share this article

اتعودنا إن كل شوية السوشيال ميديا تطلعلنا تقليعة جديدة وفجأة الموضوع يبقى هوس والشاطر طبعاً -أو الإنفلونسر يعني- هو اللي يلحق التريند من أوله، والتريند دلوقتي على فيلم "الجوكر" اللي مش هنتكلم في مين عجبه ومين شايف إنه عامل دوشة مبالغ فيها، ولا هنتكلم عن الزي الرسمي المتوقع لكل حفلات الهالوين آخر الشهر، لكن هنتكلم عن السلالم اللي كانت من أسبوعين بس مجرد سلالم عادية في منطقة برونكس في نيويورك وفجأة اتحولت لمزار سياحي الناس بتروح تقف طوابير عنده عشان تتصور في وضع الجوكر!

ومن غير ما نحرق أي أحداث؛ اللي شاف الفيلم أو حتى الإعلان بيشوف اللقطة اللي واكين فينيكس بيبقى لابس فيها بدلة بتوليفة عجيبة من الألوان وجزمة بني وfull clown makeup ونازل على السلالم اللي شفناه عندها قبل كده في الفيلم، بس في اللقطة دي بالذات بيحصل الماستر سين الخطير والرقصة اللي أعتقد محبي وكارهي الفيلم أكيد مش هيختلفوا عليها.

وبين يوم وليلة الناس ابتدت رجليها تروح للمكان ويتصوروا عنده أو يصوروه، يقلدوا حركات الجوكر أو حتى فيه ناس أخدوا الموضوع لدرجة أكبر ولبسوا بدلة زيه وعملوا نفس الماكياج اللي كان عامله في المشهد، وبقت السلالم مزار سياحي رسمي باسم "سلالم الجوكر" أو Joker Stairs.

بس طبعاً الناس اللي لا بيهم ولا عليهم سكان المنطقة اللي طول عمرهم طالعين نازلين على السلم في سلام مش عاجبهم الحال، والموضوع ابتدى يبقى مزعج بسبب الزحمة والطوابير، لكن في الآخر مفيش سيطرة على ظاهرة ابتدت تنتشر ومحدش هيقدر يوقفها خصوصاً إن جزء كبير من السياحة في أماكن كتير حول العالم بيقوم على استغلال مواقع تصوير لأفلام أو مسلسلات حققت نجاح؛ واتحولت لمواقع سياحية بيجيبلها المعجبين من كل حتة في العالم.

المصدر: News 18