share this article

وسط الوقت الغريب اللي إحنا عايشينه الفترة دي؛ ومع خطط السفر اللي اتركنت على الرف في الوقت الحالي؛ فجأة لقينا نفسنا محبوسين، يا إما في البيت فعلياً للناس اللي شغلها أو حياتها تسمح بالعزلة الذاتية أسبوعين على الأقل عشان منع نقل العدوى، يا إما اللي مضطر ينزل لحد دلوقتي لكن حياته بقت في أضيق الحدود من غير خروجات وفسح وتجمعات؛ وأكيد من غير سفر!

ورغم إن أولوليات الناس في الوقت اللي زي ده بتبقى إنه يحاول يحمي نفسه ويوفر أكل وشرب واحتياجات أساسية؛ لكن الترفيه في الظروف دي بيبقى من ضمن الأساسيات برضه، إنك تقاوم الإكتئاب والموود العام المرعب وهلع السوشيال ميديا، وإنك تفصل من كل اللي حاصل وتغير جو، بس الجو اللي هتغيره ده هيبقى من بيتك؛ وده بعد ما Google Arts & Culture قرروا يعملوا حاجة عظيمة ويتيحوا فرصة إنك تتفرج على أكتر من 500 متحف ومعرض من كل حتة في العالم من خلال جولات افتراضية أونلاين، يعني كإنك رحت المتحف واتفرجت عليه بس عن بُعد. احنا اخترنا منهم 17 متحف بس من المتاحف المشهورة واللي أكيد في الـbucketlist بتاعة أي حد غاوي سفر، بس تقدر تختار من بقية المتاحف والمعارض المتاحة في الليستة وتتفرج عليهم بالترتيب الأبجدي لأساميهم كمان.

1- متاحف الفاتيكان - روماالمصدر: Lonely Planet

في العادي؛ متاحف الفاتيكان بيزورها ملايين من البشر كل سنة، بس طبعاً بما إن إيطاليا دلوقتي قافلة كل حاجة في الحياة لأنها تاني بلد في العالم فيها أكتر حالات إصابة بفيروس كورونا بعد الصين، بقى عندك فرصة تشوف متاحف الفاتيكان أونلاين من خلال الجولة الإفتراضية المتاحة على الموقع بتاعهم، يعني تخيل إنك هتقدر تتفرج على كنيسة سيستينا Sistine Chapel وهي فاضية وتشوف كل لوحة فيها براحتك؛ في الوقت اللي الكنيسة دي بيزورها حوالي 12 ألف شخص يومياً، يعني زحمة مش طبيعية بتخليك تدخل المكان بقوة الدفع.

2- متحف أورساي - باريسالمصدر: Laurent photography

محطة السكة الحديد اللي اتحولت لمتحف .. أورساي هو واحد من أهم المتاحف في باريس ومن أول الأماكن اللي السياح بيحبوا يروحوها سواء عشان المبنى نفسه أو عشان مجموعة المنحوتات واللوحات اللي فيه، أشهرهم تقريباً لوحة Starry Night اللي رسمها فان جوخ ولوحات تانية لـ"كلود مونيه" و"رينوار"، واللي دلوقتي تقدر تتفرج عليهم كلهم وانت قاعد في بيتك.

3- متحف فان جوخ - أمستردامالمصدر: Marja

لو مش كفاية بقى بالنسبالك لوحة واحدة لـ"فان جوخ" أو حتى جناح اللوحات اللي هتشوفه في متحف أورساي؛ ممكن تتفرج على المتحف المخصص لكل لوحاته؛ متحف فان جوخ في أمستردام فيه أكتر من 500 لوحة من أعماله؛ غير كمان معارض جوة المتحف بتستعرض حياته، ولوحات لفنانين تانيين كانوا معاصرين في الوقت اللي هو كان فيه.

4- معرض أوفيزي - فلورنسالمصدر: Maria Globetrotter

أوفيزي هو واحد من أقدم المتاحف في أوروبا؛ وبرضه من المزارات اللي بيروحلها ملايين كل سنة في إيطاليا، المعرض فيه أكتر من 100 ألف قطعة فنية لأشهر وأعظم فناني إيطاليا زي "ليوناردو دافنشي" و"مايكل أنجلو"، غير الممرات والأسقف نفسها اللي كلها رسومات وفنون بالموزايك، وشوية تماثيل بقى هنا وهناك من عصر النهضة الإيطالية. وفي حين إن معرض أوفيزي في العادي ممكن تقف خمس ست ساعات على شباك التذاكر بتاعه عشان تعرف تدخل، دلوقتي متاح برضه إنك تتفرج على كل حاجة فيه وانت قاعد في بيتك.

5- متحف اللوفر - باريسالمصدر: Yeo Khee

هو مش بس أكبر متحف في العالم؛ لأ ده أول مزار تقريباً أي حد رايح باريس أول مرة هيفكر يروحله، بالذات لو مصري ومتشوق أوي تشوف كمية الآثار الفرعونية الموجودة هناك، والفرصة جاتلك أو بمعنى أصح المتحف جالك لحد عندك عشان تتفرج على اللي فيه، وتقدر كمان تدوس على قطع أثرية معينة عشان تعرف حكايتها ونبذة عنها .. بالمناسبة حتى اللي زار اللوفر قبل كده هتبقى دي فرصة بالنسباله؛ لأن من كتر ماهو متحف كبير؛ ناس كتير عمرها ما بتقدر تعدي على كل حاجة فيه من زيارة أو زيارتين.

6- متحف هيرميتاج - سان بطرسبرجالمصدر: Chiew Loo

تاني أكبر متحف في العالم بعد اللوفر؛ وداخل موسوعة جينيس للأرقام القياسية لأنه المتحف اللي فيه أكبر عدد من اللوحات الفنية في العالم؛ من ضمنهم لوحات لمايكل أنجلو؛ ليوناردو دافنشي؛ مونيه ورينوار وبيكاسو، ده كده بنتكلم عن اللوحات بس؛ غير بقى معروضات من المجوهرات والدهب من شرق أوروبا وغرب آسيا، حوالي 3 مليون قطعة فنية نادرة لشعوب وحضارات كتير منها الفرعونية -موجودين في كل حتة!- والبابلية والإسلامية والهندية والصينية، وقاعات للآثار الأوروبية وطبعاً قاعة كبيرة جداً للآثار والقطع الروسية.

7- المتحف البريطاني - لندنالمصدر: British Museum

أكبر متاحف لندن؛ وفي المتحف ده هتشوف أكتر من 13 مليون تحفة وقطعة أثرية من كل حتة في العالم تقريباً، ده لأن المتحف فيه مجموعات فنية نادرة من آثار العصور الوسطى من آسيا والشرق الأوسط، وفيه قسم للحضارة اليونانية والرومانية، وقسم كبير من آثار مصرية ومومياوات وتماثيل فرعونية، غير كمان إنه فيه أقسام متخصصة للي بيحب عالم الحيوان أو الجيولوجيا وعلوم النباتات .. شوف انت بقى 13 مليون قطعة أثرية يعني مش سايب حتة من الكوكب تقريباً.

8- متحف الفن الحديث (موما) - نيويوركالمصدر: Cobosocial

نروح لنيويورك وتحديداً لمتحف الفن الحديث؛ أو المتعارف عليه باسم "موما"، متحف للمهتمين بمدراس الفن الحديث؛ ده لأنه من أهم المتاحف في العالم الخاصة بالفن ده، وفيه أعمال كتير عن الهندسة المعمارية والتصميم والرسم والنحت والتصوير والأفلام .. بنتكلم في حوالي 70 ألف قطعة فنية لفنانين من كل حتة في العالم، وهتقدر تتفرج على كل ده من خلال الجولة الإفتراضية اللي المتحف عاملها للناس.

9- متحف سولومون جوجينهايم - نيويوركالمصدر: Reno Laithienne

المتحف ده هو تحفة معمارية في حد ذاتها، فيه ناس بتروحله مخصوص عشان تتفرج على السلالم الإسطوانية بتاعته. هو موجود في مانهاتن في نيويورك؛ وهو مقر لأعمال فنية كتير أوي من المدرسة الإنطباعية والفن المعاصر، لما بتدخل المتحف -وفي كلامنا هنا افتراضياً طبعاً- هتلاقيه داير في شكل اسطواني لحد 400 متر تقريباً اللي هم الـ6 أدوار بتوع المتحف، وتوصل لفوق في النص عند القبة الإزاز بتاعته، يعني سواء كان ليك في الفن المعاصر أو ملكش فيه؛ لازم تاخد جولة تتفرج على المكان والطريقة اللي متصمم بيها.

10- متحف بيرجامون - برلينبوابة عشتار - المصدر: National Geographic

على أرض الواقع وفي جزيرة المتاحف في برلين؛ هتلاقي متحف بيرجامون، مكان بيجمع جواه شوية كنوز مش هتشوفها في أي حتة تانية، من أول بوابة عشتار؛ اللي كانت البوابة التامنة لمدينة بابل في العراق، واكتشفها منقب آثار ألماني في أواخر القرن الـ19 ونقلوا البوابة بعد كده زي ماهي بالظبط بكل تفاصيلها لبرلين، لحد كل أشكال الآثار اللي مش هتخطر على بالك؛ آثار إسلامية، آثار من الشرق الأوسط والحضارات القديمة ومن الشام والعراق، آثار يونانية ورومانية .. قطع أثرية عظيمة جداً رغم إنه مش من أكبر المتاحف ولا حاجة، كل الموضوع دورين؛ بس الدورين مليانين قصص وتاريخ ميتفوتوش، وطبعاً كل ده بقى متاح تتفرج عليه وتقرأ عنه بضغطة لينك يوديك لحد هناك.

11- المتحف الوطني للفن الحديث والمعاصر - كوريا الجنوبيةالمصدر: hisour

موجود في قصر "دوكسو" في مدينة "جونا"، وهتلاقي 3 فروع ممكن تتفرج فيها على كل أشكال الفن الحديث والمعاصر، بس اللي في قصر دوكسو ده فيه شوية مميزات زيادة زي المكان نفسه اللي هتشوف الطابع المعماري بتاعه، على شكل قلعة أو حصن بالستايل الكوري التقليدي في البناء ومنارة، وكمان من جوة فيه تصميمات اسطوانية وفيه جنينة كبيرة عشان الناس اللي بتحب النحت تقعد تبدع في الهواء الطلق. بس حالياً وبشكل مؤقت ولأنه مقفول طبعاً؛ هتقدر تتفرج على الأعمال الفنية اللي فيه، ومفيش ما يمنع إنك تتفرج على الجناين بتاعته والقصر نفسه؛ على أمل إنك تروح هناك بنفسك يوماً ما.

12- متحف التاريخ الطبيعي - لندنالمصدر: Julien Fromentin

هنا بقى مش هتلاقي لوحات ورسومات؛ هنا الطبيعة هي الفنان، حوالي 80 مليون عينة من أحياء مختلفة حيوانات منقرضة ومش منقرضة ونباتات وحشرات وطبقات أرض ومعادن. جوة المتحف هتبدأ بالقاعة الرئيسية اللي سمّوها "الكاتدرائية" عشان التصميم المعماري المبهر بتاعها، وعندك بعد كده تقسيمات بقى بين تاريخ الأرض وإزاي الكرة الأرضية اتشكلت، هتشوف مجسم كبير جداً للكرة الأرضية فيه حفريات وصخور ومعادن، فيه كمان مجسم لأكبر هيكل عظمي لديناصور اكتشفوه لحد دلوقتي، وآثار طبيعية تانية كتير عمرها أكتر من 200 مليون سنة. يعني في الجولة دي مش بالضرورة برضه تكون غاوي جيولوجيا وأحياء وكنت دحيح أيام الثانوية العامة، لأ ممكن تاخد فكرة عن حاجات كتير أوي ممتعة ومسلية ومش بالشكل التقليدي زي لو قرأت شوية معلومات عنها.

13- متحف الفن - ساو باولوالمصدر: Wikipedia

ده برضه من المتاحف اللي متتفوتش بسبب اللي انتو شايفينه في الصورة ده، مبنى يعتبر من علامات شارع باوليستا في ساو باولو - البرازيل؛ وجوة المبنى كمان طريقة عرض اللوحات مخلياها تبان كإنها متعلقة في الهوا أو نازلة من السما. المتحف ده يعتبر من أهم المتاحف اللي فيها مجموعات مهمة من الفن الأوروبي، وبيعتبروه من أهم المتاحف في أمريكا اللاتينية كلها أو في الجزء الجنوبي كله من الكرة الأرضية، وفي الجولة الإفتراضية جوة المتحف ده هتلاقي شوية لوحات من فنانين أوروبيين أهمهم لبيكاسو ورامبرانت.

14- المتحف الوطني للأنثروبولوجيا - المكسيكالمصدر: TheStranger

واحد من أهم المزارات السياحية في المكسيك، بيجيله ملايين السياح كل سنة، وهو عبارة عن قاعات عرض ما بين قاعات داخلية وبين معروضات تانية محطوطة في الهواء الطلق، كلها قطع أثرية من العصر ما قبل الكولومبي؛ يعني العصر اللي قبل اكتشاف كريستوفر كولومبوس لأمريكا وقبل ما يبقى فيه التقسيمة بتاعة أمريكا الشمالية وأمريكا اللاتينية.

15- متحف متروبوليتان للفنون - نيويوركالمصدر: Robert Bye

أكبر متحف في أمريكا، وهتلاقي في جولتك فيه كل حاجة تخطر على بالك، من أول الحضارة الآشورية في العراق وطبعاً أكيد مش محتاجين نقول الحضارة المصرية والمومياوات والتماثيل الفرعونية، الحضارة الإسلامية - اللي بالمناسبة متحف متروبوليتان فيه واحدة من أكبر مجموعات الآثار الإسلامية في العالم، غير بقى إنهم عارضين فيه آلات موسيقية وعسكرية وأثاث قديم، وفيه جزء لمجموعة أزياء مغنيات أوبرا وأزياء لمصممين معروفين زي فيرزاتشي.

16- المعرض الوطني للفنون - واشنطنالمصدر: Britannica

عشان أي حد بيحب الأزياء والموضة؛ هتلاقي هنا معرضين مخصوص متاحين أونلاين فيهم واحد عرض للأزياء الأمريكية من سنة 1740 لسنة 1895، واللي من ضمنهم أزياء من العصور الإستعمارية والثورية، ومعرض تاني عاملينه برضه بس ده مخصصينه للوحات الرسام الهولندي يوهانس فيرمير.

17- متحف ريكز - أمستردام المصدر: Red Morley Hewitt

عارفين اليافطة الشهيرة اللي أي حد بيروح أمستردام يتصور عندها بتاعة I love Amsterdam؟ المبنى اللي وراها بقى هو ده متحف ريكز، يعني اللي بيروح هناك مش بيروح عشان اليافطة بس؛ لكن عشان واحد من أهم مزارات البلد، فيه عدد رهيب من اللوحات الكلاسيكية لفان جوخ ورامبرانت وفيرمير، حوالي 200 عمل فني من العصر الـ17 أو العصر الدهبي لهولندا، يعني حتى لو مش هتقدر تتصور مع اليافطة دلوقتي؛ فبشكل مؤقت عندك فرصة أهم وهي إنك تتفرج على المتحف وكل اللوحات اللي فيه.