share this article

إندونسيا والصين
سمر بتحكيلنا عن مغامرتها في أسيا بالتحديد في بالي وهونج كونج في 15 يوم.المصدر:سمر مصطفى
في الأول احنا كنا عايزين نروح سنغافورة، بس لأن جوزي أمريكاني فأنا كنت هطلع الفيزا لوحدي، وبعدين اترفضت لإننا مش مقدمين احنا الإتنين سوا. عشان كده قررنا إننا نطلع مكان مش محتاج فيزا زى إندونسيا وهونج كونج. احنا كنا طالعين تبع شركة سياحة ودي غلطة عمري لأنهم لبسونا في كذا حاجة، أولهم الطيران، كنا بننزل ترانزيت كتير جدا. اكتشفت إني لو كنت سافرت لوحدي من غير شركة سياحة كان هيبقى أرخصلي بنص السعر.
دي كانت حقيقي غلطة بس هى أول مرة سفر ليا ومكنتش عارفة المفروض أعمل إيه بظبط وقولت أستعين بشركة سياحة تريحني بس مكنتش راحة ليا. قضيت 12 يوم في بالي بس كان غلط مني إني معملتش أى أنشطة في مياه المحيط. الجو في بالي رطوبة عالية أوي لدرجة إني كنت غاسلة كوتشي فضل مبلول معايا لأخر السفرية.
في الأول أنا كنت قاعدة في مكان في بالي إسمه Nusa dua وهناك أخدنا عشاء رومانسي على المحيط، وممكن كمان لو حد مسافر هناك يبقى يحضر الاحتفالات الدينية بتاعتهم، لأن البلد كلها معابد وتلاقي دايمًا قدام المعابد ورق أخضر مصنوع على شكل طبق وهو في الغالب بيكون من قشر الموز وجواه رز وبخور وورد. البلد كلها تماثيل ومعابد أكنك دخلت في عالم تاني أو كأنك في متحف. روحت كمان أزور غابة القرود وهى عبارة عن قرود في كل حتة بتتنطط حوالين الناس، فده بالنسبالك لو بتحب القرود مُسلي لكن بنسبالي أنا كنت خايفة أوي. برضه كنت بروح السوق هناك فيه حاجات كتير رخيصة بس لازم تفاصل وتحاول تنزل في السعر. الميزة كمان إن في إندونسيا تقدر تفك الفلوس بكتير أوي تعملك مبلغ محترم تعرف تتصرف فيه براحتك.روحت كمان شربت قهوة من اللي معمولة بفاضلات الحيوان الكوبي لواك وهى نوع قهوة له ريحة وطعم مميزين جدًا.المصدر:سمر مصطفى
روحنا مكان تاني في بالي برضه إسمه Ubud وهو مُختلف خالص عن بالي، يعني تحسيها مقسومة نصين، جزء معابد وتماثيل ونص تاني غابات وشلالات وأنهار. لمًا كنت بصحى من النوم كنت بحس نفسي إني في حاجة خيالية من كتر جمال الطبيعة، بس على الناحية التانية أنا مكنتش مستريحة بسبب الأبراص وكنت بلاقيها بتتمشى عادي في الأوضة.
عملنا حاجة زى التجديف كده في الشلال مع جروب وروحنا  مزارع الرز، وشفت البركان.
بالي بنسبالي معابد وبخور.الأكل كمان هناك كان حلو أوي. أنا شايفة إن الوقت كان كفاية على بالي بس أنا اللي معلمتش بحث كفاية ومكنتش أعرف إيه المفروض أشوفه واعتمدت على شركة السياحة.

المصدر:سمر مصطفى
هونج كونج بقى قضينا فيها 3 أيام، فسافرنا بطيران داخلي أسيوي كانت الطيارة ضيقة أوي بس انبسطنا عشان طقم الطيارة كانوا لابسين حاجات كارتون كده وفضلوا يرقصولنا طول الطريق وده كان ممتع. روحت ديزني لاند هناك. وطلعت أعلى قمة في هونج كونج علشان أشوفها كلها من فوق بس طبعًا علشان أنا نحس بعد ما طلعت كنت أنا والسحاب إخوات، مكنتش شايفة أى حاجة من الضباب.
الأكل في هونج كونج حقيقي بشع! أنا فضلت طول الأيام أكل مربى وعيش وزبدة. الأكل هناك مش حلال، حتى ماكدونالدز الأكل كان فيه مقرف. أظن لو سافرت تاني هناك هروح بأكل معايا مع إني مش من نوع الناس اللي بيسافروا بره بأكل خالص.

تايلاند
آية بتحكيلنا عن شهر العسل اللي قضته في تايلاند لمدة 10 أيام، تحديدًا في بوكيت.
المصدر:آية مقلد
شهر العسل كان ما يتنسيش، تايلاند جميلة جدا قضيت وقتي هناك ما بين الشوبينج، لإن أسعارهم رخيصة وبجودة عالية، وما بين الفسح في الغابات ووسط الطبيعة، ده غير إني حضرت FantaSea Show،  دي حاجة تشبه ديزني لاند بالظبط و بيبقى فيها عرض بالليل يجنن! يوم تاني روحت فيه معرض للألماس والأحجار الكريمة! شوفت هناك مصنع كاجو بكل النكهات اللي ممكن تتخيلها، وروحت مزرعة كبيرة لصنع العسل بكل أشكاله، وصنع منتجات تجميلية منه. بعد كل ده كان فيه يوم للمزارات الدينية، المعابد هناك اللي معمولة لبوذا جميلة جدا. زورنا كمان الكهوف الجبلية والغابات الكبيرة، وكان فيه يوم روحنا فيه لكهف اسمه كهف القرود، ومزرعة للفيلة.
بعد ده كلها طلعنا يوم طويل عملنا فيه سفاري بالبيتش باجي ولعبة فوكس، ونط وتسلق جبال وسباحة، ويوم في البحر لزيارة كل الجزر الموجودة في بوكيت.
الحلو هناك المناطق الخضراء بجد، وطبعًا وبالأخص للي عاوزين يقضوا شهر عسل بعيد عن الاطفال عشان يستمتعوا. بالنسبة للأكل فأغلبه بيعتمد على الفاكهة وبالذات الأناناس، اللي بيتاكل بكذا طريقة، ده غير الفواكه الاستوائية المختلفة، وطبعًا عشان مش كل الأكل حلال فيه مطاعم شرقية أغلبها شامي عشان المسلمين. غير إن الشعب منظم في سواقته ونضيف جدًا. استمتعنا جدا بجد، بس كفاية عليها 10 أيام، لإن دي كل الأنشطة اللي ممكن تتعمل هناك.

لو إنت مصرى أو لبناني أو إماراتي شوف تقدر ازاى تطلع فيزا تايلاند.

أوروبا
أفنان بتحكيلنا عن شهر عسلها لباريس وايطاليا في 13 يوم.المصدر:أفنان وصفى 
الموضوع مُختلف عندي شوية لأني مابحبش الهدوء الزيادة والبحر والكلام ده، فمكنتش عايزة أوي أروح أسيا. فقررنا  نروح أوروبا بالأخص إيطاليا و باريس. زورنا في ايطاليا كذا حته منها فلورانس حلوة جداً ٤ أيام كفاية عليها، بس احنا قعدنا فيها ٦ أيام، لأن كنا بنتحرك منها ونرجع ليها تاني. زرت "مونتيروسو آلماري"، بحرها جميل جدًا وهى واحدة من أحلى 5 أماكن علي البحر وتحفة جداً، دي اللي فيها بيوت ملونة على جبل على البحر زى الـ wallpaper بتاعت الـ desktop ودي كفاية عليها يوم واحد بس من أوله. بيزا بقى مفيهاش غيراالبرج وكفاية عليها ساعتين. روحت كمان مدينة la spazia وهى حلوة برضه، كنا في فندق علي الجبل المنظر فيه كان تحفة! بس كفاية عليها يوم واحد بليلة. روحنا كمان روما وهى جميلة لأنها مختلفة عن باقي ايطاليا قعدنا فيها يومين بس، وهى كانت محتاجة وقت اكتر علشان نلحق نلف فيها.
بعدين روحنا على باريس وقضيت فيها 3 أيام وزورت ديزني لاند، باريس جميلة أوي بس الصراحة أنا شايفاها واخدة أكتر من حقها. لو رجع بيا الوقت مكنتش هروحها وأفضل وقت أطول شوية في روما.

المالديف
ندي بتحكيلنا عن رحلتها للمالديف في 5 أيامالمصدر: ندى تميم
اخترت المالديف عشان كسلت أطلع فيزا، واحنا أصلًا قررنا إننا هنطلع شهرعسل متأخر أوي، فشوفت إيه بلاد مش محتاجة فيزا ولقيت المالديف من ضمنهم. اخترت المكان عشان خاطر إنه كان هادي وفيه بحر والجو كان كويس هناك في إبريل.
الأنشطة اللي عملناها في المالديف هو نشاط الإسترخاء والأنتخة والأكل وإننا ننزل المياه. روحنا كمان غطس على مركب صغير كده زى الحاجات اللي بتبقى في شرم الشيخ.
من الحاجات بقى اللي عكننت علينا إننا كنا حاجزين الفندق من بوكينج واكتشفنا إن الطريقة الوحيدة اللي تجبنا من المطار للفندق لانش. إحنا كنا عارفين ده من قبل كده، بس مكناش نعرف إنه هيكون غالي للدرجة دي، كان بحاولي 400 دولارعلى الرغم إن سعر الفندق كان معقول.المالديف كفاية عليها 4 أو 5 أيام بعديها الإنسان هيعاني من الملل طول الليل لأن مفيش أنشطة يقدر يعملها.

 سريلانكا
ديفيد بيحكلنا عن مغامراته في سريلانكا لمدة 10 أيامالمصدر:ديفيد جون
سريلانكا بلد غريبة شوية لأن كل مدينة جواها مختلفة تماما عن بعض في الجو وطبيعة البلد، فاحنا مثلا أول مدينة رحناها كانت على البحر ودرجة الحرارة كانت ٤٠ والبلد كلها عشش الناس عايشين فيها وكلهم صيادين. نزلنا هناك البحر وعملنا سفاري نهرية ،بعد كده سافرنا مدينة فوق الجبل درجة الحرارة فوقيها توصل ٨ درجات مئوية، والمدينة كلها عالية جدا لدرجة إن السحاب تحتينا، وعدينا جواه بالقطر واحنا طالعين! المدينة كلها قصور ومبنية زي انجلترا بالظبط ومسمينها little England وهناك تسلقنا جبال.
اخترت سريلانكا لأن ماحدش راحها كتير قبل كده، ولإن فيها مغامرات مش أنتخة وبس. ده من ناحية، ومن ناحية تانية هى أرخص من بوكيت وبالي ولانكاوي اللي هما أشهر وجهات لشهر العسل. لو الوقت رجع بيا هاحب اروح نفس البلد بس كنت هزود المدة لأن بالرغم من اننا رحنا ٥ مدن مختلفين تمامًا في كل حاجة جوه سريلانكا بس في كذا مدينة تاني كان نفسنا نروحهم ومالحقناش.
مكنش في إجراءات، تقدر تاخد الفيزا في المطار عادي.

المغرب
جويرية بتحكيلنا عن شهر العسل اللي قضته في المغرب لمدة ١٠ أيام
المصدر:جويرية محمد
السبب في سفرنا للمغرب هو إننا اتقابلنا في إبريل 2015 في coworking space اسمها شفشاون، فقررنا إن شهر عسلنا لازم نقضيه في المغرب. وطلعنا فعلًا المغرب وروحنا شفشاون الحقيقية في إبريل 2017. نزلنا على كازبلانكا ولفينا فيها بأتوبيس عام، بعدين نزلنا في مسجد سلطان محمد والمدينة القديمة. تاني يوم روحنا السوق وصلينا الجمعة وبعدين طلعنا على مراكش. كنا بنروح ساحة جامع الإفنا "ساحة جامعة الفنون" بيكون فيها كل حاجة ناس بتلعب بالتعابين والقرود وناس بتلعب مزيكا وفيه بيرسموا حنا وفيها مطاعم وحاجات كتير ليها علاقة بالفنون.

في المدينة القديمة قابلنا واحدة مغربية في المواصلات لففتنا مراكش شوية، روحنا بعد كده هوستيل شبه الغرزة في مدينة فاس. وفاس هى مدينة فيها مدابغ الجلود والألوان، ومساجد كتير حلوة زي جامع القرويين. قضينا ليلتين في فاس، بعدين اتحركنا لشفشاون بالباص، الطريق كان حوالي 10 ساعات بس طريق السفر حلو جدًا عبارة عن جبال مليانة خضرة. بعدين وصلنا شفشاون الصبح. كانت أحلى مدينة في الرحلة نزلنا في رياض برضو كان حلو أوي، وقريب من مدينة عين، وفيه جنينة صغيرة فكان في صوت مياه طول اليوم وعصافير.كنا بنلف ونتعرف على الناس ونتوه في الشوارع وشفشاون عبارة عن مدينة مبنيه على جبل ومفيش عربيات بتدخل في المدينة القديمة ومن فوق الجبل بنقدر نشوف شفشاون كلها. قعدنا فيها 3 أيام وعرفنا معظم البياعين تقريبًا وكانت مريحة نفسيا جدًا..وكنا مبنفطرش في المطاعم بنروح نجيب أكل من البقالة وخصوصًا الزيتون الأسود والعيش بتاعهم كان حلو أوي.

روحنا الرباط بعد كده. الرباط هادية وفيها جنسيات كتير فمش بتشوف فيها المغاربة اللي محافظين على لبسهم ومظهرهم كتير. تاني يوم لفينا فيها كلها مشي تقريبًا وجربت هناك الحمام المغربي، وروحنا السوق بتاعهم برضه، بعدين رجعنا على كازابلانكا. كنا متفقين قبل ما نسافر إننا مش هننزل في فنادق خمس نجوم والجو ده قررنا إننا نكون أقرب للناس وثقافتهم. الأكل هناك حلو ونضيف ومعظمه صحي، المساجد هناك روحانيتها عالية وحلوة. تحب تقعد في المسجد بيقعدوا يقولوا ذكر بصوت عالي أو يقرأوا قرآن مع بعض.
المغاربة بيحبوا المصريين جدًا وبيفهمونا عشان الدراما المصرية وبيحبوا عادل إمام وفيفي عبده، ولما بنتزنق نتكلم معاهم لغة عربية فصحى. أول ما بيعرفوا إننا مصريين يقولوا مصر أم الدنيا، والمغرب أبوها ويقعدوا يضحكوا، مفيش واحد قابلناه تقريبا مقلناش كده.
إجراءات السفر للمغرب: -باسبور صالح لـ 6 شهور على الأقل
-صورتين شخصية
-جواب HR أو بطاقة وسجل
-ورق للحساب البنكي لتالت شهور فاتوا يكون فيه على الأقل 20 ألف جنيه وعليه حركة
-تأمين سفر
- حجز طيران وفندق مبدأي 
-الأبليكشن بتتملي في السفارة