share this article

من أكتر الحاجات اللي الشعب المصري معروف بيها هي حبه للمزيكا. من الشيخ إمام وعبد الوهاب لكايروكي ومسار إجباري، مصر كان دايمًا فيها موسيقى متنوعة ومميزة ومعبرة عن حال البلد. هتلاقي أغاني ثورية، وأغاني قومية، وهتلاقي أكتر حاجة أغاني عن الحب والوداع عشان الشعب المصري حساس بطبعه. مهما كان الناس متضايقين ومهمومين، هتلاقي حفلات ومهرجانات موسيقية برضه وناس مبسوطة بالمزيكا، ولو إنت في مصر في وقت واحد من المهرجانات دي، جرب روح وشوف حب المصريين للمزيكا وازاي هي بتعبر عن مزاج البلد.

CAIRO JAZZ FESTIVALالمصدر Cairo Jazz Festival

مهرجان القاهرة للجاز اتعمل أول مرة سنة 2009 للإحتفال بنوع مميز جدًا من الموسيقى، الجاز. النوع ده بيجمع بين أنواع كتير جدًا زي البلوز، والموسيقى الكلاسيكية، وأنواع تانية كتير. على الرغم من كونه من أشهر أنواع الموسيقى عالميًا، الجاز مش معروف اوي في الشرق الأوسط. وده سبب كمان إن المهرجان ده اتعمل. مهرجان القاهرة للجاز بيجمع فنانين من أنحاء العالم في مكان واحد في القاهرة، وكل واحد منهم بيقدم نوعه المميز من الموسيقى. في أنواع كتير مختلفة من الجاز بتتقدم، زي جاز بنكهة شرقية مع أدوات زي الربابة، وجاز بنكهة أسبانية مع الجيتار، وغيرهم كتير. لو إنت من محبي موسيقى الجاز، مش هتحب تفوت المهرجان ده، السنة دي هو من 11 ل 13 أكتوبر في الجامعة الأمريكية في التحرير، و في شوية عروض زيادة في كايرو جاز كلوب.

CHILL O’POSITE

المصدر NextusJo

لو مش بتحب الجاز وليك في الموسيقى الإلكترونية، الايفينت ده مناسب ليك جدًا. ده ابتدى سنة 2017 وبيجمع فنانين وDJS من بلاد مختلفة في المنطقة زي لبنان والأردن والإمارات ومصر. لمدة 4 أيام الناس بترقص وتستمتع بالمزيكا في واحدة من أحلى مدن العالم، دهب، على خلفية متتنسيش من البحر والجبال، الايفينت ده مناسب جدًا للي حابب يسترخي وينبسط بمزيكا حلوة وسط طبيعة جميلة. السنة دي اتعمل من 22 ل 25 أغسطس.

مهرجان الصيف الدولي بمكتبة الإسكندريةالمصدر Bibliotheca Alexandrina

المهرجان السنوي ده بقاله 16 سنة بيتعمل في مكتبة الإسكندرية. عادة بيتعمل في يوليو وأغسطس وبيستضيف فرق من العالم كله بيقدموا عروض متنوعة من مزيكا ومسرح وبيقعد لمدة شهر وبيحضره آلاف.

SANDBOX FESTIVAL

المصدر Nacelle

ساندبوكس مهرجان سنوي بيتعمل على البحر في مدينة الناس الأغنياء الجونة - هتلاقي في وقتها نص سكان القاهرة اختفوا فجأة. ساندبوكس ابتدى سنة 2013 وكبر بسرعة عشان يبقى واحد من أكبر مهرجانات الموسيقى الإلكترونية في المنطقة وبيجيله ضيوف وDJS  من أنحاء العالم مش مصر والمنطقة بس. السنة دي اتعمل في مايو لمدة 3 أيام والجمهور الكبير استمتع بالبحر والأنشطة المختلفة اللي ممكن تتعمل فيه وإنت بتسمع المزيكا.

مهرجان الطبول

المصدر خالد فوزي

مهرجان الطبول ده بيتعمل سنويًا في القاهرة لمدة 6 أيام في شارع المعز والقلعة. في المهرجان المجاني ده، فرق شعبية من أنحاء العالم بيقدموا عروض مختلفة من نفس البلد (مصر مثلًا السنة دي كان ليها 6 فرق من النوبة وبورسعيد ومدن تانية). في كمان معرض فيه مشغولات يدوية من كل الدول المشاركة. السنة دي في سنته السادسة، مهرجان الطبول اتعمل في أبريل وحضره آلاف وكان فيه مشاركين من 22 دولة بيقدموا عروض مُعبرة عن تاريخهم وثقافتهم.

عيد الصلح

المصدر صلاح المصري

عيد الصلح مش مهرجان موسيقى بالمعنى التقليدي، هو احتفال وبيبقى فيه موسيقى وأناشيد وأدعية دينية. في أكتوبر من كل سنة لما القمر بيبقى مكتمل، عيد الصلح –أو عيد السياحة أو عيد االسلام- في واحة سيوة بيتعمل لمدة 3 أيام متتالية على جبل دكرور. الاحتفال ده أصوله بترجع لأكتر من 160 سنة لما قبائل سيوة اتحدوا وتصالحوا بعد سنين من الصراع، من ساعتها وهما بيتجمعوا كل سنة في نفس الوقت عشان يحتفلوا بالحصاد والسلام والسياحة. في الإحتفالية دي، كبار القبائل بيجتمعوا عشان يحلوا أي خلافات حصلت على مدار السنة اللي قبلها وبيعملوا كده بعد الحصاد علشان لو في حد مديون يعرف يسدد للي مديون له.  بعد كده بيبقى في وليمة كبيرة واحتفالات بمشاركة أهل سيوة. الاحتفال ده بيجذب سياح كتير بيبقوا عايزين يحضروا المناسبة دي ودايمًا أهل سيوة بيرحبوا بيهم ويضايفوهم.

FÊTE DE LA MUSIQUE

المصدر Institut Francais Egypte

معروف كمان ب"يوم الموسيقى"، المهرجان ده ابتدى في فرنسا سنة1982 - وانتشر لأكتر من 120 دولة ومنهم مصر سنة 1992- بهدف نشر حرية التعبير والإبداع والسعادة. مش هتحتاج تكون بتعرف فرنساوي عشان تحضر الايفينت ده، عشان بسيتضيفوا فنانين من مختلف دول العالم وبيقدموا أنواع موسيقى مختلفة زي البوب والروك وغيرهم. السنة دي اتعمل في شهر يونيو، في الأزهر بارك وفي الأسكندرية، المهرجان ده مشروع مشترك بين المعهد الفرنسي في القاهرة والسفارة الفرنسية.

مهرجان الموسيقى العربية

المصدر Egypt Today

المهرجان السنوي ده بيتعمل في دار الأوبرا في أكتوبر ونوفمبر. فنانون من مختلف الدول العربية بيشاركوا في المهرجان اللي بيقعد حوالي أسبوعين، مع سيمفونيات وكورال وأكتر من أداء فردي هيعجبوا مختلف الناس. السنة دي هي النسخة ال27 من المهرجان.

METAL BLAST
المصدر Mennatullah Hossam

لو بتحب أنواع الموسيقى الأعنف شوية ، لحسن الحظ محبي موسيقى الميتال مبقوش يعتبروا عبدة شياطين وزناديق في مصر. ميتال بلاست واحد من أقدم حفلات موسيقى الميتال في مصر وقدموا أكتر من 10 عروض في ال9 سنين اللي فاتوا. الحفلة دي بتدي فرصة للفنانين الصاعدين في البلد إنهم يعرضوا مزيكتهم على الناس اللي بتحب الميتال في مصر، وساعات بيبقى فيه فنانين مشهورين من بره مصر زي باند  Swallow the Sun. السنة دي اتعمل في مايو في ساقية الصاوي.

مهرجان سماع للإنشاد الصوفي و الموسيقى الروحية

المصدر Dai Nada

المهرجان ده مختلف عن اللي فاتوا، وبيركز على الموسيقى الروحية زي الإنشاد الصوفي والكورال المسيحي. مهرجان سماع بيجمع مجموعة مختلفة من الفنانين من أنحاء العالم كل سنة احتفالًا بالسلام والروحانية. عادةً بيتعمل في سبتمبر والسنة دي كان في ٢٤ سبتمبر، في كذا مكان زي القلعة وقبة الغوري ومسرح الهناجر بدار الأوبر وشارع المعز.

مهرجان ونس للموسيقى الشعبية

المصدر El Mastaba Center

المهرجان ده ابتدي سنة 2014 بهدف نشر الوعي عن والتقدير لأهمية الموسيقى الشعبية في مصر والعالم. مركز المصطبة للموسيقى الشعبية المصرية هو اللي عمل المهرجان ده بهدف الحفاظ على التراث الشعبي المصري وتوثيق تطوره. السنة دي هيتعمل يوم 9-11 نوفمبر في مكان مش معلن لسه.

Music Park
المصدر أحمد عمرو

ده مهرجان ابتدى في سبتمبر 2017 واستضاف فرق كتير مشهورة في المنطقة الأيام دي زي مشروع ليلى، والمربع، وشارموفرز. السنة دي هيتعمل في 5 أكتوبر في كايرو فيستفال سيتي وهيبقى فيه فرق تانية زي جدل وأخر زفير ومسار إجباري، وفنانين تانيين كتير.

محكى القلعة
المصدر أخبار اليوم

ده مهرجان بيتعمل في الصيف كل سنة وبيبقى في قلعة صلاح الدين. وقت المهرجان، القلعة كلها بتنور وبيبقى شكلها جميل. بييجي فنانين كبار زي إيهاب توفيق، علي الحجار، هشام عباس، نسمة محجوب، وياسين التهامي، وأنغام وكمان فرق من بلاد مختلفة.

Sound Clashالمصدر Red Bull

دي حفلة بتظمها Red Bull وبيبقى فيها فرق بيواجهوا بعض في منافسة موسيقية، في 2017 كان مسار إجباري وشارموفرز واتعمل في Dandy Mall.

Red Bull Fel Share3المصدر Red Bull

ده كمان مهرجان بتنظمه Red Bull بس بيتعمل في كذا محافظة، منهم القاهرة والإسكندرية، ويبيبقى فيه كذا باند زي المربع ومسار إجباري واوتوستراد. المهرجان السنة دي اتعمل في كايرو فيستيفال سيتي.

في مهرجانات تانية حابين نشوفها راجعة تاني في المستقبل زي مهرجان عالجنوب اللي كان بيتعمل في Somabay على البحر المتوسط وكان بيقعد 3 أيام الناس فيها بتستمتع بالمزيكا عالبحر ويخيموا ويعوموا ويلعبوا يوجا.