share this article

رغم إن الماراثون مش فكرة جديدة في مصر؛ وفي السنين اللي فاتت بقى فيه ناس كتير من اللي بيحبوا الجري بيشتركوا في ماراثونات أسبوعية وشهرية بتختلف حسب مسافة كل ماراثون، لكن "ألترا ماراثون مصر" هيكون أطول ماراثون عن الماراثون العادي اللي بيبقى 42 كيلو متر جري.

الماراثون هيبقى على مدار يومين من 19 لـ21 ديسمبر، وأحلى حاجة فيه هتبقى مكان الجري اللي في جنوب سيناء، تحديداً في منطقة سرابيط الخادم الأثرية، واللي هتكون فرصة تخلي الناس تشوف طبيعة ومناظر مش معتادة ومش بيروحلها سياح كل يوم، غير إنها مكان مثالي لرياضيات المغامرة زي الجري.

وعلى مدار اليومين هيجري 50 رياضي في السباق اللي اسمه "حتحور 100"، واللي اتسمى حتحور على معبد بنفس الإسم موجود في المنطقة، و100 لأن المسافة مجموعها 100 كيلو متر في اليومين، وبما إنها مسافة كبيرة ف عشان كده العدد هيبقى محدود لـ50 رياضي بس، ومهم يكونوا باللياقة البدنية اللي تأهلهم لسباق بالحجم ده.

باب التقديم مفتوح من خلال الموقع الخاص بألترا ايجيبت، يادوب تلحقوا تبقوا من الـ50 اللي هينضموا للماراثون.