share this article

حاجات في الحياة كتيرة بتكون مُحبطة شوية زي أنك تحس بالوحدة في أفكارك وإن محدش بيشاركك نفس الإهتمامات من دايرتك الصغيرة. فقرر كامب "دروب" انه يحاول تجميع الناس اللي عندهم نفس الاهتمامات بالمغامرة وحب الطبيعة سوا في مكان واحد. دي أول مرة يكون في نشاط زي كده إن ناس تعزف مزيكا وفي نفس الوقت في Hiking يعني رياضة وفي نفس الوقت استمتاع، كمان هيكون فيه علاج بالموسيقى وMeditation يعني حاجة في قمة الاسترخاء والجمال ومعاها استفادة للياقتك البدنية. 
بيقول "ألبيرت أيمن" مدير مخيم دروب " احنا أسسنا مُخيم دروب لأننا بنحاول نخلق مساحة للناس اللي بتحب تعمل مغامرات وأنشطة زي تسلق الجبال والتخييم و كل أنشطة البحر. فمن هنا نقدر نكون مجتمعات صغيرة للناس اللي عندها اهتمامات مُشتركة بدل ما مجرد نروح نويبع علشان نقضي وقت حلو على الشط وبس، يبقى فيه مساحة أكبر للتواصل" علشان كده قرر المخيم بانه يكون الفريق بتاعه من ناس عندهم خبرة في الأنشطة دي مش مجرد بس سمع عنها.

دروب هو مُخيم في راس شيطان هدفه مش بس انه يجمع مُحبين الطبيعة، بس كمان الناس اللي بتحب وبتلعب مزيكا علشان يكون تجميعة رياضية وفنية في نفس الوقت. في المُخيم هيكون موجود مزيكتية من لاعب جيتار وناي للطبلة.  
 الايفنت هيكون من 22 ل 25 ابريل 2019 وهيبقى مُختلف عن أي حاجة بتتعمل في سيناء. المميز انه هيكون فيه لعب مزيكا شرقي في الصحراء وهايكينج في نفس الوقت حوالين مناطق التخييم.


أول يوم هنتجمع في الكامب ونقضي اليوم هناك، تاني يوم هنطلع على أقرب وادي عشان نتسلق ونعمل هايكينج. بيقول أيمن "هنعمل أول جلسة Meditation في الوادي تحت اشراف المُدرب المصري كريم الطوبجي المتخصص في العلاج بالموسيقى" بعد كده هيبقى في جلسات تدريب وبروفا مزيكا وهيلعبوا أنواع مزيكا مختلفة مش شرقي بس.
تكلفة الرحلة 1800 جنيه للكوخ الواحد و2000 جنيه لو لإتنين. السعر ده بيشمل المواصلات والأكل وجلسات المزيكا والإرشاد البدوي. إن كنت مُتحمس وعايز تعرف معلومات أكتر وتحجز، شوف صفحة الإيفينت على فيسبوك.