share this article

العالم كله مستني افتتاح المتحف المصري الكبير في 2020؛ اللي هيكون أكبر متحف في العالم ومن أهم المشاريع الحضارية والأثرية، وطبعاً الإعلانات أو الترويج لمشروع زي ده هي اللي بتجذب السياح في كل حتة عشان يعرفوا اللي بيحصل ويبدأوا يحطوا المتحف الجديد في الـbucketlist بتاعتهم وييجوا يزوروه.

عشان كده من ضمن الشراكات اللي عملتها وزارة السياحة كانت شراكة مع قنوات Discovery العالمية اللي هتنتج 3 أفلام ترويجية عن المتحف المصري الكبير، وتعرضهم على القنوات المختلفة بتاعتها السنة الجاية قبل افتتاح المتحف، القنوات اللي من ضمنها Discovery Channel - TLC - Travel Channel، وطبعاً مواقع السوشيال ميديا بتاعة القنوات اللي بتتشاف في كل حتة من آسيا لحد أوروبا وأمريكا.

وفي واحد من ضمن الأفلام التلاتة اللي هيتعرضوا هيكون فيه لقاء صوّروه فعلاً مع وزيرة السياحة د. رانيا المشاط، واللي اتكلمت عن المتحف ووضحت كمية المعروضات اللي هتكون فيه زي المجموعة الكاملة لمقتنيات الملك توت عنخ آمون اللي عددهم تقريباً 5000 قطعة أثرية، غير تمثال الملك رمسيس التاني اللي اتنقل من أدام محطة مصر سنة 2006 وهيكون أول حاجة بتستقبل السياح وزوار المتحف أول ما يدخلوا المكان.

المصدر: Egypt Independent