة اللي فاتت من غير ما تقابلنا أي مشاكل أمنية، وعارفين إن دي حاجة ممكن تبقى من مخاوف سياح كتير". الملتقى بيتعمل على مدار 3 أيام – من 5 نوفمبر إلى 7 نوفمبر – ومتوقع هيحضره أكتر من 50 ألف شخص وهيبقى فيه networking events وحاجات كتير على مدار ال3 أيام.

مجال السفر والسياحة ابتدى يتغير الفترة اللي فاتت، التركيز مبقاش على الأشكال التقليدية للسفر والسياحة لما تروح تعمل سائح وتتصور جنب الأهرام وتشتري حاجة من خان الخليلي وتفتكر نفسك ابن بطوطة. دلوقتي بقى في تركيز على السياحة المغامرة والمستدامة، اللي تقدر من خلالها تعيش تجربة حقيقة وتتعامل مع ناس بجد، كل ده وإنت مش بس بتحافظ على البيئة والمجتمع اللي فيهم، ده وإنت بتحسن منهم كمان.