share this article

النفسية محتاجة سفرية، دهب والساحل حلوين بس مش كل مرة نسافر يعني، في حاجات تانية جميلة كتير في مصر ومش واخده حقها، عشان ناس قليلة جدا اللي يعرفوا عنها، جمعنالكم 9 أماكن ممكن تسافروهم في الويك إيند وتستمتع بجمالهم، وما تنساش لما تزورهم تبعتلنا صورهم وقصتك.

الصحراء الزرقاء - كاترين

مصدر الصورة: discoversinai
مصر فيها ألوان كتيرة للصحراء اللي عندها زي الصحراء البيضاء والسوداء عندنا، برضه الصحراء الزرقاء واللي هي قريبة جدا من دير سانت كاترين، الفكرة بدأت لما الفنان البلجيكي جان فيرام فكر يلون جزء من الصحراء بعد إتفاقية السلام سنة 1978، قعد فترة طويلة لحد ما قدر يقنع الحكومة المصرية، والسادات بنفسه زار المكان، ابتدى بعدها المشروع. ألوان الصحراء مؤخرا بدأت تروح ومتكونش واضحة زي زمان.

تقدر تروح هناك إزاي: علشان توصل الصحراء الزرقاء من القاهرة أو اسكندرية باص شرق الدلتا لسانت كاترين وبعديها لازم تأجر عربية خاصة توصلك لهناك الطريق بين ٩-١٢ ساعة حسب السرعة ونقاط التفتيش. 

كهف الجارة - واحة الفرافرة


مصدر الصورة: Shutter stock

كهف الجارة موجود بالقرب من واحة الفرافرة، على الطريق بينها وبين أسيوط، ويعتبر من أحلى الكهوف في العالم طبقا للتكوينات الجيولوجية اللي فيه، واللي بيطلق عليه أروع كهف ممكن تشوفه في افريقيا زي ماقال المستكشف بتاعه (جيرهارد رولفز).
تقدر تروح هناك إزاي: علشان توصل للكهف من القاهرة من موقف المنيب بتركب للواحات ومن هناك لازم تأجر عربية سفاري علشان تروح الكهف والطريق بيكون حوالي ٤ ساعات.
علشان توصل من اسكندرية من الموقف الجديد تركب غرب الدلتا لحد الواحات وبعد كده تأجر عربية سفاري والطريق بياخد حوالي ٧ ساعات.

معبد دندرة - قنا

معبد الجميلة حتحور، المميز في المعبد إنه لسه محتفظ بكل الألوان الاساسية اللي اتبني بيها من آلاف السنين يعني احنا لسه عندنا معابد بألوانها ومن أكتر من 5 آلاف سنة.
تقدر تروح هناك إزاي: علشان توصل المعبد من القاهرة أو اسكندرية قطار لمحطة قنا وبعد كده في مواصلة من محطة القطار للمعبد أو تاكسي، القطار مدته ٨ ساعات من القاهرة و١٠ ساعات من الأسكندرية وجوه المدينة حوالي ربع ساعة.

جبل علبة - أبو رماد حلايبمصدر الصورة: Samer Mohammed

إنت متخيل؟ الخضرة حواليك في كل مكان مع منظر الجبال والصحراء في منظر بيفكرنا بمشاهد دول شرق أسيا، كل ده ممكن تشوفه في مصر لو روحت محمية جبل علبة بعد موسم المطر اللي هو بين شهر يناير وفبراير.
تقدر تروح هناك إزاي: علشان توصل هناك من القاهرة أو اسكندرية أتوبيس غرب الدلتا إلى أبو رماد، ومن هناك لازم تتطلع تصريح من مخابرات حرس الحدود وتأجر عربية ربع نقل من أهل البلد علشان تدخل المحمية، الطريق ممكن يوصل لحوالي ١٧ ساعة عن طريق الباص الرحلة مرهقة فجهز نفسك.

قرية الشخلوبة - كفر الشيخ

مصدر الصورة: wikipedia

قرية الشخلوبة على بعد ساعتين ونص من القاهرة لو رايح بالعربية، من أجمل المناطق في مصر بدون مبالغة، ممكن تاخد مركب صيد لمدة ساعة في البحيرة، تستمتع بالجو في البحيرة، وتصور مراكب الصيد وحلقة السمك القديمة في وسط البحيرة اللي على شكل بيت وشجره والمياه محاوطاك من كل جانب

تقدر تروح هناك إزاي: علشان توصل هناك من القاهرة تركب من موقف عبود لكفر الشيخ ومن كفر الشيخ لسيدي سالم ومن سيدي سالم مواصلة للشخلوبة وبتاخد حوالي ٤ ساعات علشان توصل عن طريق المواصلات.
ومن اسكندرية من الموقف الجديد على الطريق الدولي لكفر الشيخ وبعديها سيدي سالم ثم الشخلوبة وبتوصل في حوالي ٣ ساعات.

كهف روميل - مطروح

مصدر الصورة: ilprimatonazionale
الداهية روميل أو ثعلب الصحراء زي ما العالم كله أطلق عليه الاسم ده، مكان إقامته وقت الحرب العالمية كان عبارة كهف محفور في الصخر، والكهف من الاتجاهين بيطلع على البحر.
تقدر تروح هناك إزاي: علشان توصل للكهف من القاهرة ممكن تركب سوبر جيت أو جو باص لحد مطروح، والطريق حوالي ٦ ساعات أو اسكندرية سوبر جيت من الموقف الجديد (محرم بك) لمطروح في ٤ ساعات، ومن محطة مطروح لازم تاكسي لحد الكهف والمتحف بتاعه.

سطايح بيت الدولفين - مرسى علممصدر الصورة: Mark Harris

من وقت كبير فات في مجموعة من الصيادين اكتشفوا منطقة في البحر الأحمر جنوب مرسى علم تعتبر بيت للدولفين، بيكون موجود فيها تقريبا طول السنة، واللي فيها ممكن تشوف الدولفين بكميات كبيرة وتلعب كمان معاهم.
تقدر تروح هناك إزاي: هتركب من القاهرة أو اسكندرية باص لمرسى علم، تبع "جو باص" أو "شرق الدلتا"، وأنت في مرسى علم لازم تتفق مع مكتب سفاري علشان يحجزلك الرحلة على يخت مع مجموعة. الطريق من القاهرة لمرسى علم ٩ ساعات ومن الأسكندرية ١١ ساعة.

كاسل زمان - نويبع

مصدر الصورة: castlezaman

هو مكان كتير مننا مايعرفوش عبارة عن مبنى معمول على شكل قلعة مبنيه على تبة عالية بحيث تكون قاعد حرفيا على بحر بين الأردن والسعودية ومصر. المكان حلو جدا وبيقدم أكل وفيه حمام سباحة، خد بالك انك لازم تحجز من علي الموقع بتاعهم قبل ما تروح.
تقدر تروح هناك إزاي: علشان توصل هناك من القاهرة او اسكندرية هتركب اوتوبس لنويبع تبع جو باص أو شرق الدلتا، وبعد كدة تاكسي للمكان الطريق حوالي ٩ ساعات من القاهرة و١٢ ساعة من الأسكندرية وممكن يزيد أو يقل حسب السرعة ونقط التفتيش.

كهف الملح - مطروحمصدر الصورة: George Mendes, Getty Images

كهف الملح في مطروح في القرية البدوية اللي هي عند الكيلو 21 طريق السلوم مرسى مطروح، فكرة الكهف اللي متجمع الملح بتاعه من البحر متوسط، هي سحب الطاقة السلبية والتوتر والإرهاق، وده كله بيتم بسبب أن الجسم با يتشبع بمادة اليود اللي بتكون في كل حتة في المكان خدلك لفة في الكهف 360 درجة.

تقدر تروح هناك إزاي: علشان توصل هناك من القاهرة تاخد سوبر جيت وبيقطع المسافة في حوالي ٦ ساعات والقطر ٩ ساعات، ومن هناك لازم عربية خاصة، أما الإسكندرية ممكن تركب من محطة مصر، ممكن تاخد القطر اللي هيوصل في خلال ٤ ساعات، أو السوبرجيت في حوالي ٣ ساعات لمطروح ومن هناك لازم برضه عربية أو مواصلة خاصة.