share this article

النوبة بالنسبة لنا هي مكان جميل كله ألوان وبيوت وناس جميلة، أو يمكن هو "بكار" وحكايات من الطفولة، أو صوت منير وقصايد الخال، أعتقد أي طريقة إنت شايف بيها النوبة أو إيه صورتها في حياتك هتكون صورة جميلة وفيها فن، ولازم تكون عارف إنها مش أسوان .. عشان أسوان حاجة والنوبة حاجة.

النوبة هي الأرض اللي كانت بعد السد العالي، وكان شعب له ثقافة عادات وتقاليد ولغة، ولما جات الحكومة تبني السد الناس دي إتهجرت وطبعاً القرى بتاعتهم اتدمرت، وبدأوا حياة جديدة في الأماكن اللي راحوا يعيشوا فيها، وده اللي خلاهم يبدأوا يتكلموا عربي عشان يتأقلموا ويتواصلوا مع المجتمع الجديد، ومن هنا استخدامهم للغة بتاعتهم قل وبدأت تختفي، وبقى فيه أجيال متعرفش حاجة عن اللغة النوبية، المهم في محاولة جميلة من شباب متطوعين كلهم قرروا إنهم يجمعوا اللغة بكلماتها وتعابيرها في كتيب ويكون بالعربي والإنجليزي والأسباني.

عشان يعملوا القاموس أو الكتيب ده قعدوا يلفوا لأسابيع يعملوا مقابلات ويسجلوا لناس نوبيين بيتكلموا، وأخدوا كل المقابلات والتسجيلات دي لخبير في الحضارة النوبية عشان يجيبوا معاني للكلمات دي، والطباعة أخدت منهم 3 شهور عشان يكون فيه حاجة ملموسة في إيديهم، ومهم بالنسبة للمتطوعين يجمعوا الكلمات قبل ما الناس الكبار النوبيين العواجيز يموتوا لأن هم دول بس اللي لسه عارفين اللغة النوبية.

الكتيب اسمه "كوما وايدي" اللي معناها حكايات تراثية من قلب النوبة، وفيه 230 كلمة وهو الأول من سلسلة هدفها تغطي كل اللغة. 

المصدر: Arab Weekly