share this article

في حاجة في البحر بتخلى الواحد ينسى همومه كلها، مهما كنت قرفان في عيشتك، قعدة واحدة على البحر ممكن تخليك رايق ولو مؤقتًا. محدش عارف احنا بنحب البحر ليه كده، يمكن علشان الواحد بيحس إنه مهما همومه كبرت هتفضل حاجة بسيطة قدام شيىء مهيب زي البحر، أو يمكن علشان السّكينة اللي البحر بيحسسنا بيها واحنا قاعدين قدامه مش قادرين نفكر في أي حاجة غير قد ايه المنظر جميل. تخيل كل المشاعر دي واضربها في ألف، وساعتها ممكن تحس يعني ايه غوص حر. بتاخد نضارة وتسيب نفسك للمجهول بمعنى الكلمة، ولو إنت فاكر المنظر من فوق حلو، استنى بس لما تنزل تحت. هتلاقي نفسك بتعوم جنب سمك من كل شكل ولون، وتحتك شعاب مرجانية ألوانها زي ما تكون طالعة من فيلم كارتون ملون. لو في تعريف للسلام الداخلي، فالغوص الحر هو ده. وحظنا حلو في حاجة أخيرًا وفي شوية من أحلى أماكن الغوص الحر في العالم في الشرق الأوسط.

مصر

١ - دهب

المصدر Tomasz Kochanowski

دهب وبحر دهب من أحلى الحاجات الموجودة في مصر، وهتلاقي في دهب أشهر منطقة غطس في العالم: البلو هول اللي عمقها فوق ال100 متر. لما تيجي تغطس في البلو هول هتشوف مناظر تحسها من فيلم في هوليوود، شعاب أشكال وألوان وسمك بيسلّم عليك تحت المياة، بس خد بالك البلو هول مشهورة بخطورتها ومش أي حد يغوص هناك، لو مش خبير خليك في السنوركلينج في البلو هول برضه وهتنبسط جدًا.

في حتت تانية جميلة في دهب ممكن تغوص فيها زي شاطىء اللاجونا و eel garden وthe canyon اللي عمقه فوق ال55 متر، وغيرهم كتير.

٢ - شرم الشيخ


المصدر Seaunseen

شرم الشيخ جزء برضه من سيناء زي دهب، بس شرم أفخم شوية وأغلي علشان السياحة فيها كتير. شرم الشيخ برضه فيها مياة البحر الأحمر جميلة وهتشوف حياة مائية من أجمل ما يكون، والميزة إن الغوص في شرم أسهل من دهب. وممكن برضه تروح محمية رأس محمد على بعد 12 كم من شرم الشيخ وهتلاقي في المحمية دي أكتر من 200 نوع من الشعاب المرجانية - ايوة كان في واحد فاضي كفاية إنه ينزل يعدهم - وممكن كمان لهواة صفحة الحوادث في الأهرام تشوف حطام سفينة SS Thistlegorm اللي غرقت قريب من راس محمد.

٣ - مرسى علم

المصدر: Scubadiver Life

مرسى علم الناحية التانية من البحر الأحمر عكس دهب وشرم، ومشهورة بشواطئها الرملة والشعاب الجميلة اللي فيها. الحلو في مرسى علم إن الرجل عليها مش زي شرم الشيخ ومش هتلاقي فيها برضه الفنانين المعذبين والأرواح الحزينة اللي بيروحوا دهب - منهم كاتب المقال ده اللي بيموت في دهب.

الأردن

العقبة

المصدر Kuvaustuotanto Jussi Valkeajoki

 العقبة المدينة الساحلية الوحيدة في الأردن ومكانها مميز بين إفريقيا وآسيا، وفي ناس كتير بتروح العقبة علشان مشهورة بالشواطىء الجميلة والشعاب الملونة، والمصريين بيروحوا علشان يشوفوا نبيل الحلفاوي كان بيبرم العسلية فين في فيلم الطريق إلى إيلات، فيها أماكن مشهورة جدا للغطس زي Cedar Pride، Yellowstone Reef، Japanese Gardens، والموقع اللي فيه قمم جمب دبابة أمريكية اتحطت في المياة سنة ١٩٩٩ عشان تنمو عليها الحياة المائية، Seven Sisters and the Tank

الإمارات

دبي

المصدر: Alldubai

مين كان يفتكر إن دبي مكان مناسب للغوص؟ صدق أو لا تصدق، دبي فيها مراكز غوص كتير وبيعملوا رحلات بإنتظام للخليج العربي لمواقع غوص مشهورة لحطام سفن زي MV Dara  وCement Barge wreckage sites.

عمان

جزر الديمانيات

المصدر: Turistipercaso

دي محمية طبيعية في العاصمة مسقط، الجزر دي متحاوطة بشعاب مرجانية وعمق المياة فيها بيوصل لأكتر من 30 متر وبيزورها سياح كتير للغوص.

جزيرة الفحل

المصدر: Kevin Mansel

بعيدًا عن اسم الجزيرة المربك جدًا، جزيرة الفحل من أجمل مناطق الغوص في عمان وفيها شعاب مرجانية ممتدة لعمق أكتر من 50 متر. الجزيرة دي برضه معروفة بإسم جزيرة القروش علشان ساعات بيتشاف قروش في مناطق جنبها - ممكن يبقى ده سبب في تسمية الجزيرة، إنها محتاجة شجاعة علشان تتنزل.

تركيا

كاش - Kaş
المصدر: Patrick Swart

كاش من أشهر 100 موقع غوص في العالم علشان فيها حياة مائية كبيرة ومتنوعة، وفي آثار كتير مدفونة تحت المياة برضه. في أكتير من 50 مكان للغوص في المدينة دي وهتشوف وإنت بتغوص مخلوقات زي السلحفاة والأخطبوط. في كمان في كاش مواقع حطام كتير تتشاف منهم طيارة من أيام الحرب العالمية التانية، ودبابة وحطام سفن.