share this article

تفتكر ايه هيكون أحسن من إن يكون عندك 10 أيام ورا بعض أجازة! أجازة الربيع وشم النسيم خلاص قربت ولازم لو ناوي تستغلها صح تبدأ التخطيط ليها من دلوقتي. طبعًا لو عايز تقضيهم في مصر فإنت عندك دهب وسيوة مُناسبين جدًا في إنك تقضي أجازة لطيفة فيهم، بس افرض إنك عايز تطلع بره مصر؟ أنا عارف إن الباسبور المصري مش دايما بيساعدنا ندخل كل الدول اللي بنحبها، وفي أغلب الأوقات بيكون عائق بينا وبين البلد اللي عايزين نسافرها، بس الموضوع مش بالسواد اللي إحنا شايفينه ده لأن لسه في بلاد نقدر نسافر لها بالباسبور المصري من غير فيزا وبأسعار قليلة نسبيًا.

1- نيبال


نيبال هي بلد جميلة جدًا ومش هتصدق ده غير لما تروح تشوفها بعينك وهي أكتر مكان مناسب ليك لو إنت شخص بيحب الصيف. الجو بيكون دافي الصبح بين 25 و30 درجة وبالليل درجة الحرارة بتنزل ل15. في العموم الجو حلو أوي وبيساعدك إنك تستمتع بجمال المناظر الطبيعية والجبال من حواليك.
أكتر حاجة مُسلية بقى إن نيبال تقدر تخشلها بفيزا بتطلع من المطار في ساعتها، كل اللي عليك إنك تملى أبليكشن أول ما توصل هناك وبس كده. بس لو إنت شخص بتحب تكون مظبط كل حاجة من قبليها، فممكن تملى الأبليكشن أونلاين من قبلها وشوف من هنا اجراءات فيزا نيبال للمصريين عشان تعرف كل الخطوات البسيطة اللي تعملها قبل سفريتك بما يخص الأوراق والدوشة اللي بنكرهها قبل كل سفرية.
عظيم جدًا! بس أنا برضه أروح نيبال ليه؟ نيبال فيها طبيعة مميزة ومعابد بوذية وسيخية ودي كلها حاجات ممكن تعملها بأسعار قليلة أو ببلاش. ممكن تنزل كاتماندو، عاصمة نيبال وتقعد في أي هوستيل هناك، الأسبوع فيه أرخص من ليلة في فندق 5 نجوم في شرم الشيخ. المدنية مليانة معابد اللي هتعرف فيها كتير عن الديانات والثقافات المختلفة، وعندك كمان The Monkey Temple  وده من أهم الأماكن اللي لازم تزورها في العاصمة، لأنك منه هتشوف شكل المدينة كلها من فوق. بعدين تروح بقى Thamel  وده الشارع التجاري والسياحي عندهم، هتلاقي محلات وبازارات في كل حتة عشان لو بتحب الشوبينج.
لو مش عايز تقضي الوقت كله في العاصمة بس ممكن تطلع على بوخارا. ودي مدنية في نيبال بتبص على بحيرة عملاقة وسلسلة جبال. هناك في أنشطة كتير ممكن تعملها زي النط بالمظلات أو Hiking. في كمان هناك بارات لطيفة ممكن تروحها زي Old Blues Bar وسينما هايلة فوق تل إسمها Movie Garden، مُتخيل تتفرج على فيلم حلو على ضوء النجوم؟

متوسط الطيران لنيبال في إبريل: 8000-9000 جنيه مصري
متوسط سعر ال 8 ليالي للفرد في هوستيل: 600-1400 جنيه مصري
متوسط سعر ال 8 ليالي لفردين في فندق: 800-5000 جنيه مصري
متوسط الفلوس اللي هتحتاجها  للفرد الواحد في اليوم عشان الأكل: 70-90 جنيه مصري

2- اندونسياالمصدر:sarahbeekmans

اندونسيا برضه تقدر تخشها من غير فيزا. وفي العموم أسيا كلها مشهورة بمناظرها الطبيعية الجميلة. الجو في شهر إبريل لطيف لأنه بيكون الفاصل بين موسم الجفاف وموسم الممطر، درجة الحرارة بتكون 20 في معظم المناطق بس الرطوبة هناك عالية جدًا بسبب المسطحات المائية وبتمطر مطر غزير في أي وقت. ممكن تروح تكتشف مدينة  باندوغ المشهورة بمزارع الشاي، والمعمار اللي متبقي من عصر الاستعمار الهولندي، ده غير إنها مشهورة كمان بالبراكين. هي بعيدة بمسافة 150كم عن جاكرتا، عاصمة اندونسيا وكفاية عليها يومين بس عشان تشوف خليط بين الصينين والعرب والهنود والأوربيين وتداخل ثقافتهم مع بعض.
اندونسيا هي أرخبيل جزر، فمن المتوقع إن شواطئها جميلة وكتيرة أوي وكل شاطىء مميز بحاجة شكل. عندك جزيرة بادار ودي  مشهورة بإن المنظر من عندها جميل جدًا ويعتبر من أحلى المزارات الطبيعية في العالم. جزيرة كومودو ودي مشهورة بإن فيها أكبر سحالي في العالم وإسمها Komodo Dragon Lizard. وفي كمان جزيرة جيلي ودي مشهورة بالرملة البيضاء والشعاب المرجانية.
لو مروحتش "بالي" أكنك مسافرتش اندونسيا. بالي ملهاش علاقة بإنك بتقضي شهر العسل خالص دي سمعة كده طالعة عليها. لأنك ممكن تسترخي فيها وممكن تعمل أنشطة كمان. "بالي" فيها معابد كتير، وشواطىء حلوة، وجبال، وبراكين خامدة. ممكن كمان تزور جبلاية القرود اللي هناك أو تعمل تجديف في شلالات Tegenungan لو إنت مقطع السمكة وديلها مغامرات.

متوسط الطيران في إبريل: 8000-9000 جنيه مصري
متوسط سعر ال 8 ليالي للفرد في هوستيل: 1800-3500 جنيه مصري
متوسط سعر ال 8 ليالي لفردين في فندق: 1200-6000 جنيه مصري
متوسط الفلوس اللي هتحتاجها  للفرد الواحد في اليوم عشان الأكل: 80-100 جنيه مصري

 3- هونغ كونغ المصدر: Discover HongKong

بعد فترة حوالي 150 سنة تحت الحكم البريطاني. استردتها الصين في أواخر التسعينات، وبقى لهونغ كونغ كيان مُستقل لدرجة إنك متقدرش تخش الصين من غير فيزا بس تقدر تخش لهونغ كونغ وتقضي فيها مدة مش أطول من 3 شهور من غير فيزا عادي. وهي بلد مميزة بإن فيها أعلى ناطحات سحاب في العالم،  وشبكة المواصلات فيها متطورة جدًا. هناك هتقدر تشوف ثقافة وتقاليد الصين في كل حتة. في هونغ كونغ أنشطة كتيرة تقدر تعملها، كفاية بس إنك تتمشى في الشوارع وتملي عينك من جمالها، أو تروح الأسواق وتعمل شوبينج وتشتري هدايا لأصحابك. بمناسبة إننا قولنا موضوع ناطحات السحاب ده، فإنت تقدر تاخد معدية في البحر بتلففك على كل ناطحات المدينة وياسلام بقى لو روحت بليل هتستمع بأعظم عرض صوت وضوء. كمان ممكن تروح قمة فيكتوريا ومن عليها تقدر تشوف الجزيرة بأكملها.
هونغ كونغ فيها جناين كتير ومتاحف وكل حاجة ممكن تكون عايز تعملها، حتى إن فيها ديزني لاند. في كمان هناك ملاهي إسمها Ocean Park وهي تعتبر أحسن ملاهي في أسيا من ناحية الألعاب اللي فيها والحيوانات البرية.

متوسط الطيران في إبريل: 9000- 10000 جنيه مصري
متوسط سعر ال 8 ليالي للفرد في هوستيل: 2300- 4500 جنيه مصري
متوسط سعر ال 8 ليالي لفردين في فندق: 4000- 20000 جنيه مصري
متوسط الفلوس اللي هتحتاجها  للفرد الواحد في اليوم عشان الأكل: 200- 250 جنيه مصري

4- ماليزيا    المصدر: The Travel Intern 

ماليزيا تشبه أندونسيا لحد كبير بالنسبة للمناظر الطبيعية وإنت كمصري مش محتاج فيزا عشان تخشها. أحسن وقت تروح فيه بين شهر4 و10 عشان بعد كده بيكون موسم المطر وده هيمنعك إنك تكون في أماكن مفتوحة. ممكن تزور هناك جزيرة لانكاوي اللي معروفة بشواطئها الجميلة وجوها المشمس والأسواق الحرة اللي ممكن تشتري منها كل حاجة محتاجها بأسعار أقل. والجزيرة مناسبة سواء إن كنت هتقضي شهر عسل أو مسافر تتفسح لوحدك. كمان ممكن تزور جزيرة بينانغ اللي شوية فيها مظاهر حضارية عن لانكاوي ودي فرصة كويسة عشان تشوف جانبين مختلفين للمدينة. لو عندك فرصة في إنك كمان تشوف Malacaa هتبقى حاجة حلوة أوي لأنها مدينة كانت مستعمرة من البرتغاليين، وهتلاقي فيها المعمار المميز، والمتاحف، ومعارض فنية وحاجات كتيرة مناسبة للسياح اللي عندهم روح المغامرة والاستكشاف. المدينة ثرية بتاريخها وبالخلفيات الثقافية اللي فيها، لدرجة إن فيها متاحف كتير مبنية عشان تحافظ على المحتوى والمواقع الأثرية اللي عندهم، زي متحف أورانغ أسلي وده بيعرض تاريخ السكان الأصليين لماليزيا، ومتحف بابا نيونيا اللي بيحكي عن تاريخ والخلفية الثقافية لمجموعة من الصينيين من أصول رفيعة قرروا إنهم يهجروا ماليزيا ويعملوا المتحف ده. بعيدًا بقى عن المتاحف فالمدينة كمان مُناسبة لمُحبين الطبيعة لأن فيها غابة بوكيت باتو ليبيه، و بحيرة آير كيروه، وجناين فيها ألاف من أنواع الورد المختلفة. كمان مينفعش إنك تزور البلد من غير ما تشوف عاصمتها كوالالمبور، وهنا إنت جيت شوية للزحمة والمعمار الحديث وبعدت عن الأماكن الطبيعية والمتنزهات. بس النايت لايف هناك حلوة أوي وفي بارات كتير بيفضلوا فاتحين طول الليل زي Zouk Club، وممكن تاخد عشاء غالي في Marini’s on 57 اللي موجود في رووف توب، وبيقدم أكل إيطالي وكحوليات وبيبص على البرجين التوأم وهم من أشهر معالم ماليزيا. عشان رحلتك ميكونش ناقصها حاجة في ماليزيا، زور كهوف باتو اللي فيها مجموعة من المعابد المُبهرة.

متوسط الطيران في إبريل: 8000- 9000 جنيه مصري
متوسط سعر ال 8 ليالي للفرد في هوستيل: 600- 3000 جنيه مصري
متوسط سعر ال 8 ليالي لفردين في فندق: 5000- 1200 جنيه مصري
متوسط الفلوس اللي هتحتاجها  للفرد الواحد في اليوم عشان الأكل: 100- 150 جنيه مصري

5- لبنانالمصدر: Opening a Bottle

فيزا لبنان تطلعها في المطار عادي أول ما توصل. الجو في إبريل جميل أوي وأكتر وقت مناسب لرحلة. بيروت هي عاصمة لبنان فيها حاجات كتير أوي ممكن تجربها زي المتاحف والمناظر الطبيعية وتاريخها العريق. أحلى حاجة في بيروت حفلات الموسيقي بأنواعها المختلفة اللي بتتعمل هناك، يوم تسمع جاز ويوم روك. أحلى بارات هتلاقيها في الحمرا أو في مار مخايل وكل واحد فيهم له استايله والكوكتيلات اللي بيقدمها، عندك مثلًا Abbey Road, Anise, Coop D’etat, ThreeSixtyمن البارات اللطيفة اللي ممكن تروحها. المتاحف في بيروت مليانة بالثقافة والتاريخ وبتعرض حاجات مختلفة عن أي متحف تاني زي متحف Banque Du Liban وده فيه تاريخ العملات في العالم، ومتحف Mim وده بيحكي عن مجموعة من أهم المعادن اللي موجودة في العالم.
مش بيروت بس اللي فيها أنشطة كتير ممكن تعملها، كمان ممكن تطلع رحلات صدة ردة. عندك كمان مدينة البترون ودي من أقدم البلاد اللي موجودة في العالم أو تروح مدينة بعلبك اللي مشهورة بالمتاحف الرومانية. طول ما إنت في لبنان مفيش يوم هيضيع منك. لو بقى إنتوا مسافرين كعيلة فهيكون مناسب إنكم تروحو لقريةRio Lento وArnaoon لأن فيها أنشطة كتير أوي ممكن تتعمل زي السباحة، وأنشطة المياه، وZip-lining، والتسلق، وحاجات كتير مُسلية تانية ممكن تتعمل هناك.  لو رايح بقى في الشتاء فدي فرصتك إنك تتزلج على جبل لبنان. أشهر منتجع للتزلج في لبنان هوMzaar Kfardebian  اللي هتقضي فيه تجربة عمرك ما تنساها.

متوسط الطيران في إبريل: 3000- 4000 جنيه مصري
متوسط سعر ال 8 ليالي للفرد في هوستيل: 2400- 5000 جنيه مصري
متوسط سعر ال 8 ليالي لفردين في فندق: 4000- 12000 جنيه مصري
متوسط الفلوس اللي هتحتاجها  للفرد الواحد في اليوم عشان الأكل: 140- 170 جنيه مصري

6- الأردنالمصدر: Muna Haddad, Jordan Trail Association

الأردن من أقدم البلاد اللي في العالم واللي فيها حضارات مختلفة عبر العصور. إحنا كمصريين مش محتاجين لها فيزا بس لازم نروح جوي مش بحري، لأن في ناس بتفكر تاخد مركب من مصر للأردن بس ده مش مسموح. أحسن جو تروح فيه الأردن من مارس لمايو. أحسن طريقة في إنك تستكشف الأردن إنك تعمل Hiking في درب الأردن واللي بياخدك بمسافة 65 كم في البلد عشان تشوف المناظر الطبيعية والأثرية اللي موجودة بطول الطريق. لازم تزور البترا وتستمتع بشكلها الساحر، وتروح وادي رام وتجرب عيشة البدو وتعرف عن عاداتهم وتقاليدهم، ولو إنتَ شجاع ممكن تجرب تعوم في العقبة. إنت مش محتاج إنك تمشي طول درب الأردن، لأنه فيه تفريعات صغيرة ممكن تختارلك واحدة وتكتشفها.
عمان وهي عاصمة الأردن فيها برضه حاجات جميلة ممكن تعملها، زي إنك تروح شارع  قوس فزح اللي مليان محلات ومطاعم ومناطق أثرية زي دار المفتي، وممكن كمان تاكلك أكلة فول وطعمية حلوة  في مطعم هاشم الشعبي وعندك منطقة الويبدة مليانة مطاعم كتير حلوة بتقدم الأكل الأردني.

متوسط الطيران في إبريل: 5000- 6000 جنيه مصري
متوسط سعر ال 8 ليالي للفرد في هوستيل: 2700- 5000 جنيه مصري
متوسط سعر ال 8 ليالي لفردين في فندق: 2000- 10000 جنيه مصري
متوسط الفلوس اللي هتحتاجها  للفرد الواحد في اليوم عشان الأكل: 120- 150 جنيه مصري

7-تنزانيا
المصدر:kensingtontours

إحنا كمصريين مش بنفضل أوي السفر لأفريقيا كسياحة مع إنها فيها مناظر طبيعية جميلة تخطف الروح خطف. تنزانيا واحدة منهم بغابتها المفتوحة اللي فيها حيوانات برية.  في ابريل البلد بتكون رطبة وفيها مطر بس بتفضل حلوة في إنك تكتشتفها. المصريين بيحتاجوا يطلعوا فيزا أونلاين أو في المطار لمَا بيوصلوا. تنزانيا مشهورة بمتنزهتها العامة والمحميات ومن أشهرهم تارانجيري  وسيرينجيتي اللي بيطلع منها سفاري بشكل يومي عشان الناس تتفرج على الأسود ووحيد القرن. كمان ممكن تزور هناك محمية نجورونجور اللي مشهورة بالبراكين والوديان الرائعة. عندك بقى أشهر مكان في تنزانيا هي جزيرة زنجبار وهي من أشهر الأماكن اللي الناس بتروحلها في شهر العسل عشان الشواطىء فيها جميلة جدًا وبتطل على منظر يشرح القلب، بس كمان الغواصين المُحترفيين بيحبوا يروحوا هناك عشان أماكن الغطس المميزة.  
جبل كليمنجارو وهو أعلى قمة جبلية في أفريقيا موجودة في تنزانيا، بس خد بالك إنه مش سهل خالص إنك تعمل هايكينج على الجبل ده لأن الناس بتظن إنه سهل عشان نص ارتفاع جبل ايفرست بس دي مش حقيقة ولازم تكون مدرب على ده كويس قبل ما تخاطر. غير بقى الأماكن اللي هتزورها وتشوفها، هو إنك تحتك بأهل البلد وتشوف لبسهم وتسمع عن عاداتهم وتقاليدهم وأحسن طريقة إنك تعمل ده هو إنك تزور القرى اللي هناك وتحاول تقعد مع الناس تسمعهم وتعرف عنهم أكتر ممكن مثلًا تروح قرية إسمها Iraqw لأنها معروفة بإنها بترحب بالسياح وبتحاول إنها تعلمهم عن زيهم وعاداتهم ولغتهم.

متوسط الطيران في إبريل: 9000- 10000 جنيه مصري
متوسط سعر ال 8 ليالي للفرد في هوستيل: 600- 5000 جنيه مصري
متوسط سعر ال 8 ليالي لفردين في فندق: 3500- 15000 جنيه مصري
متوسط الفلوس اللي هتحتاجها  للفرد الواحد في اليوم عشان الأكل: 90- 110 جنيه مصري

8-مدغشقرالمصدر:Telegraph

لو شفت فيلم الأنيمشن مدغشقر يبقى إنت كده شفت حاجة قريبة للموجودة في الحقيقة. مدغشقر مش هتلاقي فيها أسود وحمار وحشي بس هتلاقي فيها حيوان الليمور اللي مش موجود في أي حتة في العالم غير هناك. البلد مشهورة بغابتها الممطرة زي اللي بتيجي في الأفلام بظبط وشواطئها والشعاب المرجانية. وبالنسبة للفيزا فإنت تقدر تاخدها في المطار وتقعد هناك لحد 90 يوم.
أنتاناناريفو وهي عاصمة مدغشقر تعتبر مدينة أثرية والتاريخ بيبظ منها. لازم تشوف تلة أمبوهيمانغا اللي بتعرفك الكتيرعن الهوية الثقافية لشعب ميرينا الأصلي وماضي مملكتهم. كمان ممكن تشوف القصر الملكي اللي يعتبر مركز الحكم للمملكة مدغشقر من مئات السينين. لو عايز بقى تجرب حاجة جديدة ممكن تخش متحف القراصنة اللي بيعرفك تاريخهم في المنطقة دي من خلال قطع أثرية. معمار مدغشقر مميز جدًا لأنه بيجمع بين الثقافة العرقية والخلفية الإستعمارية للبلد. ممكن كمان تجرب تروح Parc Tsarasaotra و Andasibe-Mantadia ودي حدائق تعرف تشوف فيها حيوان الليمور اللي معروف بصوته المميز العالي، وكمان موجود فيها أنواع من الزهور النادرة. عندك كمان حديقة Isalo المعروفة بأحجارها  المبهرة ووديانها ومسابحها الطبيعية. السياح كمان بيروحه هناك عشان يعوموا مع القروش في المياه النقية، وممكن تعمل Scuba Diving.

متوسط الطيران في إبريل: 13000- 14000 جنيه مصري
متوسط سعر ال 8 ليالي للفرد في هوستيل: 1000- 4000 جنيه مصري
متوسط سعر ال 8 ليالي لفردين في فندق: 2500- 12000 جنيه مصري
متوسط الفلوس اللي هتحتاجها  للفرد الواحد في اليوم عشان الأكل: 65- 100جنيه مصري

 ترجمة: نورا تميم