share this article

يوم الجمعة اللي فاتت وزير السياحة والآثار خالد العناني؛ ووزير الأوقاف مع محافظ القاهرة افتتحوا جامع الفتح الملكي في عابدين، الجامع كان بيترمم من سنة 2017 وأخيراً خلص من أسبوع وبعد لما تفقدوه فتحوه، الترميم مش بس أخد وقت طويل لكن كمان كلف 16 مليون جنيه، لأن الجامع فيه تفاصيل كتير جداً.

عملية الترميم شملت الأول تنضيف كل حاجة وبعد كده ترميمها، وده كان في كل الرخام والعواميد الجرانيت والتفاصيل والزخارف على الحيطان خصوصاً إنه على الطراز العثماني وده طراز بيحب الزخارف أوي زي جامع محمد علي اللي في القلعة، أو لو دخلت جوامع في تركيا هتكون فاهم كم التفاصيل، كمان نفس الحاجة اتعملت للجامع من بره، وبعد كل ده ركبوا نظام صوت، كاميرات مراقبة وكمان إضاءة، الجامع بقى حاجة ألاجة تليق بالملوك صحيح.

أما عن تاريخ الجامع، فبناه عابدين بك أمير اللواء السلطاني، كان مسجد صغير جنب قصره، وعشان كده اسمه جامع عابدين، وبعد كده قصر عابدين، لما جيه بقى الخديوي إسماعيل بنى قصر عابدين في نفس المكان بقى الجامع جوه حدود القصر، الملك فؤاد بقى وسع الجامع وبقى اسمه الفتح الملكي، بس احتفظ بالمئذنة والمدخل القديم.

اللي إدى الجامع ده شهرته هو إن الملك فاروق كان بيصلي فيه دايماً، الجامع من جوه عبارة عن صحن أساسي للصلاة مربع وفي نصه أربع عواميد من الجرانيت الأحمر وطبعا قبة، والمحراب مزخرف بشرائط رخام ملونة نادرة، أما المنبر متزين بزخارف ونقوش نباتية مطلية بالدهب، التوسعات كانت في 3 مباني من كل الجهات إلا الشمالية للجامع، المدخل الملكي وواجهة الجامع اللي بتطل على حديقة القصر في الناحية الغربية وإرتفاعها 15.70 متر.

المصدر: Youm 7