share this article

كلنا في المدرسة درسنا واحدة من أشهر روايات شكسبير "روميو وجولييت"، وتقريباً معظم البنات في فترة المراهقة حلمت إن حبيبها يقف يحب فيها تحت البلكونة، ولو مش عارف القصة أوي ومشفتهاش في أفلام كتير اتعملت فيها بكذا طريقة منهم فيلم بنفس الاسم ليوناردو دي كابريو مثلاً؛ فالقصة بتحكي عن عيلتين أعداء، بس ولد وبنت من العيلتين دول حبوا بعض، وطبعاً في الخفا عشان العداوة اللي بين العيلتين، والقصة أحداثها بتطور وهو بيسافر وهي بتدعي الموت وبيرجع فاكرها ماتت ولف ودوران كده لغاية في النهاية بيموتوا هم الاتنين جنب بعض.

المهم بقى إن فيه بيت في فيرونا في إيطاليا بيتقال إن ده بيت جولييت أو البيت اللي إستوحى منه شكسبير المشهد بتاع البلكونة والحب بالليل، وبرضه البيت ده اتصور عنده فيلم تاني ملمّس مع حدوتة روميو وجولييت بس المرة دي كان اسمه Letters to Juliet، وبما إن عيد الحب قرب فأصحاب البيت قررورا إنهم هيفتحوا المكان لـcouple محظوظ إنه يقضي ليلة في البيت ده ببلاش، والأوضة اللي فيها البلكونة إياها هيحطوا فيها السرير اللي كان في الفيلم، كمان هيكون لهم عشا فاخر خاص، وخادم خاص، وجولة في المدينة بطريقة روميو وجولييت.

عشان تبقى سعيد الحظ بقى ابعت رسالة على Airbnb تحكي فيها قصة حبك، والباب مفتوح لاستقبال الرسايل من يوم 21 يناير ولغاية 2 فبراير الساعة 11:59 بالليل.

المصدر: Matador Network