share this article

رغم إن درب جبال البحر الأحمر ابتدى بس من شهر أبريل اللي فات؛ لكن قدر في فترة قليلة إنه يكون وجهة سياحية سواء للأجانب اللي جايين مصر وبيدوّروا على أماكن جديدة غير المزارات السياحية التقليدية، أو حتى للمصريين اللي زهقوا من الخروجات والسفريات اللي كرروها كتير، لدرجة إنه في خلال 4 شهور بس من افتتاحه دخل ضمن قائمة الـTIME لأعظم 100 مكان في العالم.

الدرب بيعتبروه الأخ الأصغر لدرب سيناء، وعشان تاخد الطريق كله من أوله لآخره يبقى ده معناه إنك هتقطع 170 كيلو وهتحتاج 10 أيام عشان يخلصوا، بس عشان مش كل الناس عندها القدرة إنها تمشي المسافة دي كلها؛ غير كمان إنه مش سهل تاخد أجازة 10 أيام لرحلة زي دي، نحب نقولك إنهم أعلنوا عن كل رحلات المشي أو الـhike اللي هيعملوها من أول ديسمبر الجاي لحد مايو 2020، رحلة كل شهر ماعدا ديسمبر ومارس اللي هيكون فيهم رحلتين في الشهر، وكلهم أيام الجمعة والسبت.
 

تفاصيل كتير ممكن تعرفوها عن الدرب والرحلات اللي اتعملت فيه قبل كده من خلال الموقع الخاص بيهم، وكمان صفحتهم على الفيسبوك هتعلن تفاصيل أكتر عن كل رحلة هيعملوها في الأيام اللي أعلنوا عنها.