share this article

درب البحر الأحمر دلوقتي بقى جاهز لأي حد عايز يعمل Hiking بعد سنين من التخطيط ورسم الخرايط عشان الحلم ده يتحول لحقيقة. أول تجربة Hiking هتتعمل في 12 و13 ابريل 2019 واللي هيعملها المُغامر عمر سمرة وهو أحد مؤسسين مشروع  درب البحر الأحمر ومرعي أبو مسلم شيخ قبيلة المَعزة.
|

طول ما إنت ماشي في الدرب هتلاقي تراث وتاريخ الرومان في كل حتة، من أول المدينتين القدامى اللي موجودين بطول درب "المونس كلوديانوس ومونت بروفريتس" ، لحد ما ترفع عينك لفوق وتقدر تشوف الحصون القديمة وأبراج المراقبة. من حمامات الزمرد في الوديان السودة الصخرية في جبل أبو دخان للصخور العتيقة الممتدة من جبل قطار لجبل أم عناب. بس لو دي أول مرة Hiking ليك يبقى بلاش تبدأ بالدرب ده لأنه صعب وفيه مُنحدرات كتير.مصر بقالها فترة مُتبعة ثقافة السياحة المُستدامة اللي بتحافظ على البيئة والأماكن السياحية، زائد إن المشروع ده من أهم أهدافه هو تنمية المجتمعات البدوية وتوفير ليهم فرص شغل قانونية وفي المجال اللي هم بيفهموا فيه، ومش درب البحر الأحمر بس اللي بيحاول يحقق الهدف ده، كمان درب سيناء. المميز في الدرب ده إنه هيكون أول واحد في الغردقة ومن المتوقع إنه هيجذب ناس كتير من الشرق الأوسط.


لو مُتحمسين للفكرة وعايزين تعرفوا امتى أول ميعاد Hiking وازاي تشاركوا فيه، ممكن تتبعوا صفحة درب البحر الأحمرعلى الفيسبوك.