share this article

قصر البارون بقاله شهور مقفول عشان بيترمم، والناس كلها مستنياه يتفتح عشان يقدروا يزوروه ويشوفوه بالتعديلات الجديدة، ووزير الآثار الدكتور خالد العناني قال إن مفروض أعمال الترميم هتخلص مع نهاية شهر ديسمبر بشكل كامل، ويعدها هيكون جاهز لافتتاحه.

القصر هيكون فيه معرض بيحكي تاريخ مصر الجديدة من أول أيام العاصمة القديمة لحد النهار ده، وهيكون فيه كمان عربية ترام عشان الأجيال الجديدة تقدر تشوف أول عربية لترام مصر الجديدة.

وخلال زيارة للوزير مع وفد من البرلمان، قال إن ترميم قصر البارون شارك فيه وزارات وهيئات كتير تحت إشراف الهيئة الهندسية للقوات المسلحة ووزارة الآثار، وبتعاون من مجلس النواب اللي دعى لزيارة تفقدية للمتحف القومي للحضارة المصرية في الفسطاط، واللي الوزارة بتستعد عشان تفتح قاعتين جواه في يناير الجاي.

وخلال الزيارة برده، الوزير قال إن الشركة المسؤولة عن الأهرامات بدأت في التعاقد مع شركات لتطوير الخدمات والمسارح والكافتيريات والحناطير، وأكد إن شكل منطقة الأهرامات هيتغير تماما في 2020 بالتزامن مع افتتاح المتحف المصري الكبير.

المصدر: Egypt Today