share this article

فيه كلام كتير أوي اتقال بيحاولوا يوصفوا بيه الموسيقى وتأثيرها، من ضمن أكتر الجمل اللي بحبها أوي مقولة للكاتب والفيلسوف الإنجليزي "ألدوس هكسلي": "After Silence, that which comes nearest to expressing the inexpressible is music"، واللي معناها إنك لما تبقى في موقف مش عارف تلاقي كلام تعبر بيه أو حاجة تقولها بيبقى أدامك حاجة من اتنين: الصمت كأول اختيار أو المزيكا!

أعتقد في الوقت اللي إحنا فيه ده الموضوع مش اختياري، مفيش أدامك فعلاً غير الصمت؛ عشان الكلام كتر أوي والتهويل زاد عن حدّه، ويمكن كمان الوضع العالمي اللي مش مفهوم بيسيب مجال لإبداعات الناس الفاضية إنها تفتي، والاختيار التاني اللي أدامك هو المزيكا، وحتى في دي معندكش حجة، عشان مش هنقولك افتح اليوتيوب واسمع أجمل أغاني التسعينات -مع إن دي فكرة حلوة طول الوقت- لكن دلوقتي بقى عندك فرصة تسمع أغاني ومزيكا وتحضر حفلات وأوركسترا وأوبرا من كل حتة في العالم بس وإنت قاعد في بيتك.

دار الأوبرا الملكية البريطانيةالمصدر: Royal Opera House

الأوبرا الملكية في لندن عاملين حاجة ظريفة أوي؛ كل الحفلات وعروض الباليه والأوركسترا سواء لو حاجات قديمة أو عروض لسه هتتعمل؛ هتبقى متاحة للناس يتفرجوا عليها مجاناً يا إما على صفحة الفيسبوك أو قناة اليوتيوب بتاعتهم، غير كده بقى بيعرضوا فيديوهات كمان "خلف الكواليس"، استعدادات الموسيقيين وراقصي الباليه، وحتى بيحطوا فيديوهات على الفيسبوك إزاي أعضاء الفريق بتاعهم بيقضوا وقت الحظر في البيت وبيعملوا تدريباتهم إزاي، يعني الموضوع مسلّي جداً ولذيذ سواء هتتفرج على عرض موسيقي أو تشوف الناس وهي بتتدرب وتستعد للحفلة.

أوبرا متروبوليتان نيويوركالمصدر: New York Post

رغم إن الأوبرا مقفولة بس أعلنوا من نص مارس إن كل يوم بالليل هيكون فيه عروض متاحة مجاناً لأحلى حفلات أوبرا معروفة على مدار 14 سنة فاتوا، من ضمنهم أوبرا "كارمن" وعروض لـ"تشايكوفسكي" و"فيردي". جدول العروض موجود على الموقع بتاعهم، وبيبدأوها الساعة 7:30 مساء بتوقيت شرق أمريكا (يعني 1:30 الصبح بتوقيت مصر) بس الميزة إنك مش لازم تسهر عشان تتفرج لأن الفيديوهات بتفضل متاحة لحد تاني يوم قبل بداية العرض الجديد.

أوركسترا برلين المصدر: Getamped

أوركسترا برلين بتتصنف دايماً إنها من أحلى العروض الموسيقية اللي ممكن تشوفها في العالم، وطبعاً خلاص عرفنا إن مفيش حاجة فاتحة في الكوكب؛ فالبديل إنهم أتاحوا أكتر من 600 عرض موسيقي وغنائي على الموقع أونلاين؛ وفي العادي بتبقى باشتراك شهري بس عاملينها مجاناً لمدة شهر عشان الناس تفك عن نفسها شوية بالمزيكا، المهم تلحق تاخد الاشتراك المجاني ببرومو كود BERLINPHIL قبل يوم 31 مارس.

مسرح برودواي المصدر: Playbill

طبعاً ده واحد من أهم وأشهر المسارح في العالم، ومن أهم مزارات نيويورك، ومن قبل هجوم فيروس كورونا من سنة 2015؛ برودواي عملوا موقع أونلاين اسمه BroadwayHD.com حاجة كده زي مكتبة لكل العروض الموسيقية والمسرحيات وحفلات الأوبرا اللي بتتعمل على المسرح، هدفهم منها إنهم يخلوا المسرح حاجة سهلة لكل الناس بتوصل لبيوتهم لو مش قادرين يروحوا المسرح أو طبعاً لو في بلد في آخر الدنيا مش مشوار فركة كعب.

هتلاقي عروض كتير أوي من أول الكلاسيكيات زي "بيتر بان" و"بحيرة البجع"، وحفلات أوبرا أجنبية كمان من أوروبا وروسيا، وحفلات وعروض قديمة .. وخليني هنا أقولك إن عندك فرصة عظيمة تتفرج على ميرل ستريب على المسرح سنة 1981 في النسخة الموسيقية الراقصة من "أليس في بلاد العجائب"؛ حاجة كده مايجيش في دماغنا أبداً إننا نقدر نتفرج عليها. العروض دي كلها متاحة على الموقع لمدة 7 أيام تجربة مجانية، وبعدين اشتراك شهري 10 دولار (يعني حوالي 160 جنيه مصري).

أوركسترا ملبورن المصدر: Chicago Stage Standard

يوم 16 مارس كان الجمهور على موعد مع سيمفونية "شهرزاد" للموسيقار الروسي "ريمسكي كورساكوف"، ولما حصل قرار وقف العروض وقفل المسارح والسينمات عشان منع انتشار فيروس كورونا في أستراليا؛ أوركسترا ملبورن قرروا إنهم هيكملوا وشافوا إن ده أنسب وقت يطبقوا فيه مقولة The show must go on، لأن الموسيقى هتكون هي الوسيلة الوحيدة اللي تجمع الناس على حاجة حلوة في وقت اتفرض عليهم كلهم وباء عالمي، وفعلاً طلعوا على قناتهم على اليوتيوب وشفنا المسرح فاضي، والمذيع قال في المقدمة إنه بدل ما انتو اللي تيجوا المسرح تتفرجوا، إحنا اللي هانجيلكم لحد البيت.

العرض متاح لأي حد يتفرج عليه، وقريب هايعلنوا عن عروض جديدة على قناة اليوتيوب بما إن الوضع مكمل لحد نص أبريل ويمكن أكتر كمان.

أوركسترا فانكوفر السيمفوني المصدر: Wikipedia

نفس الكلام اللي حصل في ملبورن حصل زيه بالظبط في فانكوفر في كندا، كان عندهم حفلة يوم 15 مارس؛ ومش أي حفلة، ده مهرجان سيمفونيات "بيتهوفن"، عشان كده قرروا يعرضوا الحفلة لايف على صفحة الفيسبوك بتاعتهم، والحفلة متاحة تقدر تتفرج عليها عبارة عن ساعتين إلا ربع من عظمة وإبداع السيمفونية الرابعة والسادسة لبيتهوفن، غير كمان حفلات تانية مواعيدها في أبريل بس لسه ما أعلنوش تفاصيلها، تابعوا صفحتهم على فيسبوك عشان تعرفوها أول بأول.

أوبرا فييناالمصدر: The Times

لو دوّرت على ليستة أجمد أوبرا في العالم؛ دايماً هتلاقي دار أوبرا فيينا في أول كام رقم في الليستة، الأولى بقى أو التالتة أو الخامسة حسب كل تصنيف بس المهم إن فيه إجماع إنها ضمن الأهم والأحلى في العالم، والكلام ده على المكان نفسه كمبنى عريق ومبهر بكل تفاصيله، وعلى الأوركسترا والعازفين وراقصي الباليه بتوعهم، واللي عندك فرصة تتفرج على عرض كل أسبوع موجودة من الاتنين ليوم الأحد؛ من ضمن عروض أرشيفية أونلاين على الموقع بتاعهم، والكلام ده متاح لكل الناس مجاناً.

أوركسترا لندن السيمفونيالمصدر: Pinterest

أوركسترا لندن بعد ما لغوا الحفلات الجاية كلها؛ نقلوا على قناة اليوتيوب، وقالوا إن خلال الفترة الجاية هيعرضوا حفلات موسيقية كتير وفيديوهات وكمان خلف الكواليس ولقاءات مع أعضاء الأوكسترا، والمختلف عندهم كمان إنهم بدأوا ينزلوا فيديوهات تعليمية أو فيها معلومات عن طرق العزف المختلفة وشوية مفاهيم وتعريفات فنية مفيدة حتى لو حد مش موسيقي ومش دي شغلته، بس معلومات عامة حلوة لأي حد مستمع ومتفرج عادي.

أوركسترا شنجهايالمصدر: Shanghai Daily

برغم من تربعهم على قمة ليستة انتشار فيروس كورونا على مستوى العالم، لكن المزيكا مش هتقف في الصين مهما حصل، وده اللي خلّى جزء من أوركسترا شنجهاي يعملوا حفلة على صفحة الفيسبوك؛ وحتى طالعين يعزفوا بالكمامات على وشهم، وأعلنوا كمان إن الصفحة هتنشر حفلات من الأرشيف مع شوية حفلات جديدة لسه ما أعلنوش وقتها لكن بيعروضوا كمان فيديوهات من تدريبات الفريق والبروفات.

TogetherAtHome#المصدر: HelloMagazine

خلال سنة 2020 كان فيه نجوم كتير عندهم حفلات وجولات غنائية طبعاً كلها اتلغت لو وقتها قريب؛ أو حتى لو مواعيدها لسه بعيدة فالوضع مش مفهوم هيبقى ايه الحقيقة، البديل إنهم عملوا هاشتاج على السوشيال ميديا بالتعاون مع منظمة الصحة العالمية ومنظمة Global Citizen؛ والهاشتاج ده TogetherAtHome# (يعني مع بعض في البيت)؛ أهو عشان يشجعوا الناس تقعد في بيتها وتقلل من انتشار الفيروس؛ وفي نفس الوقت يسلّوهم في العزل المنزلي. على الهاشتاج بقى هتلاقي كريس مارتن مغني باند Coldplay عامل قعدة لايف بيغني ما يطلبه المستمعون، جون ليجيند هو كمان طلع لايف على انستجرام وقعد يغني، ونجوم كتير أوي ما بين تويتر وانستجرام، غير الفيديوهات اللي بيعملوها وهم بيغنوا ويلعبوا مزيكا. تابعوا الهاشتاج كل يوم على انستجرام وعلى تويتر عشان هايحسسكوا إنكم عايشين مع الناس دي في بيتها.

Opera Visionالمصدر: OperaVision

لو كل اللي فوق ده بقى مش كفاية؛ عندك موقع OperaVision عاملين شراكات مع 29 دار أوبرا ومسرح من 17 بلد، هتلاقي مسرحيات وعروض موسيقية ما بين القديم اللي في الأرشيف بتاعهم، أو حفلات جديدة بيعلنوا عنها في الموقع، وكل ده مجاني ومتاح تتفرج عليه في أي وقت .. يكفيك في الحظر وما بعد الحظر كمان.

Together بالعربيالمصدر: Massar Egbari

زي ما فيه نجوم عالميين بيطلعوا لايف ويغنوا للجمهور ويعملوا حفلات، فيه نجوم مصريين وعرب كتير عملوا نفس الموضوع، من ضمنهم فرقة مسار اجباري اللي عملوا "الحفلة في البيت" على قناة اليوتيوب بتاعتهم وغنّوا كمان في آخرها أغنية جديدة، وفنانين زي علي الحجار وعزيز مرقة وتامر عاشور، وحتى وزارة الثقافة المصرية ودار الأوبرا اللي أعلنوا عن مبادرة من خلال القناة الجديدة على يوتيوب؛ وهيبدأوا البث التجريبي بتاعها يوم 24 مارس بعرض حفلة أم كلثوم بتقنية الهولوجرام، وأعلنوا كمان عن حفلات تانية كتير لعمر خيرت وعرض الليلة الكبيرة وكمان عرض "بحيرة البجع" لفرقة الباليه الملكي الروسي.