share this article

الموضوع ده اتنشر لأول مرة على مشروع سفر، ويعاد نشره في Safareya بالإتفاق مع إدارة الويب سايت.

روحت لندن لمدة 13 يوم في الشتا مع العيلة، وكانت من أمتع الرحلات اللي عملتها في حياتي. بعد رحلة صغيرة "أربع ساعات ونص" على مصر الطيران وصلنا مدينة الضباب وبدأنا الإكتشاف. لندن مليانة سياح وأغلبهم عرب، لدرجة إني مرة ركبت أتوبيس كان كله سياح وماكنش فيه غير السواق بس الإنجليزي. الأسعار هناك غالية عمومًا، بس لما بتبعد عن المناطق السياحية كل حاجة بتبقى أرخص مليون مرة طبعًا.
ممكن تعرف تطلع فيزا انجلترا ازاي لو انت مصري أو لبناني أو إماراتي.

الإقامة
المكان اللي قعدنا فيه كان مجموعة شقق فندقية كدة اسمها Oxbridge Apartments دي كانت في حتة اسمها Cromwell Road. أقرب حاجة في المنطقة دي هي سلسلة محلات هارودز وفي محطة مترو قريبة جدًا منها حوالي 5 دقايق مشي. كنا حاجزين استوديو صغير هناك. من مميزات الفندق إن قدامه على طول Sainsbury’s، أكبر سوبرماركت ممكن تشتري منه كل اللي إنت عايزه.

المواصلات
في كارت لطيف معمول للمواصلات اسمه Oyster Card ده فيه كذا أوبشن سواء تاكسي، أتوبيس، أو الأتوبيس والمترو مع بعض. ممكن تعمله شهري أو سنوي حسب الفترة اللي هتقعدها. التاكسيات غالية جدًا بس طبعًا ده عشان فرق العملة كبير. 
*ممكن تقرأ برضه | ازاي توفر فلوس مواصلاتك في لندن

نيجي بقى للأنشطة أو الأماكن السياحية:

برج إليزابيث وساعة بيج بنمصدر الصورة: modafinilsale
على أد ما هي من أهم معالم المدينة وناس كتير بتيجي عشان تشوفها إلا إنك لما تروح هناك هتكتشف إنها عادية جدًا ومش مستاهلة تضيع عليها وقت. يمكن متعتها الوحيدة إنك تشوفها وهي بترن - بترن كل ساعة - وطبعًا تتصورعندها.

London Eyeمصدر الصورة: kkday
هتوصلها بسهولة بمجرد إنك تعدي كوبري من عند بيج بن. وهتلاقي سياح على الكوبري قاعدين بيتصوروا بس ده مش أحسن مكان تتصور فيه. غير إن بالليل بيبقى شكلها مختلف عن الصبح بسبب الأنوار.
التذكرة كنا واخدين عليها عرض عشان كنا عيلة. لو أقل من 12 سنة بتبقى نص تذكرة. وفي تذكرة بتبقى شاملة خريطة بتفتحها بتعرف منها مكان كل حاجة. ممكن تزود فلوس وتخش المسرح تتفرج على فيلم زي وثائقي كدة عن المكان وممكن تتصور جوة ويركبولك الصورة كأنك واقف على London Eye نفسها.
أنا جبت تذكرة شاملة المسرح ودخول London Eye، المكان مليان محلات هدايا لو عايز تشتري سوفنيرز. بعد كدة بتطلع London Eye بتاخد حوالي ربع ساعة في اللفة الواحدة، و دي عبارة عن كبسولة فيها كنبة في النص وفيه زي آي باد فيه برنامج بيشرحلك إيه اللي قدامك. طبعًا المنظر من فوق رهيب وملوش وصف.
هي حلوة لإنك ممكن تقضي اليوم هناك و بعد ما تخلص تروح ملاهي صغيرة جمبها، وتتفرج على العروض اللي الناس بتعملها في الشارع وحواليك جنينة خضراء جمالها مش طبيعي.

Changing Guardsمصدر الصورة: GETTYIMAGES
حدث بمواعيد محددة في الأسبوع. الشوارع بتبقى مفتوحة حوالي قبلها بساعة بس إنت بتروح قبلها بـ 3 ساعات عشان تلاقي مكان حلو. القصر قدامه ميدان في شارع آخره المقر بتاع الحرس، ده المكان اللي بيتغير فيه جرس القصر الملكي. الشوارع حوالين المكان بتتقفل ومفيش عربيات ولا ناس تعدي الشارع، لو وقفت في حتة معينة مش هتعرف تتحرك غير لما الحراس يبدلوا والحدث يخلص.
اللي بيحصل إن طقم الحرس بيجوا بالمشية العسكرية وحواليهم خيول من مبنى الحراس ولابسين اللبس بتاعهم، في نفس الوقت الحراس اللي جوا القصر بيتجمعوا كلهم وبيبقوا جاهزين عشان يبدلوا، بيقفوا قدام بعض، ويطلع راجل منهم بينادي أسامي وكل واحد حسب اسمه يبدل مع المجموعة التانية.
عن نفسي حسيتها حاجة مملة وعادية مش مستاهلة أصحى بدري عشان حاجة بتقعد نص ساعة وبتخلص، حسيتها حاجة واخدة شهرة زيادة عن اللزوم.

Hyde Parkمصدر الصورة: videoblocks
دي جنينة كبيرة جدًا، طول ما إنت ماشي في عجل للإيجار. مهم تجرب العجلة قبل ما تاخدها عشان في عجل بيبقى فيه عيوب. المعلومة دي مهمة عشان لو خدت العجلة قدامك 24 ساعة وترجعها، لو عايز تبدلها لازم تدخل الكريديت كارد تاني ويحسب عليك فلوس تاني.
أنا نصيحتي إنك لو روحت مش هتعرف تلفها برجلك كلها فتاخد عجلة أحسن. فيه أماكن مينفعش تمشي فيها بالعجلة بس ينفع تاخدها جمبك وتمشى بيها فمش هتتعب. كل ما تتمشى هتكتشف حاجات مختلفة وجديدة.
لو الجو حلو ومعاك ناس ممكن تقضي يوم كامل هناك مش هتزهق. في معالم سياحية مختلفة هناك وبحيرات تقعد تتفرج عليها وتتصور جمبها وحيوانات صغيرة في كل حتة. أنا عن نفسي بحب الأنتخة فممكن أقعد يوم كامل في Hyde Park من غير مشكلة.

Oxford streetمصدر الصورة: Andrew Meredith
مش مسموح فيه غير الأتوبيسات والتكاسي وأقرب محطة مترو ليه Marble Arch ومش مسموح بدخول عربيات ملاكي. شارع بتاع كيلو أو اتنين كيلو كله محلات من كل الماركات اللي ممكن تتخيلها وهو مُهيأ عشان الناس تتمشى فيها وتتفرج على المحلات. فيه محلات وماركات مختلفة هناك مش هتشوف زيها.

مول WestFieldمصدر الصورة: retailgazette
عامل زي سيتي ستارز مفيش فرق عنه، بس مليان براندات برضه. ليه فرعين واحد في Shepherd’s Bush ده اللي روحته والتاني ناحية الـ Olympic Park

Edgware Road

ده من أول ما بتدخله لغاية آخره كله محلات العرب ومحلات الشيشة وأكل حلال. ده من أكثر الشوارع اللي مش بتقفل غير متأخر أو متأخر شوية عن بقية المحلات في لندن. هتلاقي فيه القهوة التركي والشيشة المعسل وكده. مش هتتعامل غير مع عرب هناك.

London Bridge
مصدر الصورة: wikipedia
مفيهوش حاجة بس كون إنك تمشي عليه دي حاجة حلوة لوحدها. المنظر من عليه والقاعدة جمبه رهيبة وبيفتح وبيقفل على طول. فيه هناك زي سفينة من أيام الحرب أثرية الناس بتروح هناك مخصوص عشان تتفرج عليها.

Kyoto Garden – Holland Park

جنانين مريحة ولطيفة جدًا فيها بحيرات صناعية جواها سمك ملون وحيوانات حواليها كتير زي السناجب والحمام وطواويس وبط، جو هادي ولطيف بعيد عن الدوشة بتاعت المدينة.

ستاد ستامفورد بريدج أو الإمارات مصدر الصورة:burohappold 
ده للناس اللي بتحب الكورة هيستمتعوا هناك جدًا لما يدخلوا اثنين من أحلى استادات لندن. لو عرفت تحضر ماتش طبعًا يبقى حظك حلو بس دي حاجة صعبة شوية عشان أسعار التذاكر غالية بشكل مبالغ فيه، غير إنه لازم تحجزها قبلها بفترة. الجوالات اللي جوا الإستاد هي أكثر حاجة تقدر تعملها وفي نفس الوقت بتبقى جولة ممتعة جدًا بتشوف فيها كل حتة في الملعب.

Covent Garden
مكان مليان ناس بتغني وعروض طول الوقت حلوة وبتتفرج عليها ببلاش، ممكن تقعد في كافيه أو مطعم لو حابب تتغدى وتقضي نص يوم هناك.

متحف الشمع، مدام توسومصدر الصورة: pinterest
أشهر متاحف العالم، فرع المتحف اللي في لندن فيه بتاع 400 شخصية معمولين بالشمع. يستاهل الصراحة من كتر ما الشخصيات شكلها حقيقي فهتنبهر بيها وهتقعد بقى تتصور مع الشخصيات دي. بيبقى ممتع أكثر لو معاك صحابك أو عيلتك.

لو مهتم السفر للندن، شوف نصائح عن أنشطة تانية ممكن تعملها من هنا