share this article

عالم الأفلام والبرامج الوثائقية ده بالنسبالنا عالم كبير أوي ومش بيخلص، فيه ناس من وقت للتاني كده تحب تاخدلها فيلم وثائقي وسط الأفلام العادية والمسلسلات بتاعة نتفليكس اللي بتتفرج عليها، وفيه بقى الناس القديمة الخبرة في الموضوع، الناس اللي قبل نتفليكس كانت بتقعد تطبّق وثائقي ورا التاني على ناشيونال جيوجرافيك أبو ظبي، هتلاقيهم عارفين علم البسطاء، وكوارث عالم الطيران، وسمكة التونة العملاقة، هياكل نازية عملاقة وعلى رأس القائمة أبوكليبس الحرب العالمية الأولى والتانية، طبعاً عارفين أسرار مقبرة توت عنخ آمون الموضوع مش محتاج سؤال، المهم لوعايز تاخد فكرة عن العالم ده فده الوقت بما إنك قاعد في البيت واعتبرها هواية جديدة لو عجبتك كمل فيها، ودي فرصة ما تتعوضش إنك تجرب؛ عشان كده هنقولك اقتراحات خفيفة لطيفة شيقة لها علاقة بالسفر وموجودة على نتفليكس ومواقع تانية زي فيميو وأمازون.

(Dark Tourist (2018المصدر: Scribd

اه الاسم غريب بس كمان عشان هو مش نوع سياحة معتاد، العادي إن الناس بتروح تشوف معالم البلاد والأماكن المشهورة، بس فيه نوع سياحة بيكون هدفه إنك تزور الأماكن اللي وراها قصة قتل، أشباح، مصاصي دماء، حاجات من دي؛ وده بالظبط اللي عمله ديفيد في البرنامج، 8 حلقات بيروح أماكن مختلفة بقصص مختلفة من قبائل عبدة الموت في المكسيك، لمصاصي دماء في نيو أورلينز، وإشعاع في فوكوشيما، وإنت وقوة تحملك يا هتترعب يا إما تعرف رحلتك الجاية شكلها إيه، وآدي طريق البداية على نتفليكس

(Expedition Happiness (2017المصدر: Pinterest

عارفين الـcouple الفني اللطيف اللي عايشين بالطول والعرض وبيعملوا رحلات طويلة وكل ليلة في مكان مختلف، هو ده بقى الوثائقي، بيشتغل في الأفلام وصاحبته بتشتغل في المزيكا ومعاهم كلب، وحوّلوا باص مدرسة قديم لبيت متنقل وبيلفوا أمريكا الشمالية كلها وتقدر تتابع رحلتهم دي.

(Street Food (2019
المصدر: Decider

من صناع Chef’s Table، هم أخدوا الموضوع للشارع، فالبرنامج ده بيلف في شوارع آسيا ويستكشف البلاد من أكل الشارع، فهتلاقي نفسك في سنغافورة والهند وتايلاند وكل مكان تتخيله، وبتعرف البلد وشعبها من أكلهم، بس وإنت بتتفرج خلي جنبك أكل عشان هتجوع طبعاً، إحنا لسة مستنين الموسم التاني بس إيه اللي ممكن يعلّي على آسيا؟ لغاية ما ينزل ممكن تتفرج على الموسم الأول من هنا.

(The Kindness Diaries (2017-2019المصدر: PG Daily News

ده مسلسل وثائقي بيحكي عن ليون اللي كان شغال سمسار وقرر إنه يسيب شغله ويلف العالم، تقريباً ده حلم مشترك ما بينا كلنا، هو كان حاسس إنه مفيش حاجة تستاهل يصحى عشانها الصبح ومكتئب، فساب شغله وأخد موتسكل قديم عنده وانطلق، فيلم The Motorcycle Diaries كان هو إلهامه للرحلة دي، واختار إنه يعتمد على طيبة الناس الأغراب اللي هيقابلهم في الطريق، وبعد نجاح الموسم الأول عمل ده تاني في قارة أمريكا الشمالية، وبرضه كان معتمد على الأغراب في الأكل والبنزين والمبيت وكل حاجة، مش بس طريقة الناس وطيبتهم هي اللي هتطمن قلبك وإنت بتتفرج لكن كمان الطرق اللي ليون اختار يرد بيها الجميل، تقدر تتابع الرحلة دي من هنا.

(Restaurants On The Edge (2020
المصدر: Fine Dining Lovers

البرنامج ده عبارة عن فريق من الخبراء بيروحوا لمطعم على حافة الإنهيار والإفلاس والخراب، وبيعملوا للمطعم نيو لوك، والنيولوك ده على 3 مستويات، المستوى العملي للإدارة وكده، وطبعاً التصميم المعماري للمكان، وأكيد الأكل والمنيو، الخبرا دول الأول بيشوفوا المكان، الثقافة، المطبخ، والمعمار عشان مايعملوش نشاز يعني بعيد عن الموضوع والسياق، وبعدين يبدأوا رحلة التغيير، بس مش بس المطعم مهنياً على الحافة، هي كمان مواقع المطاعم بتكون على حافة، جبل بقى بحيرة، بحر يعني بيكون ليها فيو بياخد العقل، وكل التجارب دي من دول مختلفة موجودة على نتفليكس.

(Antarctica: A Year On Ice (2013المصدر: Amazon

لو كل اللي تعرفه عن القطب الشمالي هو البطاريق والدببة، فالفيلم ده هيديك لمحة عن حياة الناس هناك لمدة سنة، في شتا على طول مش بيرحم، وشهور ضلمة ولما الشمس بتهل بطلتها البهية مش بتغيب، إنت بقى من تحت بطانيتك هتشوف العلماء عايشين هناك إزاي وهتمتع عنيك بمناظر مستحيل تشوفها تاني أبداً غير لو رحت القطب بس لغاية الرحلة دي اتفرج على الفليم ده من على Vimeo.

(Mountain (2017المصدر: Salt Magazine

طبعاً معظمنا بينهج لما بيطلع السلم، وبنفكر إزاي في ناس بتطلع الجبال، وده عالم يمكن يكون بعيد عنا في الواقع، لكن الفيلم ده هيخليك قاعد في قلبه، وتفهم ليه الناس دي بتعمل ده، وبتطلع جبل ورا التاني، وبقت الجبال العملاقة دي بالنسبة لهم تكوينات جميلة في الطبيعة، والخوف من المرتفعات هو تحدي بيهزموه، المخرج والمتسلقين هيفرجوك على قمم العالم وإنت على الكنبة من خلال نتفليكس.

(Jack Whitehall: Travels With My Father (2017 - Presentالمصدر: Lifestyle Asia

تفتكر إنت تقدر تسافر مع أبوك؟ "جيك وايتهول" بيعملها، هو قرر إنه ياخد أبوه ويعملوا مغامرة حوالين العالم، إنت طبعاً لو سافرت مع أهلك وكلنا عملنا كده هتكون متخيل كم الإختلافات بين الجيلين، وكل الصراعات والخناقات اللي هيواجهها "جيك"، بس الصراحة الموضوع ممتع لما بتكون بتتفرج عليه مش عايشه وبيحصلك، هم عملوا 3 مواسم من البرنامج لفوا جنوب شرق آسيا، أوروبا، أمريكا، وطبعاً علاقتهم اتغيرت كتير ولسه هتتغير أكتر، ممكن تتابع مغامرات الأب وابنه من هنا.

(Breakfast, Lunch and Dinner (2019المصدر: Bustle

ما هو إحنا بنحب الأكل وقعدة البيت بتحب الأكل، والسفر بيحلى بالأكل، المهم البرنامج ده كإنه نسخة من برنامج "الأكيل" اللي بييجي على سي بي سي سفرة، مراد مكرم خواجاتي، وطلبت معاه إنه يتعرف على مطابخ العالم المختلفة ويشوف ثقافة البلد من خلال كل ده، هو مش بيكون لوحده لكن كل حلقة بيكون فيه حد مشهور معه بيستكشفوا المدينة سوا، لف من مراكش، لفانكوفر، وطبعاً آسيا، ده الوقت اللي تسيب فيه سي بي سي سفرة وتتنقل للعالمية على نتفليكس.

(The Maidentrip (2013المصدر:Film Forward

الفيلم ده عن "لورا ديكر"، بنت عندها 14 سنة قررت تبحر حوالين العالم، هي أصغر إنسان يعمل ده، إنه يبحر حوالين العالم لوحده، فدي تجربة مش موجودة في أي حتة ومش عايزها تفوتك، المهم الرحلة دي أخدتها في كل حتة طبعاً ونقطة البداية والنهاية بتاعتها كانت "سانت مارتينز"، حاجة مبهرة وملهمة إنك تشوف حد في السن ده بيلف العالم لوحده، وبيلقط صور للعالم وقصته، الوثائقي ده موجود على Amazon.