share this article

Alicia Keys
مُغنية أمريكية
المصدر:dnevnik.hr
زارات مصر في 31 أغسطس عشان تقضى إجازة الصيف مع جوزها المُنتج الموسيقي Swizz Beatz وأطفالهم.
"عملت رحلة مهمة لنفسى في مصر. وقتها كان في حاجات كتيرة أوى كنت محتاجة إني أغيرها. ووقتها مكنش عندى تجارب كفاية، وكنت حاسه بإنهيار نفسي. قررت أروح مصر ولوحدي. أبحرت بطول النيل وشُفت المعابد والمقابر والأهرامات. كانت مؤثرة. لمًا بقيت حامل جوزي اقترح عليا  نسمي إبننا "مصر" لأن الوقت اللي قضيته هناك كان مُهم وغيّر حقيقي حياتي"
فضلت طول الوقت عايزة تزور مصر مع أطفالها "جينسيس علي الدين" و"مصر علي الدين". قضوا  وقتهم في مصر بين الإنغماس في الثقافة المصرية وبين السفر بليل في النيل وإنهم يحاولوا يتعلموا شوية عربي.

Karim Benzema
لاعب كرة قدم فرنسيالمصدر:el Masry el youm
زار الغردقة 4 يونيو 2018 علشان يقضي الصيف هنا، وهو المفروض كان في مصر بهدف ترويج السياحة وافتتاح مُنتجع في مرسى علم.

Brandon Stanton
مؤسس Humans of NewYork كاتب ومصور أمريكي
المصدر:Safareya
وصل في أغسطس 2018، وهدف الزيارة هو توثيق وكتابة حكايات الناس المحليين في مصر، وإنه يسمع القصص منهم بشكل مُباشر. تقدر تقرأ الانترفيو اللي عمله معاه عمر سمرة

Peter Greenberg
صحفي أمريكي ومُحرر قسم السياحة في CBS
المصدر:egyptianstreets
وصل مصر في 24 نوفمبر 2018، وكان سبب الزيارة هو تصوير حلقة عن الأماكن السياحية الغير معروفة في مصر، ضمن برنامج التليفزيونى المشهور Travel Detective اللي هيتم عرضه في الربع الأول من 2019.

Usher
مُغنى أمريكي
المصدر:twitter
زار مصر في 31 مايو 2018، وقضى وقته في سيوة عشان يستمتع بجمال البحيرات والطبيعة. لو إنت كمان حابب تروح تشوف جمال الطبيعة في سيوة، تقدر تقرأ المقال ده، هيساعدك.

Patrick Dempsey
ممثل أمريكي
المصدر:elgounafilmfestival
فتى أحلام ملايين البنات اللي اتفرجوا على Grey's Anatomy جه مصر علشان يحضر مهرجان الأفلام في الجونة كضيف شرف. والحظ كله راح لشارموفرز بعد ما اتصور معاهم وحطها على الإنستجرام لما سمع مزيكتهم في التجهيزات للحفلة.

Owen Wilson
ممثل ومُنتج وسيناريست أمريكي
المصدر:pbs.twimg
زار الأقصر والقاهرة قبل ما يحضر مهرجان الأفلام في الجونة. أعجب جدًا بالأهرامات، وبعت رسالة لـ Ben Stiller بصورتهم. الأهرامات أكتر حاجة دخلت قلبه بعد الكشري اللي دخل بطنه.

Sylvester Stallone
ممثل ومخرج وسيناريست أمريكي
المصدر:Cairo West Mag
زار مصر لحضور تكريمه على مُجمل أعماله في مهرجان الجونة للأفلام. دي كانت حاجة مُبهجة إن رامبو يزور مصر.

Melania Trump
السيدة الأولى للولايات المتحدة الأمريكية
المصدر:The National
بعيد عن لبسها اللي كان مُثير للتساؤلات بس هى زارت القاهرة وصرفت في 6 ساعات بس 95000$.

Ralph Fiennes
ممثل ومُنتج ومُخرج بريطاني
المصدر:PATRICK BAZ
"من لا يجب ذكر اسمه" فولدمورت زار مصر لتكريمه بجايزة فاتن حمامة في مهرجان القاهرة الدولي. لو إنت مش من مُحبين هاري بوتر فده اللي كان بيمثل دور الشر طول السلسلة القصصية.

Jason Derulo
مُغني أمريكي
المصدر:Twitter
زار مصر لأول مرة علشان حفلته اللي عملها في BUE بس قبليها قرر في إنه يروح في جولة صغيرة للأهرامات ويركب حصان.

Craig David
مُغني بريطاني
المصدر:emirateswoman
جه مصرعشان حفلته اللي كانت في 16 نوفمبر، بس كمان عرف إنه يروح يشوف الأهرامات، وياخد لفة بالجمل. وصف رحلته لمصر بإنها كانت رحلة خيالية الجمال.

هبة الطوجي
مغنية وممثلة لبنانية
المصدر:lahamag
إبريل 2018 هبة الطوجى نورت مصر بطلتها البهية وفستانها الأزرق، اللي اتصورت بيه قدام الأهرامات. بالأساس هى جت مصر عشان كان عندها حفلة، بس هى عرفت تستغل وقتها هنا وتشوف الأهرامات. وكمان أهدت أغنية للشعب المصري في حفلتها وكررت زيارتها تاني في نوفمبر.

 مش دول بس الفنانين والمشاهير اللي زاروا مصر في 2018، في ناس تانية كتير زى زياد رحباني وماجدة الرومي وجورج وسوف، اللي قرروا يجوا مصر علشان يعملوا حفلات بعد فترة طويلة جدًا من غيابهم عن المسارح ودار الأوبرا المصرية. كمان DJ الفرنسي David Vendetta جه مصر في حفلة في BUE.