share this article

الوقت متأخر، كل فين وفين بيظهر واحد ماشي في الشارع، الساعة دي القهاوي بس هي اللي بتكون مليانة، عمال المحلات اللي في المنطقة بيحتلوهم بعد ما وردياتهم تخلص. بعد لف طول اليوم عشان أفرج ضيفي القاهري على البلد، أخدته قعدته على قهوة منهم بحب أقعد عليها. لأن الحتة اللي كنا فيها عبارة عن ممر، فأي كلمة بتتقال بيبقى لها صدى رهيب، بدون مقدمات لقيته بيقولي فجأة "إنت ليه مش أسمر زيهم؟!". حسيت للحظة إن الهوا حولينا وقف والجو سخن، كل الناس بتبص علينا، على طول عوجت لساني بلهجة بلدنا عشان أمتص غضبهم "لا مؤخذة يا حبايب، الراجل مش من هنا"، افتكروه طبعا بيروش عليهم، لكن بمجرد ما الناس سمعت كلمة "حبايب" هديوا، ورجع نفسي ينتظم تاني.



مش دي المرة الأولى اللي يحصلي فيها موقف زي ده مع صحابي اللي بيزوروا أسوان لأول مرة، معظم المرات كانت بتنفجر في وشي أسئلتهم. المسافر عنده فضول دايماً للمكان والناس اللي رايح لهم، بس الفضول ده لما يبقى مبني على أفكار غلط منتشرة ممكن تلبسه في حيطة، وتلبس اللي معاه، ولأني مش حابب قسم العظام في المستشفى العام يستضيفني فترة، قررت أجاوب هنا على كل الأسئلة اللي بتتقالي لما بتعرف إني أسواني.

إنت ليه مش أسمر زي الأسوانيين؟


الأسطورة بتقول إن أسوان بلد كلها نوبيين، وبما إن أغلب النوبيين سُمر، فالبلد كلها سمر، لكن بمجرد وصول محطة أسوان بتتفتفت الأسطورة دي. النوبيين في أسوان فئة واحدة من 14 فئة عايشة في أسوان، صعايدة وجعافرة وبِشرية، آه النوبيين قبيلة كبيرة، لكن مش كل البلد، وباقي القبائل في منها اللي غالب عليها السمار، وفي منها اللي في بياض الأوروبيين. حتى النوبيين نفسهم في درجات في سمارهم أميل للبياض. وعشان متفهمش غلط، السمار بالنسبة لي اللون المفضل. بس هنا بتكلم عن أفكار غلط محشية في دماغ الناس. والسؤال عنها أحياناً بيبقى محرج. لا هو محرج من غير أحياناً. ومش لطيف أبداً تسأل عن لون بشرة حد.

إزاي من أسوان ومش بتتكلم نوبي؟

المصدر البديل

السؤال التاني مرتبط برضه بالنوبيين، إنتم ليه كلكم مش بتتكلموا نوبي، أو إنت بتعرف تتكلم نوبي؟ ده مع علمه إني صعيدي، بس بيبقى عنده تصور إنه بما إني معاشرهم يبقى ممكن ألقط اللغة. مبدئياً كده اللغة النوبية لها أبجدية قديمة اتنست، فتعلمها مستحيل، بفهم شوية كلام بحكم العشرة، زي معظم غير النوبيين في أسوان.
هصدمك؛ اللي بيتكلم نوبي من النوبيين نفسهم أقلية، بعد بناء السد وغرق النوبة القديمة اتفرق النوبيين ما بين أسوان اللي كانوا عايشين في جنوبها، وباقي الجمهورية، الموضوع اللي معروف بإسم "قضية التهجير"، فبلاش تسأل حد بتعرف تتكلم نوبي ولا لأ، كده كده لو قالك حتى "بورروم" هتقوله "كلامك كله حكم يا سيد المعلمين".

إنتم بتلبسوا زي بكار؟

المصدر Sally ZOHNEY

لو إنت مصري قضى طفولته في بداية الألفية التانية، فغالبًا كنت بتستولي على التليفزيون، وتفرج العيلة كلها غصب واقتدار على "بكار" وهما بيفطروا في رمضان. بكار مسلسل تحفة، ولحم خيالنا من خيره، بس عملنا مشكلة كبيرة، لأن في ناس افتكرت إنه شخصية لها وجود، مش بشخصها طبعاً، دي في الآخر شخصية كارتونية، بس افتكروا إن كلنا بنلبس جلبية وصديري، وكل واحد ساحب وراه معزة، وبنتنقل بالجمال. فالنتيجة إن أحلام اللي جاي يزورنا في إنه ياخد سلفي مع ناس بتلبس صديري على جلبية بتتحطم بدري، ولو صمم أوي في موضوع السيلفي وصعب علينا، بناخده المتحف النوبي، ياخد سيلفي مع التماثيل فيه وهو فاهم إننا وديناه بيت جد بكار الكبير، وبيطلع مبسوط أوي الحقيقة.

هي المعيز حيوانات أليفة في أسوان زي القطط والكلاب؟

ودي تعتبر امتداد للأسطورة اللي فاتت وتأثير بكار على جيل التسعينات، الأسوانيين والنوبيين مابيعتبروش المعيز حيوانات أليفة، يعني كل طفل هناك ماعندوش معزه بتروح معاه المدرسة، رغم إن الماعز الجبلي موجود في كل حته ومعروف جدا حوالين العالم، لكن ممكن تلاقي واحد مربي تمساح عادي، وبيراعيه في بيته لحد ما يوصل طول معين بعدين يسربه، بس هو عموما فيه حب من الأطفال لأي حاجة صغيرة بتمشي على أربع رجلين.

حسين فهمي بيجي عندكم كل سنة زي ما قال في فيلم مافيا؟

المصدر- مشهد من فيلم مافيا

السؤال اللي نزل على دماغي زي جردل مياه رمته ست مصرية على عيال بتلعب كورة تحت بلكونتها، كان "هو حسين فهمي بيجي عندكم كل سنة زي ما قال في فيلم مافيا؟"، كنا وقتها في مركب في النيل وقدامي منظر تحفة، شوفته ألف مرة، وكل ما أعدي قدامه أتثبت، السؤال جاني في وقت كنت فيه في ملكوت تاني، الزمن وقف ومستوعبتش اللي قاله، فطلبت منه يعيد، حاولت استشف من ملامحه أي ريحة هزار، لا مش معقول تكون مصدق مشهد جيه في فيلم، كنت مستغرب إن في ناس للدرجة مش بتفصل بين الواقع والسينما. بصراحة كان باين عليه إنه بيحب حسين فهمي جداً، فمرضيتش أكون سبب في تدمير العلاقة الجميلة اللي بينهم. شغلت له "زي ما هي حبها".

الفضول حلو، عن نفسي شخص فضولي، بس لما بقرر أروح بلد محتاج أعرف عنها، عن ثقافة أهلها، لأن ضروري هحتك بالناس هناك، بعمل سيرش بسيط على الانترنت، أسأل دايرة معارفي قبل ما أسافر، وده بيجنبني مواقف ساعات كتير بتبقى بايخة. ومع كتر السفر السفر إتعلمت إن مفيش بلد في الواقع زي الأفلام.

لو ناوي تروح أسوان قريب اتعرف على كلمات نوبية تقرب من أهل البلد (8 كلمات نوبية هتساعدك في رحلتك لأسوان)، وعشان السكة طويلة جهزنا لك ليست (سيدة المسافات الطويلة)، أسيبك تحضر الشنط.