share this article

مصر بتضم عدد كبير جدًا من المحميات الطبيعية، اللي موزعة بين محميات برية ومحميات بحرية. وليها أهمية بيئية كبيرة، غير أهميتها في علم دراسة الأرض –الجيولوجيا، وعلم الحفريات، والأركيولوجيا- اللي ساعد العلم الحديث في معرفة عمر الأرض والإنسان، وحتى دراسة طبيعة صخور كوكب المريخ. هنا جمعنالكم أهم 24 محمية في مصر ليها أهمية وشهرة عالمية.

القاهرة
محمية الغابات المتحجرة

المصدر- wikimedia

الغابة المتحجرة هضبة مساحتها 7 كيلومتر، فيها بقايا حفريات لحيوانات انقرضت، وأشجار ضخمة عملت تشكيلات مع مرور الزمن على هيئة غابة متحجرة، عمر حفريات وأشجار المحمية بيمتد للعصر الأوليجوسين، من حوالي 32-35 مليون سنة. المحمية تعتبر من أهم المواقع الأركيولوجية في العالم. وبتقع على بعد 18 كيلومتر شرق مدينة المعادي، القاهرة، شمال طريق القطامية، العين السخنة.

محمية وادي دجلة

المصدر- الحياة

محمية وادي دجلة بتضم حفريات عمرها أكتر من 60 مليون سنة، وأكتر من 20 كائن حي، منها السلحفاء المصرية المهددة بالانقراض. مساحة المحمية بتوصل لـ 60 كيلومتر، وهي مجموعة من الوديان اللي على جانبيها ترسبات لأحجار جيرية في أشكال جميلة، ارتفاعها حوالي 50 كيلومتر. المحمية شرق حي المعادي، الصحراء الشرقية، القاهرة.

الجيزة
محمية قبة الحسنة
تقع في منطقة أبو رواش في الجيزة، على طريق القاهرة الإسكندرية الصحراوي، 30 كيلومتر من أهرامات الجيزة. ليها أهمية علمية كبيرة، لأن فيها عدد كبير من النباتات القزمية المدفونة تحت الأرض، والشعب المرحانية، والكائنات الأسفنجية اللي بتساهم في معرفة عمر الأرض. المحمية مش كبيرة، حوالي كيلومتر واحد، لكن أهميتها أكبر من مساحتها.

مطروح
محمية العميد

المصدر- hesed

محمية العميد واحدة من أكبر المحميات وأكتر تنوعًا بين المحميات المصرية، مساحتها حوالي 700 كيلومتر، وفيها أكتر من 170 نوع نبات بري، و70 نوع نبات بيستخدم في صناعة الأدوية، وفي المحمية حيوانات منها اللي مهدد بالانقراض، الغزال والثعلب والجربوع وأبو شوك وقاضي الجبل والحرباء والعقرب. تقع على بعد 83 كيلومتر من إسكندرية، الساحل الشمالي، مرسى مطروح.

محمية واحة سيوة

المصدر حور عين

واحة سيوة من أكبر المحميات الطبيعية في مصر، حوالي 7800 متر، ومهمة جدًا عالميًا، اكتشف فيها أكبر حفرية لحوت في العالم، بيرجع عمره لـ 73 مليون سنة، وسلاحف برمائية وثعابين بحر وأنواع من فرس البحر والقروش متسجلتش قبل كده. المحمية كمان بتضم 40 نوع لنباتات طبية، و32 نوع من الزواحف اللي أغلبها معرض للانقراض، وغزلان بيضا وحمرا، بالإضافة للفهود. المحمية جنوب غرب محافظة مطروح، قرب الحدود المصرية الليبية، 820 كيلومتر من القاهرة تقريبًا.

شمال سيناء
محمية الزرانيق

المصدر Wikiwand

محمية الزرانيق ببحيرة بردويل أعلنتها منظمة Birdlife International نقطة راحة للطيور المهاجرة، لأن الطيور اللي بتهاجر من أوروبا وآسيا هربًا من برودة الشتاء وبحثًا عن أكلها في أفريقيا بتستريح فيها، وبتتزود بالأكل والمياه منها، بيصل عدد أنواع الطيور اللي بتستريح فيها لـ 270 نوع في شهر أغسطس وسبتمبر. المنطقة بقت مكان جذب للسياحة البيئية، وكمان لأن فيها 11 نوع من الثديات اللي على وشك الانقراض، و22 من الزواحف، غير الحياة المائية في البحيرة، وعدد كبير من النباتات المنتشرة في المحمية. مساحة المحمية 250 كيلومتر، 68% منها بحيرة بردويل. المحمية في محافظة شمال سيناء، شمال طريق العريش، القنطرة.

محمية الأحراش

المصدر mapio

محمية الأحراش واحدة من المحميات المهمة اللي موجودة في شمال شرق مصر، محافظة شمال سينا، مدينة رفح، على الحدود مع فلسطين. مساحة المحمية حوالي 6 كيلومتر مربع. بيعيش فيها عدد كبير من النباتات والزواحف البرية. وتعتبر نقطة استراحة للطيور المهاجرة. المحمية على ارتفاع 60 متر فوق سطح البحر، وتحتها كمية كبيرة من المياه الجوفية.

جنوب سيناء
محمية رأس محمد

المصدر wikimedia

محمية رأس محمد من أشهر المحميات البحرية في العالم. مساحتها 480 كيلومتر مربع. موجودة على بعد 12 كيلومتر من مدينة شرم الشيخ، جنوب سينا، في نقطة التقاء خليج العقبة والسويس. سبب شهرة المحمية هي حاجز المرجان اللي محاوط شبه جزيرة رأس محمد من كل جوانبها. والكائنات البحرية النادرة اللي بتعيش في كهوف شكلتها الزلازل تحت الجزيرة.  دا غير السلاحف البرمائية والقرش الأبيض المهدد بالانقراض. المحمية كمان نقطة استراحة للطيور المهاجرة، زي البلشون والنورس. وفيها عدد من الحيوانات المهددة بالانقراض في الجزء البري من المحمية، أهمها الوعل النوبي، وزواحف وحشرات ليلية.

محمية سانت كاترين

المصدر wikimedia

أهمية محمية سانت كاترين إن فيها أعلى قمم جبلية في مصر، اللي كان نتيجة حدث حصل من 24 مليون سنة، بيتسمى الخسف الإفريقي الأعظم اللي نتج عنه البحر الأحمر وخليج العقبة والسويس. السياحة في المكان ده معتمدة على تسلق قمم جبال كاترين، زي جبل كاترين وموسي وسربال وأم شومر والثبت. لكن في المحمية أكتر من مرتفعات للتسلق، المحمية فيها حياة برية متنوعة جدًا، فيها الغزال المصري، والوبر، والنمر السينائي، والذئب، والضبع، والثعلب، والحردون، والقنفد العربي، والفأر الشوكي، والجربوع. كمان فيها 27 نوع من الزواحف زي الثعبان والطريشة والضب والورل. غير إن في المحمية 22 نوع نبات من أندر نباتات في العالم، زي السمو، والحبك، والقيصوم، والزعتر، والشيح، والعجرم، والبعيثران، والطرفة، والسكران. وفي المنطقة كتير من الأديرة اللي بيرجع تاريخها للعصر البيزنطي. مساحة المحمية 4250 كيلومتر مربع. المحمية موجودة في شمال محافظة جنوب سيناء.

محمية نبق

المصدر booking

محمية نبق مميزة بإنها بتضم شعاب مرجانية ممتدة على مساحة 130 كيلومتر، وكائنات بحرية وبرية كتيرة. بالإضافة لغابات المانجروف. وفيها الغزل، والوعل، والضبع، وزواحف وطيور مهاجرة ومقيمة. غير وجود اللافقاريات. المحمية مساحتها 440 كيلومتر مربع في البر، و130 كيلومتر مربع في البحر، موجودة بين مدينة دهب وشرم الشيخ. المحمية بقت جذابة لمحبي الغوص ومراقبة الطيور.

محمية أبو جالوم

المصدر wikimedia

محمية أبو جالوم في وادي الرساسة، على طريق شرم الشيخ- طابا. المحمية على مساحة 500 كيلومتر مربع، ومليانة بعدد كبير من الحيوانات البحرية والبرية والزواحف والطيور. لكن أكتر ميزاتها هي إنها بتضم 165 نوع من النباتات، منهم 40 نوع مش موجود غير في محمية أبو جالوم. كمان كهوفها البحرية اللي على أعماق 100 متر تحت البحر، من الكهوف البحرية المشهورة عالميًا.

محمية طابا

المصدر أ ف ب

محمية طابا من أجمل المحميات الطبيعية في مصر، فيها حياة برية منوعة، زي الغزال المصري، والذئاب، والضباع اللي بتعيش في شبكات من الوديان اللي لها أشكال صخرية مميزة. وطيور مقيمة على قمم الهضاب في المحمية، زي النسر أبو دقن والنسر الذهبي. ومن أسباب أهمية المحمية، وعوامل الجذب الرئيسية فيها إن فيها حوالي 480 نوع نبات مختلف. دا غير عيون المياه الجوفية العذبة، زي عين حضره بوادي غزاله، وعين أم أحمد بوادي الصوانا، وعين فورتاجا بوادي وتير. المحمية كمان مطلة على البحر الأحمر، وفيها تنوع في الكائنات البحرية مش موجود زيه في العالم. مساحتها أكتر من 3500 كيلومتر مربع. وموجودة في محافظة جنوب سيناء، طريق نوبيع، طابا.

بور سعيد
محمية اشتوم الجميل

المصدر wikimedia

المحمية بتضم بوغازي الجميل، وأشتوم الجميل، وبحيرة المنزلة، اللي تعتبر أكبر بحيرات الدلتا. البحيرة والمحمية حواليها اتشكلت نتيجة زلزال حصل فى أواخر القرن السادس الميلادى. المحمية بتضم عدد كبير من الكائنات البرية، وعدد متنوع من الكائنات البحرية. وفيها بيستريح بعض الطيور المهاجرة، غير الطيور المقيمة فيها. مساحتها 180 كيلومتر مربع. و موجودة في محافظة بورسعيد.

الفيوم
محمية وادي الريان

المصدر steemit

شهرة محمية وادي الريان راجعة لاكتشاف وادي الحيتان، اللي عمره بيرجع لـ 40 مليون سنة، فيها حفريات لحيتان وأصداف وكائنات بحرية منقرضة، ونباتات متحجرة. لكن في المحمية حاجات كتير تانية، أشهرها الشلالات اللي اتكونت من مياه الصرف الزراعي. وفيها 4 عيون كبريتية، بيستغلها الزوار في علاج الأمراض الجلدية. وفيها كمان 16 نوع من النباتات البرية، و16 نوع من الزواحف، و15 نوع من الحيوانات البرية، وأكتر من 100 نوع من الطيور المهاجرة والمقيمة. مساحة المحمية 1759 كيلومتر مربع. وبتقع في جنوب غرب محافظة الفيوم.

محمية بحيرة قارون

المصدر المصري اليوم

محمية بحيرة قارون شمال محمية وادي الريان، في محافظة الفيوم. مساحتها 1385 كيلومتر مربع. وتعتبر من أقدم البحيرات الطبيعية فى العالم، وهى الجزء الفاضل من بحيرة موريس القديمة، واللي كانت مشهورة عالميًا برواسب حفرية بحرية ونهرية وقارية عمرها حوالي 40 مليون سنة، منها حيوان الفيوم الضخم اللي شبه الخرتيت. كمان كان فيها مصب نهري كبير، عمل طبقات تراسبية صخرية، فيها حفريات لأسلاف الأفيال القديمة مع حيوان الفيوم وأسلاف فرس النهر وبالإضافة للدلافين وأسماك القرش وأسلاف الطيور اللي انقرضت. وظهر فيها حفريات أقدم قرد فى العالم "ايجيبتوبثكس"، اللي بيرجع عمره إلى عصر الأوليجوسين، وفيها عدد قليل من الأشجار المتحجرة. وعدد كبير من أنواع الزواحف والبرمائيات والثدييات. لكن شهرة المحمية الأكبر راجعة للآثار التاريخية المهمة الموجودة شمال بحيرة قارون، واللي بترجع للعصر الروماني والفرعوني. والمنطقة فيها كنائس وأديرة تاريخية.

كفر الشيخ
محمية البرلس

المصدر wikipedia

محمية البرلس في شمال شرق فرع رشيد، محافظة كفر الشيخ. مساحتها 460 كيلومتر. البحيرة نفسها تعتبر تاني أكبر بحيرة طبيعية في مصر. بيعيش فيها وحواليها حوالي 135 نوع نبات. غير التنوع البيئي – بحري وبري - الكبير في الكائنات الحية.

البحر الأحمر
محمية جبل علبة

المصدر Ali Dora

محمية جبل علبة في جنوب محافظة البحر الأحمر، مثلث حلايب، على الحدود المصرية السودانية، أكبر محمية طبيعية في مصر، مساحتها 35600 كيلومتر مربع. تعتبر أهم محمية في مصر، لأن فيها غابات الشورى والقنديل "مانجروف" فى المناطق الساحلية. وفيها واحات الضباب، وجبال وتلال ساحلية. وبيئتها مستوطن لغالبية أنواع الحيوانات والطيور والزواحف والنباتات الطبية والبرية المصرية المهددة بالانقراض. والمحمية عبارة عن مجموعة من المناطق الموزعة بين جزر بحرية وسواحل وهضاب وجبال وغابات، زي جزر البحر الأحمر، وغابات المانجروف الساحلية.

محمية وادي الجمال

المصدر wikipedia

محمية وادي الجمال في جنوب محافظة البحر الأحمر بتضم جزء من ساحل البحر طوله 60 كيلومتر. فيها حوض وادي الجمال، ودة واحد من أكبر و أغنى أودية الصحراء الشرقية، وفيها كائنات من أندر الأنواع المهددة بالانقراض. ومن الأماكن المشهورة كمان جبل حماطة، من أعلى جبال الصحراء الشرقية. وأحراش المانجروف، وشعاب مرجانية ميزة لأنها لسه مش معروفة لكتير من السياح، عشان كدة لسة على طبيعتها. كمان فيها جزر بحرية بتتكاثر عليها الطيور والسلاحف البحرية. محمية وادي الجمال معروفة كمان إن فيها أجمل ناظر ممكن تشوفها عينك في محميات مصر.

بني سويف
محمية كهف سنور

المصدر wikipedia

محمية كهف سنور فيها تراكيب جيولوجية شكلها جميل جدًا، وعمرها بيرجع لـ 60 مليون سنة، عصر الأيوسين. مساحة الكهف حوالى 700 متر، واتساعه حوالى15متر، وعمقه حوالى15متر. موجودة على بعد 40 كيلومتر شرق مدينة بني سويف. الكهف له أهمية عالمية، لإنه ساعد الجيولوجيين في معرفة عمر الأرض.

أسيوط
محمية وادي الأسيوطي
محمية وادي الأسيوطي موجودة على بعد 20 كيلومتر جنوب محافظة أسيوط، على طريق القاهرة، أسيوط الصحراوي. بتعتبر منطقة بيتكاثر فيها عدد كبير من الحيوانات المهددة بالانقراض. وبيعملوا فيها محاولة لتجميع أنواع مهددة بالانقراض من النباتات. وأوديتها بتضم 357 سلالة من الكائنات الحية البرية، و87 نوع من الطيور، و66 نوع من النباتات البرية الطبية، وأكتر من 105 أنواع من الفطريات اللي بتستخدم في صناعة الأدوية، وفيها 12 نوع زواحف، زي الثعابين والسحالي والسلاحف، وحوالي 30 نوع من الحيوانات البرية، أهمها الغزال الأبيض والمصري والأرنب البرى. مساحتها حوالي 35 كيلومتر مربع.

الوادي الجديد
2حديقة الصحراء البيضاء

المصدر Egyptian geographic

حديقة الصحراء البيضاء على بعد 45 كيلومتر شمال واحة الفرافرة بالوادي الجديد. أهمية المحمية إنها حديقة من الصخور الطباشيرية اللي اتكونت من رواسب جيرية من ملايين السنين، وفي المحمية حفريات لكائنات انقرضت.  و مومياوات وأدوات وكهوف من عصور ما قبل التاريخ. والمحمية بتمتد على مساحة 3010 كيلومتر مربع.

محمية نيزك جبل كامل
محمية نيزك جبل كامل أحدث محمية اكتشفت في مصر، وهي موجودة جنوب محافظة أسوان، في منطقة توشكى، بين جبل كامل وجبل العوينات. في المحمية فوهة نتجت عن اصطدام نيزك بالأرض، قطر الفوهة 45 متر، وعمقها 16 متر، وتعتبر أهم فوهة نيزك موجودة على الأرض، لأنها جديدة نسبيًا، ولإنها ساعدت علماء كتير على استكشاف صخور كوكب المريخ، لأن النيزك سقط من منطقة قريبة منه. واتحط جزء من صخور النيزك في المتحف الجيولوجي المصري.

أسوان
محمية وادي العلاقي
محمية وادي العلاقي موجودة على بعد 180 كيلومتر جنوب محافظة أسوان، تحديدًا جنوب شرق بحيرة ناصر. المحمية في الأصل وادي كان بيعدي فيه مياه عذبة نازلة من جبال البحر الأحمر المجمعة من الأمطار. وبعد بناء السد جزء منها غرق بمياه بحيرة ناصر اللي اتكونت ورا السد. في المحية 15 نوع من الثدييات، 16 نوع من الطيور، و92 نوع من النباتات، وعدد كبير من الحشرات. وفيها كمية كبيرة من المعادن، أهما الذهب واليورانيوم. مساحة المحمية حوالي 275 كيلومتر مربع.

محمية سالوجا وغزال

المصدر wikipedia

محمية سالوجا وغزال أصغر محميات مصر، حوالي نص كيلومتر مربع. المحمية عبارة عن مجموعة جزر نيلية، موجودة شمال الشلال الأول في محافظة أسوان، وعلى الرغم من صغرها إلا إن فيها 94 نوع مختلف من النباتات، بعضها مش بيطلع غير في جزر النيل بس. وفيها 60 نوع من الطيور المهاجرة والمقيمة، بعض الطيور دي مهدد بالإنقراض، زي الواق والهدهد والأوز المصري.

مصر فيها أماكن كتير جميلة ميعرفش بعض سكانها إنه ممكن يزورها، حاجة جميلة إنك تتفرج على المناظر اللي وهبها ربنا لمصر، مناظر طبيعية ملعبش فيها إيد بشر، لسه بتحمل طابعها النقي اللي بيساعد الإنسان على تأمل التنوع في مخلوقاته.