share this article

الموضوع ده اتنشر لأول مرة على مشروع سفر، ويعاد نشره في Safareya بالإتفاق مع إدارة الويب سايت.

من كتر حبي ليها روحتها مرتين، أول سفرية كنت مع أهلي وكنت بشوف البلد لأول مرة، تاني مرة مع أصحابي وكنت أنا المرشدة السياحية بتاعتهم، خلتهم يحبوها قدي وأكتر كمان، لدرجة إن كل مكان فيها ساب ذكرى لكل واحد فيهم من جمال البلد.
من سفري هناك مرتين، دول بالنسبالي أحلى 10 أماكن تتراح في برشلونة:

Las Ramblas

مصدر الصورة:musement
ده من أهم و أشهر الشوارع في برشلونة وغالبًا من أطولهم. أوله ميدان واسع فيه تماثيل ونافورات. كله محلات من الجانبين وفي النص فيه مطاعم ومحلات هدايا عشان لو حبيت تشتري سوفونيرز. بس أهم حاجة وإنت ماشي في الشارع ده ماتنساش تدخل في الشوارع الفرعية منه لأن فيها محلات وميادين تانية، آخر الشارع ميدان تاني فيه تمثال جميل برضه وتحته محل هدايا وبعد كده بقى هتلاقي البحر قدامك.

Mercat de La Boqueriaمصدر الصورة: renttopapartments
سوق كبير في نص شارع La Ramblas فيه كل حاجة بمعنى كل حاجة، هتلاقي كل أنواع الأكل وأشكاله من حلويات ولحوم وأسماك وبهارات وحاجات تانية كتير. تقدر تشتري كل اللي إنت عايزه من هناك وتبقى تسويه على كيفك.

Zoo de Barcelonaمصدر الصورة: exit21
دي من أنضف حدائق الحيوانات اللي شفتها وفيها كل أنواع الحيوانات اللي ممكن تتخيلها فعلًا، يعني فيها حيوانات ماشفتهاش ولا هشوفها في حياتي. شفت أصغر ضفدع اللي هو قد عقلة الصباع، وكمان فيها كل أنواع القرود والعصافير واتفرجت على الحيوانات اللي قربت تنقرض. غير كده، تقدر هناك تحضر عروض الحيوانات المائية. حديقة الحيوان كبيرة أوي فلازم تاخد خريطة عشان تبقى عارف تروح فين وعشان لو عايز تشوف حيوان معين تلاقيه بسهولة.

(رأي Safareya).. على الرغم من إن حدائق الحيوان اللي بتتعامل مع الحيوانات بشكل سليم أقل ضررا من باقي حدايق الحيوانات، إلا إننا كإدارة مجلة "Safareya" مع إغلاق كافة حدائق الحيوان، وإعادة الحيوانات بعد تأهيلها لموطنها الأصلي، وفي نفس الوقت ده ما يخليناش بننتقد أي شخص بيروح جنينة الحيوانات ويتبسط فيها خصوصا لو أطفال، نتمنى كل الكائنات الحية تعيش على الأرض في انبساط وسلام وحرية بدون أقفاص أو انتقاص من حقوقهم في الحياة.

Camp Nou – Barcelona Museumمصدر الصورة: fcbarcelona
ده من أهم الأماكن اللي لازم لازم تتشاف لأن بكل بساطة ده الكامب نو. الإستاد مفتوح تمامًا من المدرجات للملعب لغرفة المعلقين لغرفة التغيير. أحلى حاجة إنك تقدر تقعد في أي مكان من دول الوقت اللي تحبه وماحدش هايقولك ممنوع والتصوير طبعًا مفتوح في أي مكان. المعرض بتاع الإستاد متعة تانية، فيه كل الجوائز اللي برشلونة كسبتها على مر العصور ومش بس لكرة القدم.
من الأماكن اللي عجبتني فيه كانت أول أوضة لما تدخل، فيها شاشات ضخمة من أول ما بتدخل لآخر الغرفة، بيتعرض عليها كل اجوال الفريق. تاني أوضة هتدخلها من أحلى الأماكن برضه، مليانة شاشات كبيرة وصغيرة بيعرضوا عليها ناس كتير من كل الجنسيات بيغنوا أغنية الفريق. الفيديوهات معمولة بطريقة رائعة لدرجة إنها بتخلي جسمك يقشعر من كتر الحماس. وماتنساش طبعًا تدخل محل برشلونة الرسمي جوة الإستاد.

Castell de Montjuïcمصدر الصورة: guia.barcelona
القلعة دي موجودة علي قمة جبل ومنها بتشوف برشلونة كلها بمبانيها وبحرها من فوق، شجر وشلالات و زرع كتير ألوانه مختلفة. مكان خرافي بمعنى الكلمة، معمول للراحة النفسية والإستجمام، ده غير إن الجبل نفسه كله مليان جناين وشلالات تانية. وساعات بيحطوا بروجكتور ويعرضوا أفلام.

W Hotelمصدر الصورة: cvent
الفندق ده من أغلى الفنادق في برشلونة لإنه بيبص على البحر، وهو جزء من سلسلة فنادق مشهورة. بس ده مايمنعش إنك تشوفه، والسياح هناك بيروحوا عشان يتفرجوا عليه طول الوقت. كمان في مطعم أكله جميل جدًا هناك والقاعدة في أي مكان في الفندق عامًة تستاهل.

MNAC ) Museu National D’Art de Catalunya)مصدر الصورة: barcelonanavigator
أو متحف الفن الوطني لكتالونيا، ودة مصمم بطريقة مميزة ومختلفة والقطع الفنية اللي فيه تستاهل تتشاف، سواء تماثيل أو لوح وروسومات. قدام المتحف على طول فيه نافورة كبيرة وبليل المكان بيتحول لقعدة كبيرة وإضاءة حلوة وموسيقى وأغاني.

Sagrada Famíliaمصدر الصورة: iStockphoto
دي من أحلى وأقدم الكنائس اللي شفتها هناك. اليونيسكو صنفوها كمعلم من معالم التراث العالمي. مكان روحاني لازم تدخله لأنه من جوة أحلى بكتير من برة رغم شكلها الرهيب وإنت بتشوفها من بعيد من غير ما تدخلها حتى. مهم إنك تشتري من على الإنترنت تذكرة الدخول قبل ما تروح عشان تتجنب زحمة الطوابير.

Park Güellمصدر الصورة: muralswallpaper
من أهم المعالم اللي هتنبسط لما تزورها. وإنت هناك هتلاقي نفسك طالع هضبه كده، بعدها محلات ومطاعم على الجانبين وفي محل مهم لازم تدخله، فيه فيلم قصير عن حياة المهندس اللي عمل المكان "أنطوني جودي"، وتاريخ المكان و ازاي إتعمل بالطريقة الجميلة دي. الحديقة دي فيها ساحة كبيرة بيبقي فيها عروض رقص أحيانًا، ده غير الفن اللي موجود في كل ركن فيها.

Flamenco Danceمصدر الصورة: Photo Special to the Sun
عرض قمة في المتعة، بيعيشوك معاهم برقصهم وأغانيهم، في أكتر من عرض مختلف بيتعمل في كذا مكان هناك، لو هتقدر تدخلهم كلهم إدخلهم ومش هتندم.

طبعًا في أماكن تانية كتير في برشلونة لازم تتراح، بس في رأيي دول أحلى الأماكن، لو خلصت كل دول يبقى ماتنساش تعمل Boat Trip و Bus Tour وتركب الـ Segway و Telefrico del Puerto.

لو تعرف أماكن تانية في برشلونة لازم تتراح؟ ابعتلنا وعرفنا عليهم.