share this article

 بلاد كتير حلوة في أسيا وأمريكا اللاتينية وأفريقيا أسعارها رخيصة ومناظرها الطبيعية برقبة أمريكا وأوروبا. وفي منها دول الجنيه المصري أقوى من عملة البلد، بس ده مش لازم يبقى بالضرورة دليل على إنك هتعيش هناك ملك زمانك، عشان كده هنقولك القيمة الشرائية للفلوس المصري قد إيه، بمعنى لو معايا 100 جنيه مصري أقدر اشتري بيهم إيه في كل بلد من البلاد دي؟

1-
لبنان مش معني ان الجنيه ب 86 ليرة يعني الأسعار في الأرض هناك. بيروت تعتبر بلد غالية ومتقدرش تشتري ب 100 جنيه مصري غير وجبة هابي ميل من ماك وكانز. يعني أغلى من مصر بحبة مُحترمين. يكفي إني أقولك إن أجرة التاكسي ممكن توصل ل 3000 ليرة، بالإضافة إلى إنك تقدر تتعامل هناك بالدولار الأمريكي، اللي بيعتبر عملة مقبولة للتعاملات اليومية، تقدر تعرف اجراءات سفرك للبنان وممكن كمان تعرف أهم مهرجانات الموسيقية في لبنان عشان تظبط سفرياتك عليها. 

2- تشيليتشيلي مكانها في أمريكا الجنوبية وفيها جزر بتطل على المحيط الهادي. مشكلة أمريكا الجنوبية في الأغلب ما بتبقاش في الفلوس اللي بتصرفها جوه الدولة، لكن الفلوس اللي بتصرفها في تذكرة الطيران، بس احب ابشرك إنك تقدر تشتري ب 100 جنيه مصري ازازة مياه صغيرة وبيج ماك وكانز كمان، وده تفريبًا نفس الأسعار في مصر، فهتقدر تبرطع براحتك.

3- كولومبياكولومبيا من أجمل بلاد أمريكا اللاتينية، كفاية إنها أهدت للعالم "شاكيرا"، واللي بالمناسبة مش عليها اهتمام سياحي كبير أوي. أسعارها مش غالية أوي، تقدر تشتري ب100 جنيه ازازة مياه وماك ميل، يعني قريب من تشيلي، بس تشيلي أرخص.

4- الهندالهند هي أشهر بلد في أسيا بسبب الديانات المختلفة والثقافات الكتير والأكل السبايسي وأكتر من مليار نسمة. تعرف تشتري ب100 جنيه حاجات كتير من الهند ازازة مياه صغيرة وماك ميل وكانز وكوباية كابتشينو كمان. يعني أرخص كمان من مصر. لو مُتحمس تسافر، اعرف ازاي تطلع الفيزا بتاعتك للهند.

5- إندونيسيااندونسيا مختلفة شوية عن الهند لأن فيها مُسلمين كتير ففي أكل حلال ومناسب. انت مش هتعرف تهرب من الرز في أي حتة، يعني ماك بيقدم رز وفراخ، هتعرف تشتري بال 100 جنيه كابتشينو وازازة مياه صغيرة وماك ميل. الأسعار هناك زي مصر بظبط تقريبًا مع فرق تقديرات العملة ده اللي هيخليك مليونير هناك وماسك فلوس كتير، اندونسيا كمان فيها حاجات غريبة أوي، وده يخليك عايز تروحلها أكتر وتشوفها. اجراءات السفر لاندونسيا مش صعبة خالص ممكن تشوفها من هنا.

6- الياباناليابان بلد غالية حتى لو عملتها أقل بكتير من الجنيه المصري، يعني هتقدر تشتري بال 100 جنيه ازازة مياه وكابتشينو وكانز بس، مش هيكون أكتر من كده، بس من ناحية تانية اليابان من أجمل بلدان آسيا، وكلنا شوفنا أجزاء كتير منها واحنا مش حاسين في الأفلام الأنمي، اللي كلها صناعة اليابان، يعني تأكد إنك مطبوع في دماغك على الأقل جبل فوجي في اليابان ومشهد لأشجار الساكورا لو انت شوفت كارتون زي كونان أو مازنجر.

7- تايوانتايوان مش من البلاد المشهورة سياحيًا بالنسبة لسكان الشرق الأوسط على الرغم من جمالها ورخصها النسبي بالنسبة لباقي الدول. تقدر تشتري ب 100 جنيه ازازة مياه صغيرة وكانز وماك ميل، بننصحك تحطها في جدول زيارتك لآسيا.

8-تنزانيا
 بينا شوية بقى على أفريقيا. تنزانيا من أجمل بلدان أفريقيا، تقدر تعمل فيها حاجات كتير جدا بس أجمل حاجة ممكن تتعمل هناك هي السفاري وسط الطبيعة البكر والحيوانات وانك تطلع جبل كليمنجارو، أسعارها برضه مش أرخص حاجة وكل اللي تقدر تشتريه ب 100 جنيه هو كانز وماك ميل.

9- اوكرانيا
أوروبا الشرقية مش كل الدول اللي فيها أسعارها رخيصة، بس أوكرانيا بالنسبة للمصريين من وجهاتهم المُفضلة لأنها حتة من أوروبا بجمالها ورفاهيتها وفي نفس الوقت أسعارها مش غالية أوي. تقدر تشتري ب 100 جنيه مصري كابتشينو وازازة مياه صغيرة ومعاها ماك ميل، عمار يا أوكرانيا.

10- فيتنامفيتنام هي وجهة سياحية جديدة بسبب تاريخها الطويل والمتاحف اللي بتوثق حرب أمريكا والفيتنام لو إنت مهتم بالسياحة التاريخية. ده غير ابتدى فيها سياحة مع الأسعار في الفيتنام معقولة وتقدر تشتري بال 100 جنيه ازازة مياه صغيرة وماك ميل وكانز. 
معلومة على جمب بما إننا جبنا سيرة ماكدونالدز، اللي بيقدمه المطعم بيختلف من بلد للتانية يعني في بلاد أسيا بيقدموا رز وطعم الفراخ واللحمة بيكون مختلف وبيقدموا أكل فيجترين كمان وأكل سبايسي، مثلًا في الهند عندهم ساندوتش اسمه مهراجا. يعني على حسب ثقافة البلد بيختلف أنواع الأكل المعروضة بس برضه مش بتكون شبه الأكل الشعبي للبلد.