share this article

الفترة الأخيرة قدرت مصر إنها تحجز مكان في أهم قوائم مجلات ومواقع السفر والسياحة، كسبت المركز التاني كأفضل وجهة للغطس في العالم في 2019، وكانت في المركز الرابع بين الوجهات السياحية الأسرع نمو في العالم، غير كمان "ناشيونال جيوجرافيك" اللي اختارت مصر من بين أفضل الرحلات اللي الناس ممكن تروحلها في 2020.

وعلى مستوى المدن بقى كانت القاهرة على قائمة Lonely Planet لأفضل مدن سياحية في 2020، ومن قريب كمان اختارت Euromonitor القاهرة برضه ومعاها الغردقة على اعتبارهم من ضمن المدن اللي استقبلوا أكتر عدد سياح في 2018 و2019، يعني في كل ناحية هتلاقي مدينة أو مكان تحب تزوره في مصر وتحديداً بقى واحنا داخلين على الشتا رسمي؛ والجو هيبتدي يبقى برد ونبقى محتاجين نهرب لمكان فيه شوية شمس مشرقة ودرجة حرارة أعلى من العادي، عشان كده جمعنالكم شوية من أحلى الوجهات المناسبة للشتا واللي تقدر تروحها سواء كان كل المتاح ويك إند سريعة أو لو عندك أجازة طويلة تاخد فيها مشوار لحد أسوان.

1- مرسى علم  المصدر: Abraham Zakhary

رغم إنها مش مكان قريب بس بقت من أكتر الأماكن في مصر اللي الناس بتحب تروحلها في الشتا سواء مصريين أو أجانب، خصوصاً إنها من أهم الوجهات اللي لازم تتراح لو كنت بتحب الغطس أو السنوركل أو kitesurfing، وكمان مع افتتاح مطار برنيس المنتظر قريب جداً هيكون أسهل كمان إنك تروح هناك مع إنه فيه مطار تاني موجود اللي هو المطار الرئيسي في مرسى علم، بس برنيس كمان هيقرب المسافة ناحية الجنوب أكتر.

أهم الحاجات اللي لازم تعملها لما تروح هناك:

1) لو بتغطس تبقى أكيد عارف إن مرسى علم من أحلى الأماكن اللي تشوف فيها شعاب مرجانية وحياة بحرية مش زي أي حتة تانية في مصر، ولو مش بتغطس يبقى إحنا بنقولك إن جيه الوقت وده المكان اللي تبدأ فيه وتاخد كورسات أو حتى تجرب الموضوع.
2) لو مش ناوي على الغطس يبقى خليك في المرحلة اللي قبله اللي هي السنوركل، تقدر تعمل سنوركل مع السلاحف في أبو دباب.
3) لازم تزور محمية القلعان، أول قرية مستدامة بالكامل في مصر وبتشتغل كلها بالطاقة الشمسية، غير إن المحمية نفسها مكان جميل تقضي فيه يوم في هدوء واسترخاء وطبيعة.
4) اطلع رحلة بحرية لجزيرة سطايح، المكان اللي الناس بتروحله عشان تشوف أكبر تجمع للدلافين وتتفرج على اللعب والشقلبظات اللي بيعلموها.
5) عدّي على شاطىء النيزك، موجود على بُعد 8 كيلو تقريباً جنوب مرسى علم وبيتصنف إنه من أحلى الشواطىء الموجودة في مصر، ده لأنه عبارة عن حمام سباحة طبيعي في وسط اليابس بس موصول بالبحر بسبب نيزك غير من شكل المكان هناك، أو بسبب عوامل الطبيعة؛ مفيش قصة ثابتة عن المكان بس الثابت هو إنه مكان ميتفوتش.

2- الأقصر المصدر: osiristours

تقريباً لازم كل يومين يكتشفوا آثار جديدة أو مقبرة أو مومياء في الأقصر، أصل تخيل برضه مكان فيه تلت آثار العالم! يعني متحف مفتوح طول مانت ماشي حواليك آثار مش بتخلص ولا حتى في أسبوع، مدينة سهل تروحها يا إما طيران يا إما برحلة القطار اللي بتخليك تتفرج على الجزء القبلي من مصر في الطريق، أو حتى تاخد قطار النوم لو مش عايز تحس بطول الطريق، ومتنساش تعمل رحلة بالمنطاد كمان وقت الشروق أو وقت الغروب وتتفرج على المدينة من فوق.

أهم الحاجات اللي لازم تعملها لما تروح هناك:

1) معبد الكرنك  لازم ييجي في أول ليستة الأماكن اللي تروحلها هناك، أهم مكان بيمثل العبادات والديانات في مصر الفرعونية بمعبد آمون رع في وسطه كمان.
2) وادي الملوك والملكات اللي فيه 63 مقبرة ملكية عند الملوك و75 تقريباً عند الملكات، المكان اللي بتشوف فيه حجم الإبهار اللي الفراعنة كانوا بيتعاملوا بيه في المقابر الملكية.
3) معبد حتشبسوت .. المعبد اللي تصميمه المعماري مميز عن الشكل المعتاد للمعابد اللي على الضفة الغربية، وعبارة عن 3 أدوار بيوصل بينهم الطريق المايل اللي شفناه في أفلام كتير وكل الناس بتتصور عنده.
4) متحف الأقصر بالمجموعة الكبيرة جداً اللي فيه من الأنتيكات والقطع الأثرية من أول الممالك القديمة لحد العصر المملوكي.
5) رحلة نيلية لأسوان .. اللي هنتكلم عنها دلوقتي حالاً.

3- أسوان المصدر: cruisemapper

اللي رايح الأقصر بيروح أسوان معاها؛ دي حاجة معروفة يعني في الوسط السياحي، ويمكن حلاوة الموضوع كمان في إن كل واحدة فيهم شخصية وروح غير التانية تماماً، يعني خلصنا الجولات الطويلة الأثرية الثقافية في معابد ومزارات الأقصر، ندخل بقى على الهدوء والإسترخاء في أسوان اللي بتتعرف إن ناسها من أطيب وأحسن ناس ممكن تتعامل معاهم، يمكن عشان كده كل حاجة فيها مرتبطة بالاسترخاء والروح الحلوة.

أهم الحاجات اللي لازم تعملها لما تروح هناك:

1) متحف النوبة واللي هيكون فرصة إنك تفهم أكتر وتعرف عن مملكة كوش أو المملكة النوبية القديمة.
2) جزيرة فيلة في وسط النيل وفرصة تانية تتفرج على آثار بس أوبشن الهدوء والروحانية لسه موجود بسبب طبيعة المكان.
3) جزيرة النباتات برضه في وسط النيل وواحدة من أهم المزارات السياحية في أسوان ومن أقدم حدائق النباتات في العالم، فيها أكتر من 380 نوع من الزرع والنباتات والأشجار النادرة.
4) قضّي يوم في فندق سوفيتيل أولد كاتاراكت اللي طول عمره بيستقبل زوار ومشاهير من كل حتة في العالم زي ونستون تشرشل والأميرة ديانا؛ بس بقى مشهور زيادة لما اتصور فيه مسلسل "جراند أوتيل" بتاع عمرو يوسف.
5) معبد أبو سمبل، الإعجاز الفرعوني في الهندسة والعمارة والفلك، بالذات بقى لو رحت في وقت ظاهرة تعامد الشمس على رمسيس التاني واللي بتحصل مرتين في السنة، مرة في 22 أكتوبر يوم ميلاده والمرة التانية يوم 22 فبراير يوم تتويجه ملك على مصر.

4- واحة سيوةالمصدر: Safareya

لأن واحة سيوة بعيدة ده بيخليها مش من الأماكن الزحمة أو فيها سياح كتير، بس الأكيد إن أي حد راح هناك بيرجع يقول إن المشوار مستاهل؛ حتى لو هتقضي يومين بس وسط السلام النفسي اللي في المكان ومع أهلها المحتفظين بطريقة حياتهم التقليدية البسيطة زي ما هي، ولو بتفكر في رحلة قريب يبقى لازم تبص على دليل سفرية لكل اللي محتاج تعرفه عن سيوة.

أهم الحاجات اللي لازم تعملها لما تروح هناك:

1) ابتدي بجولة بالعجلة تخليك تتفرج على الواحة كلها الأول ومش هتكلفك أكتر من 50 جنيه في اليوم.
2) معبد آمون أو معبد وحي آمون، أشهر موقع أثري في سيوة بالذات بسبب الفيو البانورامي بتاعه على الواحد كلها، وهو المكان اللي كانوا أهل سيوة عايشين فيه قبل ما يسيبوه بسبب الهجمات الكتير اللي كانت بتحصل عليهم من العرب والبدو.
3) افطر فطار حلو في مطعم عبده في وسط الواحة أو في مطعم كنوز، هتلاقي قعدات حلوة مع أهل سيوة وأغانيهم وأكل محصلش.
4) اتفرج على الغروب في جزيرة فطناس أو جزيرة طغاغين أو من على جبل دكرور.
5) متسناش تاخد غطس في ينابيع المياه السخنة اللي هناك.

5- محمية راس محمدالمصدر: Egypttoursplus

محمية راس محمد هي المكان المثالي لأي حد بيدور على فصلان ومغامرة وسط الجبال والطبيعة، على بُعد 12 كيلو من شرم الشيخ وفيها كل المناظر الطبيعية اللي ممكن تتخيلها من جبال ووديان وبحر وصحرا، تقدر تاخد خيمتك وتبات هناك بس لازم تكون عامل حسابك وواخد كل اللي ممكن تحتاجه في رحلة التخييم لأنك هتبقى بعيد عن أي حاجة.

أهم الحاجات اللي لازم تعملها لما تروح هناك:

1) الغطس والسنوركل أكتر حاجة حلوة تعملها هناك بين الشعاب المرجانية اللي كمان قريبة من الشاطىء يعني مش هتحتاج تسرح كتير جوة البحر، كمان ممكن تتفرج على حطام السفينة يولاندا والشعاب المرجانية الموجودة فيها.
2) اتفرج على أشجار المانجروف النادرة الموجودة جنب البحر.
3) محمية راس محمد مكان غني جداً بحاجات كتير زي الحياة البرية والطيور وتعالب الصحرا والسلاحف، وكمان فيه نباتات كتير وزرع وأعشاب.
4) مينفعش تكون في مكان معزول كده ومتقضيش السهرة بتتفرج على النجوم في السما بأوضح طريقة ممكن تشوف فيها النجوم.
5) اتفرج على الشروخ الكبيرة الواضحة في حتت من الأرض والجبال اللي اتكونت بسبب زلزال حصل من آلاف السنين وأعاد تشكيل شكل الأرض هناك.

6- نويبعالمصدر: Pinterest

أكتر مكان تقدر تهرب وتروحله عشان تنسى دوشة الحياة اليومية، وأحسن وقت تروح فيه نويبع هو في الشتا، الجو بيبقى حلو ومشمس؛ برد شوية بالليل بس مع القعدة والهدوء اللي هناك وشكل الحياة البسيطة في أي كامب هتختار تنزل فيه؛ هتقضي أجازة لطيفة وتغيير جو وبعيد عن أي وجهة تانية من الأماكن اللي بتبقى زحمة بالسياح.

أهم الحاجات اللي لازم تعملها لما تروح هناك:

1) فيه كامب معروف أوي في نويبع اسمه Star Beach وسواء كنت قاعد هناك أو قاعد في مكان تاني؛ نصيحة مننا لازم تروح تقضي عندهم ليلة تتفرج بس على النجوم.
2) لازم تزور "نواميس" ودي مقابر حجرية يُقال إن تاريخها بيرجع لحوالي 4000 سنة قبل الميلاد، وفيه اعتقاد كمان إن المقابر نفسها عمرها أكبر من العضم اللي لاقوه في المقابر دي يعني أقدم كمان.
3) نويبع يعني قريب من جبل موسى، يعني hike حلوة كده لحد القمة فوق أي نعم شوية مجهود بس دي للي بيدور على مغامرة بالذات لو مطلعتش جبل موسى قبل كده، ويُفضّل طبعاً تبتدي مشوار الطلوع بالليل عشان توصل تتفرج على الشروق فوق.
4) رحلة للـColored Canyon وسط التشكيلات الصخرية اللي هناك، واللي هتبقى محظوظ لو رحت في يوم الشمس فيه كانت حلوة وتمتّع نظرك بقى بانعكاس الأشعة على ألوان الصخور.
5) عيش حياة البدو في واحة "عين خضرة" مكان تقدر تعيش فيه وسط الزرع والخضرة ومع السكان المحليين اللي طبعاً هتاكل عندهم أحلى أكل بدوي.

7- دهبالمصدر: Dahabtours

دهب في الكام سنة اللي فاتوا بقت hub لأصحاب المزاج اللي بيعتبروها مكان بموود وشخصية غير أي حتة تانية تروحها في مصر، الحياة فيها بسيطة وفي نفس الوقت فيها كل اللي ممكن تحتاجه من أول العجلة اللي ممكن تتحرك بيها طول سفريتك لحد الأوتيل الـ5 نجوم لو مش عايز فرهدة، والأهم طبعاً إنها المكان اللي بيجمع هواة الغطس والسنوركل بالذات لو عايز تاخد كورس وتبقى غطاس محترف، عليك وعلى الممشى هتلاقي على ناحية كل المحترفين اللي ممكن تغطس معاهم والناحية التانية كل أشكال المطاعم والكافيهات حسب ذوقك اليومي ايه.

أهم الحاجات اللي لازم تعملها لما تروح هناك:

1) محمية راس أبو جالوم واللي طريقك ليها بيوريك إزاي هتبقى معزول عن بقية الكوكب هناك، بتوصلها يا إما بالجمال أو بالزودياك أو تعمل هايك، وتروح تنسجم بقى مع الطبيعة والجبال اللي محاوطة المكان.
2) البلو هول واللي بتجمع كل الناس سواء اللي رايحين بس يعملوا سنوركل أو غطاسين محترفين نازلين يستكشفوا العالم اللي تحت لحد 26 متر وأكتر تحت سطح البحر.
3) فيه طريقة حلوة تتفرج بيها على دهب وهي إنك تأجر حصان أو جمل ويا سلام لو وقت الغروب وبعد ما تخلص تقعد على البحر مع كوباية شاي في ايدك.
4) دهب معروفة بالستايل البوهيمي وعشان تستكشف ده أكتر تقدر تحضر يوجا أو جلسة تأمل، ومن خلال ناس وجروبات كتير هناك ممكن تعمل كذا حاجة من دول على كذا يوم حسب إنت قاعد أد ايه، وساعتها رحلتك تبقى أخدت سكة روحانية من الهدوء والسلام النفسي وتفريغ الطاقة السلبية.
5) في دهب عندك اختيارات كتير أوي للأكل ما بين المأكولات البحرية أو المطاعم المختلفة الإيطالي والكوري والهندي واليوناني والمصري، غير الكافيهات اللي ممكن تاخد فيها قطعة كيكة العسل المشهورة في كل زاوية تقريباً.

8- سهل حشيشالمصدر: oberoi

تقدر تعتبر سهل حشيش هي النسخة الشتوية من الساحل الشمالي بس الفرق إنها على البحر الأحمر وقريبة من الغردقة، المكان اللي تروحله لو بتدوّر على قرية سياحية شيك أو أوتيل فاخر وبتبقى مناسبة جداً لرحلة عائلية، بس كمان لأنها في الكام سنة اللي فاتوا بقت وجهة بتتعمل فيها حفلات كبيرة ف ده خلاها اختيار أساسي لجروبات الأصحاب اللي عايزين سفرية حلوة في الكريسماس أو راس السنة أو في أول بريدج طويل في السنة الجديدة.

أهم الحاجات اللي لازم تعملها لما تروح هناك:

1) جولة سريعة بالعجلة وقت الغروب بطول الكورنيش في المدينة القديمة.
2) ممكن تروح تتفرج على المدينة الغرقانة واللي متعتبرش مدينة أوي يعني بس هي مكان صناعي مغمور بالمياه ومع الوقت ابتدى يتكون فيه حياة بحرية وشوية شعاب مرجانية، بس هو تجربة سنوركل لطيفة في العموم.
3) جرب تغطس في جزيرة أبو حشيش، منطقة محمية بطول 1 كيلو متر في البحر وفيها حياة بحرية وشعاب مرجانية.
4) رحلة سفاري وسط الصحرا وجبال البحر الأحمر وهتلاقي اختيارات كتير في القرية أو الأوتيل اللي هتنزل فيه هناك يسهّل عليك الموضوع.
5) تقدر تقضي السهرة وسط المدينة لما بيبقى المكان حيوية وفيه مزيكا وأغاني في المطاعم والكافيهات أو لو فيه ايفينت معمول هناك وجه بيبقى الطبيعي بما إننا في الموسم دلوقتي وجه وقتها من السنة.

9- الفيومالمصدر: wikimedia

أهم ميزة في الفيوم هي إنها على بُعد ساعة وربع من القاهرة، وتاني أهم ميزة إن الجو هناك حلو تقريباً طول السنة، مش هيبقى برد أوي ولا حر أوي أياً كان إنت رايح امتى، والفيوم مكان غني جداً بتاريخ طويل فرعوني وقبطي وإسلامي غير إن فيها أنشطة كتير تقدر تعملها، اخترنالك منهم الخمسة اللي هنقولهم تحت دول.

أهم الحاجات اللي لازم تعملها لما تروح هناك:

1) قرية تونس اللي هتقدر فيها تطلع الفنان اللي جواك وتعمل أحلى قطع فنية بالفخار، ولو مش عايز تشترك بنفسك تقدر تتفرج على الفنانين وهما بيبدعوا أو حتى تعمل شوبينج وسط الشغل اللي بيعلموه هناك واللي فيه مدارس كمان بتعلمه.
2) الرمل في الفيوم حلو أوي لدرجة إن بيتعمل رحلات صد رد لـsand boarding وأشهر مكان هناك هو "قصور العرب".
3) وادي الحيتان؛ واحد من ضمن مواقع التراث العالمي اللي على قائمة اليونسكو، واللي فيه هياكل عظمية للحيتان، وجنبها كمان ممكن تعدّي على البحيرة المسحورة؛ متخافش ده السحر الحلو مش السحر المرعب واتسمت كده لأن ألوان البحيرة بتتغير على مدار اليوم ومع انعكاس ضوء الشمس عليها.
4) لازم تروح بحيرة قارون وممكن تصطاد سمك هناك أو حتى تقعد وتستمتع بالفيو.
5) ممكن تعمل رحلة برضه للغابات المتحجرة، هتلاقيها في منطقة جبل قطراني شمال بحيرة قارون، وبتعتبر أكبر غابة متحجرة في العالم فيها أشجار متحجرة بارتفاع 40 متر وموجودة بالمنظر ده على مدار آلاف السنين.

10- الواحات البحريةالمصدر: Pinterest

في كل الأماكن اللي اتكملنا عنهم فيه منهم بعيد حبتين عن القاهرة وفيه اللي قريب، والواحات تعتبر بين البينين على بُعد 4 أو 5 ساعات من القاهرة، بس من الأماكن اللي متتراحش غير في الشتا، طبيعة الجو بتاعها مع ينابيع المياه والنخل اللي هناك بتخليها مكان مثالي يستاهل المشوار.

أهم الحاجات اللي لازم تعملها لما تروح هناك:

1) طبعاً سمعت عن الصحرا البيضا والصحرا السودا، ومن أساميهم كده إنت فعلياً هتروح تلاقي مكان غالب على لون الرمل والصخور اللي فيه اللون الأبيض، وفي الصحرا السودا هتلاقي غالب على لون الرمل والصخور اللون الأسود.
2) جبل الإنجليز أو جبل ديست، ده أعلى نقطة في الواحات وتقدر منه تشوف منظر بانورامي لكل حاجة حواليك، واتسمى بالاسم ده لأن الإنجليز كانوا بيسخدموه كإنه برج مراقبة بسبب ارتفاعه، لكن كمان الجبل ده اتعرف بحفريات الديناصورات اللي لقوها هناك من ضمنهم حفريات ضخمة لقوها سنة 2001.
3) تقدر تروح مركز الحيز للتعليم المائي، بناه معهد بحوث البيئة المستدامة في قرية بنفس الاسم، والهدف منه إنه يعلم ويثقف المزارعين والمهندسين والزراعيين ايه هي الطرق الفعالة اللي يقللوا بيها استهلاك المياه أو يعيدوا استخدامها في الإنتاج الغذائي، عشان يقدروا يواجهة قلة الموارد المائية وزيادة السكان وكمان التغير المناخي اللي بيحصل .. نقدر نقول إن زيارة مكان زي ده هتضيف جزء توعوي وشوية مذاكرة كده عالماشي للي بيهتم بمجال البيئة والزراعة.
4) "عين جمعة" ده عبارة عن ينبوع مياه بارد ونقي وصافي جداً، وكمان جنبه فيه كافيه مميزة جداً وممكن تقضي وقتك بين العين والكافيه.
5) بحيرة الجفارة، عبارة عن واحة صغيرة وسط الواحات الكبيرة وفيها عدد 2 ينابيع مياه واحد سخن وواحد ساقع.