share this article

واضح إن حصلت حالة غيرة سياحية بين الهند وإيطاليا؛ وبعد ما الهند عملوا جولات ليلية تخلي تاج محل يبقى مفتوح للسياح بالليل طول الشهر، إيطاليا قررت تعمل نفس الموضوع في متاحف الفاتيكان اللي هيبقى فيها جولات سياحية ليلية بعيد عن الزحمة بتاعة الصبح.

في العادي المكان بيبقى مفتوح من الساعة 9 الصبح لحد الساعة 6 بالليل، ده غير الطوابير اللي ملهاش آخر على شباك التذاكر مهما حاولت تروح بدري في أي يوم من أيام الأسبوع، عشان كده النصيحة دايماً اللي بتتوجه للسياح هي إنهم يحجزوا التذاكر أونلاين حتى قبل ما يسافروا إيطاليا، لكن الجولات الجديدة هتكون فرصة إنك تقدر تستمتع بالمكان من غير زحمة مبالغ فيها ابتداءاً من الساعة 7:30 بالليل.

سعر الجولة الليلية هيبقى 69 يورو (حوالي 1200 جنيه) ومدتها ساعتين ونص، هيكون فيها مرشد سياحي هياخد الزوار في مجموعات من 12 فرد بس، شاملة طبعاً كل المعارض والغرف اللي في المتاحف، وأهم حاجة فيهم كنيسة سيستينا أو Sistine Chapel، ورغم إن فرق السعر كبير عن سعر الجولة العادي اللي بتبقى تذكرتها بـ28 يورو (500 جنيه) أو الجولة اللي بتبقى بمرشد سياحي بـ52 يورو (حوالي 900 جنيه) لكن أكيد فيه فرق كبير بين إنك تزور المكان معاك 11 نفر بس غيرك، وبين زحمة الأمم اللي بتبقى حاصلة في العادي اللي ماشيين بقوة الدفع في أوقات كتير.

تقدروا تحجزوا الجولة الجديدة من اللينك ده.

المصدر: Lonely Planet