share this article

بعد ما المغامر المصري علي عبده أعلن إنه هيحاول يحقق رقم قياسي تالت في موسوعة جينيس للأرقام القياسية بأطول مسافة على موتوسيكل كهربائي؛ واللي هينطلق بيه لمسافة 25 ألف كيلو متر؛ يعدّي فيهم على كل محافظات مصر بهدف إنه يوعّي الناس بمشاكل البيئة وتغير المناخ؛ قررنا إننا نسأله شوية اسئلة نحاول نعرف بيها تفاصيل أكتر عن رحلاته ومغامراته وإزاي بيجهز للمغامرة الجديدة اللي بتدعمه فيها الأمم المتحدة ووزارة الإنتاج الحربي ووزارة الشباب والرياضة.

احكيلنا الأول بدأت إزاي هواية ركوب الموتوسيكلات؟

أنا شخص عادي جداً مهندس نظم معلومات من الناس اللي عندهم وظيفة من 9 لـ5، وعايش في الإسكندرية، متجوز و عندي ولد و بنت، وموضوع ركوب الموتوسيكلات ده بدأ معايا في 2013 على سبيل الهواية وإني أقضي وقت فراغي في حاجة مختلفة شوية، بس بعد كده بقى هو الحاجة اللي بتخليني أشوف الدنيا بشكل تاني غير الحياة اليومية اللي أنا عايش فيها.

ايه اللي خلاك تختار الموتوسيكلات تحديداً؟

مش أي سبب غير إني كنت بدوّر على هواية جديدة، ويمكن عشان الروتين اللي موجود في حياتي والدوامة الطبيعية بتاعتها خلتني أروح لحاجة بعيدة خالص عن النمط ده أو شكل الهوايات العادية.

بتسافر من زمان وبتحب السفر ولا برضه ده بقى هواية جديدة؟

حبي الحقيقي للسفر بدأ لما ابتديت أشوف حاجات جديدة في مصر، زي ما بيقولوا إنك أول ما تبتدي تسافر وتطلع أول رحلة ليك؛ فجأة الموضوع بيبقى زي الإدمان، بتفكر دايماً هتروح فين بعد كده، ومن هنا اتولد عندي الشغف إني عايز أشوف كل حتة في مصر.

هل من الأول كان في دماغك موضوع الأرقام القياسية وموسوعة جينيس؟

لأ خالص؛ حقيقي الموضوع في الأول زي ما قلت كان هواية، ابتديت أفكر في الأرقام القياسية لما لقيت إن دي الطريقة اللي ممكن تلفت نظر الناس للأماكن اللي أنا بروحها، لو بتحرك بالموتوسيكل من مكان لمكان وخلاص؛ يمكن مش كتير هيهتم يعرف أنا بعمل ايه أو بسافر ليه، بس لما يكون في هدف لتحقيق رقم قياسي جديد في الرحلات اللي بعملها؛ ده هيخلي الناس تتابع أكتر وتاخد بالها من المحافظات والمناطق اللي بزورها؛ واللي فعلاً تستحق إن الناس تعرف عنها وتحطها على الخريطة بتاعتها وتزورها.

احكيلنا عن يوم بيعدّي عليك وإنت في مغامرة من مغامراتك؟ وهل بتمشي على روتين معين؟

كل رحله ليها نظام مختلف بيحدده الهدف اللي أنا محدده للرحلة دي، يعني فيه أوقات بكون محتاج أوصل لمكان معين في أسرع وقت، و فيه رحلات بيكون هدفها الإستكشاف و التصوير، فمقدرش أقول إني عندي روتين ثابت لكل المغامرات، لكن بيبقى عندي ترتيبات وتجهيزات مختلفة لكل رحلة حسب هدفها.

نفسك توصل لإيه في مغامرتك الجديدة على الموتوسيكل الكهربائي؟

هي الحقيقة المغامرة دي هتبقى أكبر من رحلة، هي هتبقى جولة لمدة 100 يوم هتغطي 75 مدينة في مصر عشان نتكلم عن قضايا البيئة، وإزاي تصرفاتنا اللي بنعتبرها بسيطة ومش بناخد بالنا منها؛ إزاي بتضر البيئة، وإزاي تغير المناخ بيأثر على حياتنا، كمان أنا حاسس إني محتاج أعرّف الناس أكتر على بلدنا اللي عايشين فيها، أعتقد إنهم لما يعرفوا أكتر عنها؛ هيبقى عندهم استعداد أكبر يعملوا حاجات كويسة عشانها، هيبقى عندهم استعداد يغيروا سلوكياتهم اللي بتضرها.