share this article

أجدادنا الفراعنة أجدع من أجدادنا اللي من لحمنا ودمنا والله، كل شوية نكتشف حاجة فرعونية جديدة من ورثهم، كان آخرهم اكتشاف 30 ورشة في المنطقة الصناعية بوادي الملوك الغربي المعروف باسم "وادي القرود"، ووادي الملوك اللي فيه المقابر الملكية المشهورة.

زاهي حواس، رئيس بعثة علماء الآثار اللي شغالين هناك من 2017، قال إن الورش دي خاصة بتصنيع وتجهيز الأثاث الجنائزي الخاص بمقابر الملوك، وجنبها حفر للتخزين، واكتشوا كمان فرن لحرق الفخار والمعادن ولقوا جنبه خاتمين فضة  ورقائق دهب، وكميات كبيرة من أدوات الزخرفة اللي كانوا بيزينوا بيها التوابيت الخشبية في الأسرة الـ18 وكانت بتتسمى "جناح حورس".

حواس قال برده إن في بعثة تانية شغالة في وادي الملوك الشرقي لقوا قطع أثرية، منها 42 كوخ صغير كان العمال زمان بيحطوا فيه أدواتهم اللي بيستخدموها في بُنا المقابر، غير شوية لوحات منقوشة بالهيروغليفي وأجزاء من مقابر منقوشة وخواتم من عصر الرعامسة.

الاكتشافات دي كلها بتعتبر من الاكتشافات الكبيرة للآثار القديمة، اللي مفترض إنها تنعش حركة السياحة خصوصا إن السياح بيحبوا جدا كل ما له علاقة بالفراعنة وأيامهم وحاجاتهم.

 

المصدر: رويترز

 

المصدر: الأهرام