share this article

أكتر حاجة ممكن تبوظ زيارة الأهرمات على السياح إن مفيش حد يشرحلك أي حاجة، فهيكون بالظبط كإنك ماشي في أي شارع وتايه، مش بس الأهرامات لكن كل المعالم الآثارية، أو إن يكون معاك مرشد دمه تقيل مثلاً، ده لو عرفت تلاقي مرشد أصلاً، ده لأن أغلب الناس بقت بتتجه للسفر لوحدها، وتعمل هي رحلتها ويستمتعوا بيها على طريقتهم وده من الطرق اللي بتخلي الناس تسافر بتكلفة أقل أو تعمل حاجات أكتر بالفلوس.

شابين مصريين محمد أحمد وأحمد رأفت من أسوان -فمنطقي جداً يكون عايز يشارك تاريخ مصر اللي كبر وسطه-، لاحظوا الموضوع ده وإن الناس بقت محتاجة حاجة أسهل وأرخص من رحلات سياحية منظمة ومرشدين قاموا عملوا أبلكيشن اسمه VisGo، الأبلكيشن ده بتدخل عليه وعن طريق الموقع اللي إنت فيه بيقولك إيه المعالم اللي حواليك ولمحه عنها، فأنت بتختار عايز تروح فين وبمجرد لما بتوصل المكان الأبلكيشن بيبدأ يشرحلك كل حاجة عن المزار ده، هم دلوقتي عندهم 10 أماكن سياحية على الأبلكيشن ولكل مكان عاملين فيديو مخصوص وكأنه حكاية ومعمول لها سيناريو مش بس شرح، واللي هيكون حلو مش بس عشان السياح لكن هو بيفتح الباب أدام المرشدين السياحيين؛ طلبة الآثار وكل حد عنده معلومات موثوقة عن مكان إنه يكون بيكتب السيناريو ويسجله بصوته. 

المصدر: Waya Media