share this article

ذوي الاحتياجات الخاصة طول الوقت قادرين يعملوا حاجات مختلفة، تخلي الناس تثق في قدراتهم وإمكانياتهم اللي البعض ممكن ميتوقعهاش، خصوصاً بقى لو أطفال، زي الطفل محمد حسين من أطفال متلازمة داون، اللي رغم من إن سنه يادوب 14 سنة، إلا إنه قدر يتسلق جبل موسى.

محمد مهتم بالتسلق عموماً، مامته قالت في تصريحات ليها، إنه بيحب جداً يطلع السلالم لحد 20 دور مثلاً، ولما زار الهرم قدر يتسلق لحد الدور التامن من الهرم، وكان بيتابع مغامرات متسلق الجبال من ذوي الاحتياجات الخاصة مازن حمزة، ونفسه يعمل زيه ويتسلق معاه، وقعد يزن على مامته في رمضان اللي فات إنه عايز يتسلق جبل موسى مع مازن، وبالفعل تواصلت معاه، واخده مازن بالفعل لمحمية وادي دجلة عشان يدربه ويعمله شوية اختبارات.

ابتدى محمد يستعد لتسلق الجبال وبقى بياخد تدريبات تأهله نفسياً وبدنياً لمدة 5 أيام في الأسبوع، عشان يرفعوا لياقتة البدنية ونبضات قلبه، والموضوع أثر عليه بشكل إيجابي جداً، فبعد التدريب بقى قادر ينطق بعض الكلمات بعد ما كان مش بيقدر ينطق، وبقى ياخد جلسات تخاطب كمان تساعده أكتر.

بعد ما محمد تسلق جبل موسى وحقق حلمه تحت رعاية وزارة البيئة اللي بتشجع السياحة البيئية في مصر، مامته بتقول إن حلمه بقى أكبر ونفسه يتسلق كل الجبال في مصر، وقالت إن إبنها عنده إمكانيات كبيرة ولياقة مساعداه يعمل ده، وبيستوعب بسرعة غير تفوقه في الدراسة.

 المصدر: صدى البلد

المصدر: الجمهورية