share this article

كام مرة رحت مكان أو مدينة في مصر وانبهرت بيها وبجمالها وقلت جملة: "ليه ميصوروش فيلم ولا مسلسل أو حتى إعلان في مكان زي ده؟!" - يمكن الموضوع ده ابتدى يلفت نظرنا من وقت دخول المسلسلات التركي اللي بيعرفوا دايماً يبهرونا بكل حتة فيها، وده بالظبط اللي فرقة "كايرو ستيبس - Cairo Steps" قرروا يعملوه لما اختاروا قمة جبل سانت كاترين عشان يصوروا فيها فيديو كليب "دهب" من الألبوم الجديد بتاعهم.

كايرو ستيبس هي فرقة موسيقية مصرية عمرها 20 سنة في المجال، لكن يمكن مش ناس كتير عارفاهم من زمان لأن معظم حفلاتهم برة مصر تحديداً في أوروبا وألمانيا وأعضاء كتير من الفرقة أجانب، رغم إن مؤسس الفرقة هو عازف العود المصري باسم درويش، اللي قدر يكون أول عازف عود من مصر والشرق الأوسط يفوز بجايزة موسيقى الجاز الألمانية عن ألبومهم الأخير "Flying Carpet".

وعشان هما عندهم الفرصة إنهم يمثلوا مصر في الحفلات الكتير اللي بيعلموها في كل حتة في العالم، قرروا إن التمثيل ده يكون له أثر إيجابي يشجع على السياحة في مصر وتحديداً من قلب سيناء، وفعلاً صوّروا جزء من الكليب على قمة أعلى جبل في مصر "سانت كاترين"، وبقية الكليب هيكون تصويره بين دهب ونويبع وطابا.

المصدر: youm 7