share this article

زي ما دايماً بنشوف صور المشاهير في حتت كتير في العالم سواء مسافرين يتفسحوا أو بيصوروا أو بيعملوا أي حاجة؛ فيه منهم كتير عندهم حلم إنهم يزوروا مصر، أصل مهما كنا أخدنا عليها وبنشوفها كل يوم بالنسبة لهم هي ساحرة ومن أمانيهم ييجوا يشوفوا الهرم ويتصوروا معاه؛ والسنة دي مش مختلفة عن السنين اللي فاتت في أي حاجة فبرضه جيه عدد من المشاهير سواء في شغل، حفلة غنائية، أو قدروا يخطفوا كم يوم ويهربوا من حياتهم ويظهروا فجأة على الإنترنت بصور لهم في مصر. 

كاتي بيري وأورلاندو بلومالمصدر: Katy Perry

معظم الناس بتحب تعمل حاجة مميزة يوم عيد ميلادها، تحتفل بيه مع أصحابها أو تسافر مكان بتحب تروحله دايماً أو تجرب مكان جديد نفسها تروحه من زمان، وكاتي بيري الإنسانة اللي هي غير كاتي بيري المغنية بتعمل كده عادي زي أي حد فينا، وفي عيد ميلادها الـ35 قررت إنها تقضيه في مصر، وأخدت معاها القريبين منها اللي طبعاً كان منهم صاحبها الممثل الإنجليزي أورلاندو بلوم، الرحلة دي كان جزء منها في سيوة الجميلة، لما كلنا اتفاجئنا بصورتها بجلابية في عربية مع المرشد السيوي اللي كان معاها في الرحلة، وبعدها بأيام شفنا الصور بتاعة فسحة الهرم وقلبنا أرتاح إنها بجد في مصر.

جينيفر لوبيزالمصدر: Newsweek

جينيفر لوبيز كمان كانت بتحتفل بعيد ميلادها بس بما إنه اليوبيل الدهبي واحتفال بمرور نص قرن على وجودها في الحياة؛ قررت تخلي الإحتفال بالسنة الـ50 ممتد على مدار شهور من خلال جولة حفلات طويلة عملتها في دول كتير في العالم، طبعاً من ضمنهم كانت مصر اللي وصلتها يم 9 أغسطس لحفلتها في العلمين في الساحل الشمال بس طبعاً السوشيال ميديا والإعلانات متتوصاش كانت شغالة فوق دماغنا من شهر مايو عشان يفكرونا كل يوم إنها جاية، واللي حضروا الحفلة برضه سواء فنانين أو ناس عادية غرّقوا الفيسبوك والإنستجرام صور وستوريز.

مينا مسعودالمصدر: Enigma

إحنا كمصريين أول ما بنشم كده إن فيه حد أجنبي ممكن يكون عنده أي صلة بمصر حتى لو جده الـ17، ويكون الشخص ده مشهور بنعمل من البحر طحينة، بالظبط هو ده اللي حصل لما عرفنا إن مينا مسعود بطل فيلم علاء الدين مع ويل سميث، كان هو وعيلته عايشين في مصر وراحوا كندا وهو صغير، إحنا مكناش نعرف مين ده لغاية لما طلع الفيلم للنور، مينا كان في مهرجان الجونة السنة دي، وكمان طلع في برنامج معكم منى الشاذلي مع إخواته البنات، الملفت أكتر إنه بيعرف يتكلم عربي أحسن من رامي مالك! والله وبقى لينا قرايب مشاهير.

ناتالي إيمانويللمصدر: Sabq

معشوقة الجماهير ومحبوبة الملايين ميساندي أو ناتالي إيمانويل جات مصر هي كمان عشان تكون ضيفة مهرجان القاهرة السينمائي، يمكن دي أول سفرية تسافرها لوحدها من غير ملكة التنانين، واللذيذ بقى إنها حبتّ كل تفاصيل البلد والأماكن اللي زارتها يمكن أد حبّنا لميساندي بالظبط، وحطت صور وستوريز كتير على انستجرام من زيارتها للأهرامات ومنسيتش طبعاً تعمل pose يوجا محترفين عالماشي زي ما بتعمل لما بتسافر، وقبل ما تمشي قضت كام يوم في الجونة وشكرتهم نفر نفر في نهاية رحلتها.

سير جريجور كليجان الشهير بـ"The Mountain" المصدر: البشاير 

Hafþór Júlíus Björnsson .. آه ده اسمه الحقيقي اللي مش هنحاول ننطقه أو نكتبه بالعربي عشان الموضوع صعب الصراحة! المهم إنه تقريباً بعد ما كمّل رسالته مع سيرسي لانستر وخلّص عركته مع أخوه على السلّم، يظهر كده بقى مكروه في المجتمع الأجنبي لدرجة إنه جيه يمضي عقد فيلم جديد مع السبكي! وفي طريقه طبعاً اتفسح كام فسحة حلوين وعدّى على الأهرامات اللي تقريباً هي المكان الوحيد اللي ممكن يحس إنه صغيّر أدامه.

بيلي زينالمصدر: NileFm

في الواقع إحنا عارفينه بخطيب روز السمج في فيلم تيتانيك، اللي كلنا بنكرهه ما عدا أمها، حتى لو إنت مش من المعجبين بتوع دي كابريو كنت أكيد أكيد هتكره الشخص اللي عامل الدور بسماجة متناهية بالشكل ده، في شهر نوفمبر جيه مصر واتكرم في مهرجان القاهرة السينمائي، وطلع في حلقة من برنامج معكم منى الشاذلي، لأ وكمان عملوله quiz يختار مين من الممثلين والممثلات المصريين بُناء على الصور اللي هتوريهاله ينفع يعمل أدوار البطولة في تيتانيك! يا حبيبي أول مرة نتعاطف معاه في الموقف ده، اضطر يختار حسن الرداد في دور جاك، وياسمين رئيس في دور روز.

مايك تايسونالمصدر: Times Kuwait 

بطل الملاكمة تايسون، زار مصر السنة دي هو في الواقع كان جاي شغل، ومش أي شغل؛ ده بيصور فيلم مع السبكي، بس هو استغل الفرصة وجاب المدام وأتفسحوا عند الأهرمات واتصوروا، الفيلم بقى اسمه "حملة فرعون" عشان لو عايز تشوفه، لأنه نفس الفيلم اللي طلع فيه The Mountain.

راسالمصدر: Russ Diemon 

السنة دي العلمين كانت ولعانة حفلات، فقبل حفلة جينيفر لوبيز اللي كانت يوم 9 أعسطس؛ كان فيه حفلة الرابر راس واللي كانت يوم 2 أغسطس، وبرضه كانت أول حفلة له في أم الدنيا، غير الحفلة اللي انبسط فيها هو والجماهير، زار معالم مصر وعمل فيديو للرحلة وحطه على إنستجرام.

أدريانا ليماالمصدر: Enterprise Press

كانت عارضة Victoria's Secret، وأخدت لقب The Most Valuable Angle سنة 2017، زارت مصر كجزء من مهمتها لتحقيق السلام في العالم، كان معاها الـDJ السكتلندي كالفين هاريس، واللي عملهم الجولة عند أبو الهول
والأهرامات كان وزير الآثار الأسبق زاهي حواس، بصور في كل حتة مالية الإنستجرام بتاعها؛ هي انبسطت أوي في رحلة كان دايماً نفسها تعملها.

أنتوني مارسيالالمصدر: MUFC MENA

لاعب كرة القدم الفرنسي، في الجناح الأيسر لنادي مانشيستر يونايتد، ولاعب منتخب فرنسا اللي فاز بكأس العالم 2018، جيه مصر في شهر مايو في أجازة بعد ما كان أحرز 10 أهداف في الدوري، وأكيد كان يستحق الأجازة دي لدرجة إن الحساب الرسمي للفريق على تويتر اتمنى له أجازة سعيدة.

جا رولالمصدر: Cairo Scene

السنة دي جذبت عدد كبير من المغنين، وده الرابع في الليستة دي والرابر التاني، في أواخر شهر مارس جيه مع مراته وقضوا وقت لطيف واتصوروا أدام الأهرامات بس ماستكفوش بالقاهرة والجيزة كمان زاروا الإسكندرية بالتحديد المكتبة.

ستيفن سيجالالمصدر: nterprise Press

نجم الفنون القتالية وأفلام التسعينات .. كان موجود في مهرجان القاهرة السينمائي هو ومراته، وطبعاً استغلوا الفرصة وزاروا الأهرامات وأخدوا صور للذكرى أدامها بملابسهم الصينية.

داني الفيش وجوانا سانزالمصدر: NilefInternational

دي مش أول مرة يزور مصر، هو جيه قبل كده مع منتخب البرازيل للناشئين لما كأس العالم للشباب كان في مصر، بس المرة دي كانت أجازة ومعاه المدام العارضة المشهورة وفسحها في الأهرامات اللي كان مهتم يعرف اتبنوا إزاي، بعد لما اتصوروا، ده غير الجدول اللي عملوه عشان يشوفوا كل المعالم الممكنة.

ديمي روزالمصدر: Cairo 24

عارضة الأزياء الإنجليزية مولعاها على السوشيال ميديا، صور ليها من أدام الأهرامات والكرنك، وواضح هي مبسوطة أد إيه في مصر، وبتقول إن كان دايماً حلم عندها إنها تيجي مصر.