share this article

كان ليا واحد صاحبي بيقول: بلد بتصحى كل يوم على صوت فيروز عايزها تبقى عاملة ازاي؟! المزيكا في لبنان جزء من كل حاجة، لو قلبت أي حجر هتلاقي وراه مزيكا، رغم إنه عانى كتير على مر تاريخه من الصراع والحروب، مع ذلك من وسط كل ده البلد طلّعتلنا شوية من أفضل الفنانين والموسيقيين اللي المنطقة عرفتهم. لبنان اديتنا فيروز اللي صوتها ألّهم شعبها واداهم وغيرهم أمل إن السلام والجمال اللي عرفوهم قبل الحرب هيرجعوا تاني، لبنان اديتنا كمان ابن فيروز، زياد رحباني اللي موسيقاه وكلماته الساخرة أثروا في أجيال. لبنان بلد موسيقيين اتعرفوا في كل بيت عربي زي الرحبانية ومارسيل خليفة وصباح فخري وسامي كلارك وماجدة الرومي. عشان كده الشعب اللبناني في كل حتة في البلد بيحتفل بالموسيقى سنويًا عن طريق عدد ضخم من المهرجانات، جمعناهملك عشان لما تيجي مسافر لبنان تظبط نفسك على معاد واحد فيهم.

BAALBECK INTERNATIONAL FESTIVAL

via annahar

ده واحد من أقدم المهرجانات في المنطقة وابتدى سنة 1956، بيقدم موسيقى الجاز والروك والأوبرا والباليه وغيرهم في مكان واحد في احتفالية مميزة. أيًا كان نوع الموسيقى اللي بتحبها، غالبًا هتلاقيها هناك. المهرجان بيتعمل وسط الأطلال الجميلة لمعابد باخوس وجوبيتر في مدينة بعلبك. بيحضر المهرجان فنانين من كل العالم لعدد من ليالي الصيف في يوليو وأغسطس. على مر تاريخه حضر فنانين عالميين زي Miles Davis  وDeep Purple وPlacido Domingo، وغيرهم.

BEITEDDINE FESTIVAL

via AGBU Lebanon

المهرجان ده ابتدي في منتصف الثمانينات كمحاولة لاستعادة الحياة الطبيعية وسط دمار الحرب في لبنان، ومن ساعتها بقى مهرجان سنوي للإحتفال بالفنون والإبداع في لبنان وبقى واحد من أكبر المهرجانات في المنطقة. بيتعمل المهرجان في قصر بيت الدين اللي عمره 200 سنة في مدينة بيت الدين. تصميم القصر الجميل والمنظر هناك أسباب كفاية إنك تروح! المهرجان بيتعمل في يوليو وأغسطس وبيقدم مجموعة عروض لفنانين محليين وعالميين لكل أنواع الموسيقى، من ضمن النجوم اللي حضروا قبل كده Elton John  وMariah Carrey.

BYBLOS INTERNATIONAL FESTIVAL

via Glamroz

ده أكبر مهرجان في لبنان وبيتعمل في مدينة بيبلوس في لبنان، المدينة بتتحول كلها لمسرح كبير علشان المهرجان. المهرجان السنوي ده بيتعمل في يوليو أو أغسطس من كل سنة ونسخة 2018 هتبقى في أول أسبوع من أغسطس. بيحضر في الاحتفال ده فنانين من كل أنحاء العالم يقدموا موسيقى مختلفة زي الروك والبوب والموسيقى الكلاسيكية وبيجذب المهرجان سياح من كل العالم.

EHMEJ FESTIVAL

via Ehmej Festival

مهرجان أهمج بيتعمل سنويًا من سنة 2011 في مدينة أهمج - شمال بيروت - في شهر أغسطس وهدفه الترويج للسياحة والثقافة اللبنانية ونشر الموسيقى والفنون من لبنان للعالم. المهرجان بيستضيف فنانين محليين ومن المنطقة زي صابر الرباعي ووائل كفوري.

 

BEIRUT & BEYOND INTERNATIONAL MUSIC FESTIVAL

via Mondanite

المهرجان ده ابتدى سنة 2013 عشان يبين ويروج للموسيقى المستقلة وللتأكيد على القيمة الفنية للعمل وكبر وبقى واحد من أكبر المهرجانات في المنطقة. كل سنة بيستضيفوا فنان من المنطقة كقيّم على المهرجان، في 2017 كان موريس لوقا من مصر هو القيّم. المهرجان بيتعمل في ديسمبر في بيروت.

 

WICKERPARK MUSIC FESTIVAL

via Arnaud Cécile HSilenus

المهرجان ده بيتعمل في مدينة بترون، وده بيركز على الموسيقى البديلة وبيجمع ما بين فنانين لبنانيين صاعدين وفرق معروفة وفنانين أجانب كمان. اللي بيخلي المهرجان ده مميز هو حرصهم على البيئة ومؤسسي المهرجان بيقولوا إنه خالي من المخلفات عشان بيحاولوا يحافظوا على البيئة. المهرجان بيبقى في شهر سبتمبر في حقل كبير فاضي جنب بيت مؤسسي المهرجان.

 

CEDARS INTERNATIONAL FESTIVAL

via In her shoes

مهرجان سيدار كان بيتعمل في السبعينات بس وقف بسبب الحرب وبيهدف للترويج للسياحة في لبنان وبيعكس تاريخ لبنان وتاريخ غابة سيدار. المهرجان نفسه كان بيتعمل في الغابة اللي مكانها مدينة بشرى، بس من ساعة ما الغابة بقيت موقع تابع لليونسكو، المهرجان اتنقل لمكان قريب يقدر برضه الحضور يشوفوا الغابة منه بعينهم. المهرجان ده استضاف فنانين عالميين زي فيروز ووديع الصافي والسنة دي استضاف في يوليو شاكيرا وماجدة الرومي.

 

GHALBOUN INTERNATIONAL FESTIVAL

via Ghalboun International Festival

المهرجان ده ابتدى سنة 2010 وبيتعمل في قرية غلبون. السنة دي هيتعمل في يوليو وهيستضيف 80 فنان من أنحاء العالم وهيقدموا أنواع مختلفة من الموسيقى.

 

ZOUK MIKAEL INTERNATIONAL FESTIVAL

via Eventsleb

مدينة مار مخايل الجميلة بتستضيف المهرجان ده، على بعد 10 دقائق من بيروت. المهرجان ده بيستضيف فنانين محليين وعالميين على مسرح روماني. هدف المهرجان يضيق الفجوة بين الأجيال بطريقة تساهم في استمرارية الفنون. نسخة 2018 كانت في يوليو وكان فيها فنانين زي سعاد ماسي.

JOUNIEH SUMMER FESTIVAL

via Beirut Nightlife

ده واحد من أكبر مهرجانات الموسيقى في لبنان وبيتعمل في يونيو في مدينة جونيه، المهرجان ده ليه سمعة إنه بيجمع مواهب عالمية ومحلية على أعلى مستوى وبيقدم أنواع مختلفة من الموسيقى.

Bkassine Festival

via Beirut Nightlife

واحد من أكبر المهرجانات في جنوب لبنان، مهرجان بكاسين بيتعمل قدام كنيسة جميلة عمرها 100 سنة في غابة بكاسين وبيستضيف فنانين من المنطقة، هيتعمل السنة دي في أخر أيام أغسطس وأوائل سبتمبر.

SUMMER MISK FESTIVAL

via prwebme

مع بدايته في 2014، المهرجان ده قدّم مش بس موسيقيين، لكن كمان كوميديين وفنانين متنوعين. السنة دي اتعمل في Beitmisk في عطشانة في شهر يونيو واستضاف "أبو" مع موسيقيين تانيين.

TYRE INTERNATIONAL FESTIVAL

via bisara7a

المهرجان ده بيتعمل في مدينة صُوْر العريقة وابتدى في 1996 ومعروف إنه بيختار أفضل الفنانين المحليين والعالميين. المهرجان بيتعمل في  ستاد إغريقي قديم في صُوْر وبيحاول يحيي الحِرف المنسية والأنشطة الريفية وبيشارك في إحياء تقاليد المدينة  دي التابعة لليونسكو.

BEIRUT HOLIDAYS

via Star system

ده عبارة عن مجموعة من الحفلات والعروض في قلب أسواق بيروت ، بدايته كانت في 2012، المهرجان ده بيضم فنانين محليين وعالميين ومن المنطقة زي إليسا و Chris de Burgh وبيتعمل في أغسطس على مدار كذا يوم.

BATROUN INTERNATIONAL FESTIVAL

via Music Nation

في 2009، مهرجان بترون الدولي اتعمل وابتدي يستضيف فنانين محليين وعالميين. المهرجان ده بيتعمل في شهر يوليو أو أغسطس في مدينة بترون الساحلية اللي مشهورة بالكنائس والمواقع التاريخية وتعتبر واحدة من أقدم مدن العالم.

لو عايز تعرف كمان عن المزيكا في لبنان، اقرأ عن الأماكن اللي ممكن تسمع فيها مزيكا لايف في بيروت.