share this article

زي ما كل حاجة في الدنيا بقت متاحة أونلاين عشان تساعد الناس يتسلوا وهم قاعدين في البيت، المتاحف بقت أونلاين والجولات فيها مش بتخلص، عروض الأوبرا والحفلات والنجوم العالميين اللي مغرقين السوشيال ميديا أغاني، حتى الجناين والمحميات والمواقع الأثرية في حتت كتير في العالم، كل حاجة ممكن تتخيلها بقت متاحة أونلاين؛ بس محتاجة يكون عندك إنترنت كويس وهتقدر تتفسح في أي مكان في الدنيا على كيفك من وإنت قاعد في السرير، ولحد ما نطلع من بيوتنا ونشوف الدنيا تاني هنستمتع بالمزايا اللي العالم إدهالنا، وهناخد جولة في قصور مبهرة؛ ولو معندكش لبس يليق بعيشة الملوك؛ مش مشكلة أهو تاخد فكرة دلوقتي على الإنترنت وتبقى تروح بكرة القصور اللي عجبتك.

1- قصر فرساي - فرنساالمصدر:Encyclopaedia Britannica

أشهر من النار على العلم، وأعتقد يعني هو ده تعريف القصور، وهو أصل تقليعة القصور الفارهة في أوروبا، ومن ساعتها الموضوع وسع أوي بين الملوك وبقت مسابقة مين يعمل قصر أحلى من التاني، المهم القصر ده كان محل إقامة ملك فرنسا من 1692 ولغاية الثورة الفرنسية، وده يخليه غير إنه تحفة معمارية؛ لكن كمان كان جزء من أحداث تاريخية أوروبية وعالمية كتير، ومن أهم وأشهر القاعات فيه قاعة المرايا، أما بقى الجناين فحدث ولا حرج بهرجة ملوك على أصولها، وكل ده موجود أونلاين من خلال Google Arts and Culture هنا.

2- قصر باكنجهام - بريطانيا المصدر:Galerie Magazine

قصر غني عن التعريف، خصوصاً البلكونة المشهورة اللي بتطل منها العيلة المالكة على الشعب وعلينا، في المناسبات والاحتفالات وما إلى ذلك، القصر ده مكان إقامة العيلة المالكة البريطانية من سنة 1837 من أيام الملكة فيكتوريا، وفي أقيم مجموعات اللوحات والتماثيل وأكيد العفش، بس الجولة دي مش هاتاخدك لأماكن أبعد من الجولة العادية لو رحت القصر في الـ10 أسابيع اللي بيكون مفتوح فيهم للعامة في الصيف أثناء أجازة الملكة، بس هتشوف قاعة الرسم، وقاعة الرقص وطبعاً قاعة العرش وقاعات تانية كتير.

3- قصر بيترهوف - روسياالمصدر:Get Your Guide

بيتر الأكبر حب يزوّد على قصر فرساي قام عامل قصر هو كمان، ما الروس مش قليلين يعني، وده بان في القصر لدرجة إنه بيتقال عليه فرساي الروسي، وبعدين ما هو لو حد هينافس آل بربون الفرنسيين هيكون أكيد آل رومنوف الروس، حرب ملوك وأباطرة ملناش دعوة إحنا، المهم إننا طلعنا بحبة قصور نتفرج عليها، وعشان بيتر كان مصمم على الرد القاطع قام جاب "جين ألكساندر لو بلوند" عشان يعمل جناين القصر، عشان هو ساهم مع "أندريه لو نوتر" في جناين فرساي، القصر مبني على مساحة 4000 هكتار، ومليان نوافير مالهاش آخر!

4- قصر سانسوسي - ألمانياالمصدر:Fritzguide

ده كان القصر الصيفي بتاع "فريدريش الأول" ملك بروسيا، والقصر موجود في بوتسدام القريبة من برلين، وطبعاً على غرار فرساي، قلتلك هو أصل التقليعة، بس سانسوسي مش بنفس مستوى العظمة بتاعة الأصل، لأنه دور واحد بس ومش على طراز الروكوكو لكن على الطراز الباروكي، بس لما تعرف إن هو كان معمول عشان الملك يلاقي مكان يريح ويفصل فيه من دوشة البلاط في برلين هتلاقي إنه مناسب ويؤدي الغرض منه، فاسمه أصلاً بالفرنساوي معناه "من غير هموم"، القصر كمان بيعكس العلاقة اللي بين الإنسان والطبيعة فالجناين كمان مبهرة جداً وهتشوف كل حاجة من هنا.

5- قصر أكاساكا - اليابانالمصدر:mbell1975

مبدأياً كده المساحة 15,000 متر مربع عشان بس نقفل الموضوع ده، كان في الأصل قصر من قصور الإمبرطور سنة 1909، ودلوقتي بقى مكان إقامة للزوار المرموقين، واللي بنشوف فيه إن تأثير فرساي وصل لغاية اليابان، فهتلاقي البوابة شبه البوابة، ومع إن ده المبنى الوحيد في اليابان اللي على الطراز الباروكي الحديث، لكن المعمار الياباني الأصيل مالي التفاصيل، هتلاقي فيه حديقة صخرية، وطبعاً الأسقف واطية، لكن هتلاقي فيه الريومات والزينة وحاجات من الطراز الياباني، محاربين ساموراي، آلات عزف، ورمز الإمبراطور، دقق بس وإنت بتتفرج.

6- قصر آغا خان - الهندالمصدر:Kiss from the World

القصر ده بناه السلطان محمد شاه آغا خان التالت في"بيون" في الهند، بس يصادف بقى إن القصر ده كان محبس المهاتما غاندي ومراته، اللي ماتت فيه، فالقصر ده كده كده جزء من التاريخ الهندي، ورمز من رموز الحرية الهندية، والمهاتما لما مات رماده موجود هناك في مكان لذكراه، القصر بقى حاجة كده تردّ الروح بيدخله النور وده اللي خلى المصورين بيحبوا يصوروا فيه، بس لما الموضوع زاد عن حدّه بقى يعمل إزعاج للزوار، وساعتها قرروا يمنعوا كل أشكال التصوير في القصر، بس أنت هتستمتع بجولتك عادي.

7- قصر كويلز - البرتغالالمصدر:Selection Tours

هو كان مكان الإقامة الصيفي للإمبراطور دوم بيدرو اللي بقى الملك لما اتجوز بنت أخته ماريا، مالناش دعوة إحنا هم عيلة في بعضيهم، المهم هي كانت أول ملكة برتغالية بلا منازع وكمان حكمت البرازيل، ماريا بقى كانت معروفة بإنها مجنونة، واسمها ماريا المجنونة، والقصر ده كان المكان اللي عاشت فيه بعد لما جوزها مات وجنانها زاد وكان بيعالجها نفس الدكتور اللي عالج الملك جورج التالت من الجنون برضه، القصر ده هو آخر مبنى أوروبي على طراز روكوكو، وآخر قصر فيه صرف وبهرجة لأنه كان بعد اكتشاف الدهب في المستعمرة البرازيلية، تقدر تتفرج وتحكم بنفسك على البهرجة.

8- قصر مونسيرات - البرتغالالمصدر:Teun Janssen

برضه ده قصر صيفي لذيذ، في سنترا في البرتغال، كان في الأصل فيلا لـ"ميلو كاسترو" حاكم سيلان البرتغالية، بس بعد زلزال لشبونة بقت ما يتعاش فيها كومة من الحطام، وفضلت الملكية تتنقل من شخص للتاني ومنهم كتاب إنجليز، وزارها اللورد "بيرون" اللي كتب عن جمال الفيلا في كتاب Childe Harold’s Pilgrimage، لغاية لما  بقت البيت الصيفي لـ"فرنسيس كوك"، من الأرسطقراطيين الإنجليز، التاريخ الطويل ده والملوك الكتير خلوا القصر بقى خليط بين أكتر من طراز معماري، كل واحد فيهم غير التاني، زي الطراز الموريسكي أو المغاربي،  والقوطية الحديثة بس هتلاقي الطابع الإسلامي غالب لأن المنطقة كلها كانت جزء من غرب الأندلس لغاية القرن الـ13، خدلك لفة بقى.

9- قصر كاسيرتا الملكي - إيطالياالمصدر:MyWoWo

ويرجع تاني فرساي، قصر على غراره من الطراز الباروكي، مكان إقامة ملوك نابولي، مش بس كده لكنه ضمن مواقع التراث العالمي حسب اليونسكو، لو لسة مش منبهر كفاية؛ يبقى خد عندك، القصر يعتبر من أكبر القصور في العالم، مساحته 47,000 متر مربع، خمس أدوار وفيه 1,200 أوضة، تلاقي تنضيفة العيد كانت بتبدأ قبلها بشهر! فيه بقى مكتبة كبيرة، مسرح، و24 بيت صغير كده، والجناين بقى حاجة كده ولا حديقة الأزهر، مساحتهم 120 هكتار ونوافير كتير ماتعدش، ولو لسه مش مقتنع ادخل عشان تتفرج بنفسك، وأحب أقولك كمان في الآخر إن Star Wars متصور فيه.

10- قصر جراند ماستر - مالطاالمصدر:Heritage Malta

ده قصر متواضع؛ يمكن أكتر قصر معقول في الليستة دي كلها، حتى مش زي القصور اللي اتبنت في وقته، رغم إن مساحته مش قليلة في فاليتا عاصمة مالطا، وهو القصر بتاع كبير فرسان القديس يوحنا، حاكم مالطا، مبني سنة 1574،  دلوقتي هو مقر مكتب الرئيس، رغم بساطة القصر من برة بس جوة مش قليل، في قاعة عرش زي أي قصر، ومش ناقصه حاجة ده حتى فيه قاعة نسيج، وبما إن الموضوع فيه فرسان فالقصر فيه مجموعة دروع مبهرة وتعتبر من أقيم القطع التاريخية للثقافة الأوروبية، ادخل متع عينك.

11- قصر شونبرون - النمساالمصدر:Klook

مرة تانية قصر على طراز الروكوكو بس في فيينا، وآل هابسبورج متوصوش وعملوا قصر فيه 1441 أوضة، والقصر ده بقاله 300 سنة فطبعاً السياح بيحبوا أوي يزوروه، بس هو مش طول عمره على الشكل ده، في الواقع هو اتجدد واتعمله نيو لوك على إيد الإمبرطورة الرومانية "ماريا تريزا"، أم ماري أنطوانيت، القصر ده كان هدية جوازها، وأضافت له لمسة الطراز الكلاسيكي الحديث، بعد سنة 1918 ومع سقوط آل هابسبورج؛ القصر تحول لمتحف، خدلك كمان لفة في الجناين أصل هم كمان عاملهم تلميذ أندريه نوتر جين ترهت.

12- قصر بالاو دي مارسيل - أسبانياالمصدر:Museus de Sitges

قصر على البحر حاجة كده خيال، في مدينة سيتجيس، أكتر قصر ملون في الليستة دي، بس الصراحة الفيو بتاع البحر منه تحفة، زي بالظبط كل الألوان اللي جوة، الأوض كلها مبهرة ولها شخصية، ومفيش واحدة شبه التانية، القصر النهارده غير إنه متحف؛ بيتعمل فيه أحداث ثقافية، وممكن الناس تأجره تعمل فيه أفراحها، وأنت ممكن تزوره من هنا.

13- قصر دوجي - إيطالياالمصدر:Wikipedia

القصر ده من أهم معالم البندقية، وكان هو مكان إقامة دوق البندقية، اللي هو كان الحاكم أيام جمهورية البندفية، القصر اتبنى سنة 1340 وبيبص على القناة الأكبر في فينسيا "بياتسا سان ماركو"، القصر ده معندوش جنينة، لكن فيه ساحة كبيرة أوي ومباني القصر حواليها، ومن جوة مش هيخيب ظنك أبداً لأنه مليان رسومات زي كل حاجة في إيطاليا، اتفرج عليه من هنا.

14- قصر مافرا الوطني - البرتغالالمصدر: Wikipedia

الملك "جون الخامس" عمل عهد إنه لما مراته الملكة "ماريانا" تجيب أي طفل هيبني دير، وده اللي حصل لما بنتهم "باربرا" شرفت وبنوا المبنى ده اللي واضح إنه بهوأ منهم فبقى قصر بالمرة مع الدير، ولما القصر خلص بقى هو مقر الإقامة التاني للعيلة وكمان دير للأباء الفرنسيسكان، لما بدأوا المشروع ده كان هيكون حاجة صغيرة بس اللي حصل إنهم اكتشفوا الدهب في البرازيل وده غيّر مجرى الأمور، ومبالغة ما بعدها مبالغة، ووصلت المساحة لـ1213 هكتار، والمسافة بين مكان الملك ومكان الملكة كانت 200 متر وكانوا بيضربوا بالأبواق عشان تعرف إن هو جاي، حاجة كده زي اللي بنشوفها في الأفلام بلاط ملكي بحق، خدلك بقى لفة بس اوعى تتوه، ده جوة القصر، وده من برة.

وفي النهاية نحب نشكر من كل قلبنا Google Art and Culture على المبادرة العظيمة الفخمة دي.