share this article

وأخيراً بعد سنين بنعدّي عليه في شارع صلاح سالم رايح جاي بكل فضول وانبهار عشان ندخل نتفرج عليه؛ قصر البارون هيكون مفتوح للزيارة من أول أكتوبر 2019.

عملية ترميم وتجديد القصر كانت بدأت في أغسطس 2017، واتكلفت حوالي 100 مليون جنيه، ورغم إنها أثارت الجدل شوية على السوشيال ميديا لما الناس شافت ألوان القصر من برة وبدأت تظهر اعتراضات على شكل التجديد اللي حصل، إلا إن وزارة الآثار أكدت إن اختيار الألوان كان بعد أبحاث طويلة ومطابقات لصور قديمة للقصر، ده غير المطابقات اللي تمت على أجزاء من القصر قدروا يعرفوا منها اللون الأصلي.

على مدار السنين اللي فاتت؛ القصر مهجور ومبيحصلش فيه حاجة غير جلسات تصوير من وقت للتاني أو ايفينتات في جنينة القصر؛ غير كام فيلم وكام فيديو كليب اتصوروا فيه على مدار السنين، لكن القصر نفسه من جوة كان عليه علامات استفهام كبيرة وقصص وأساطير بيحكوها الناس عن أشباح بتسكنه؛ بعد حادثة الوفاة الدرامية اللي حصلت لزوجة البارون إمبان صاحب القصر لما وقعت من على السلالم وماتت.

المصدر: Egyptian Streets