share this article

واحنا داخلين على السنة الجديدة بيبقى دايماً عندنا آمال وطموحات وخطط وحاجات كتير عايزين نعملها؛ وغالباً معظمها متأجل من السنة اللي فاتت أو اللي قبلها واللي قبل قبلها، واللي بيحب السفر بيبقى الهدف رقم واحد بالنسباله هو إنه يسافر أكتر؛ إنه يروح أماكن أكتر، وطبعاً عشان تعمل ده محتاج ايه؟؟ محتاج فلوس ووقت، الفلوس دي منقدرش نعملك فيها حاجة؛ مفيش غير إن يطلعلك عم كان عايش في البرازيل ملياردير يموت ويسيبلك كل ثروته، أو الحل الأوقع إنك تغرق في شغلك، أما نقطة الوقت فهي دي اللي نقدر نساعدك فيها، إزاي تبقى مركز في شغلك بس كمان عارف تفصل وتاخد أجازات لطيفة تغير موودك، عشان كده جمعنالك كل أجازات السنة والبريدجات اللي ممكن تضمهم على ويك إند أو أجازة رسمي.

في الأول بس وعشان نكون واضحين؛ 2020 مش زي 2019 خالص أبداً نهائي، مفهاش أجازات كتير خالص، لأ وكمان حتى الأجازات الرسمي اللي فيها هاتيجي كتير أيام جمعة وسبت، بس ربك كريم يعني وكلنا أمل إن نتعوض عن الأيام دي، وطبعاً فيه قواعد متعارف عليها وقلنالكم عليها من السنة اللي فاتت بس نراجعها مع بعض مفيش مشكلة:

  • أي يوم اثنين أجازة بتاخد الأحد معاه.
  • أي يوم أربعاء أجازة بتاخد الخميس معاه.
  • أي يوم ثلاثاء أجازة بيكون أدامك الإختيار ما بين أنك تاخد أربع وخميس، أو أحد واثنين.
  • أي مناسبة جاية في يوم أصلا أجازة، بنستنى تتعوض بيوم أحد أو خميس فياريت تكون نيتك صافية.

لو قلتلك بقى إن أول أجازة جاية يوم تلات طبعاً هتتقفل من السنة، وده هيكون يوم 7 يناير اللي هو عيد الميلاد القبطي، ساعتها هنقولك ادي التلات فرصة يمكن يفاجئك لما تلضمه مع الويك إند، وعندك حق الإختيار يا اليومين اللي قبله أو اليومين اللي بعده، وبكده من أول أسبوع في السنة تكون أخدت 5 أيام أجازة .. يناير مافيهوش حاجة تانية لأن 25 يناير جاي يوم سبت، بس مش هنفقد الأمل لأنه ممكن يبقى لونج ويك إند لطيف.

الدنيا هتفضل شغل شغل شغل لغاية شهر أبريل .. ويهل علينا شم النسيم، ده هيكون يوم الإثنين 20 أبريل؛ طبعاً طاوع قلبك وخد الأحد اللي قبله أجازة، من باب الإستعداد لشم النسيم وأهو 4 أيام أجازة ينفعوا في رحلة سريعة عالماشي، أو تجمد قلبك وتاخد بقية الأسبوع أجازة اللي هما 21 و22 و23 أبريل، وفي نفس الشهر وللمرة التانية هاتيجي أجازة يوم سبت، بس المرة دي عيد تحرير سينا اللي هيبقى يوم 25 أبريل، وطبعاً ما باليد حيلة غير أماني صادقة إنه يتعوض بيوم الأحد اللي بعده وتبقى لونج ويك إند مش بطالة.

لسه في شهر أبريل برضه والمرة دي مع عيد العمال 1 مايو واللي جاي يوم جمعة، بس ده استقروا عليه من دلوقتي بشكل رسمي إنه الأجازة هتبقى يوم الخميس 30 أبريل بدل يوم الجمعة، إتس عيد العمال يعني مفيش فيه هزار .. لازم يبقى أجازة يعني أجازة! 

وصلنا لشهر مايو، وهنا بقى عندنا أطول وأكبر وأعظم أجازة في 2020، كل سنة وإنت طيب عيد الفطر وصل، ركز بقى كويس عشان الفرصة دي لو ضاعت مش هاييجي زيها تاني، العيد هيكون يوم الأحد 24 مايو وهيخلص يوم التلات 26 مايو، زود عليهم الأربع والخميس من عندك وتبقى كده قفّلت الأسبوع كامل مكمّل وأخدت 9 أيام أجازة ونصيحة على رأي جواهر "أخرج روح شوف الدنيا، اللي حبسك خلاص مات".

بعد أجازة العيد دي هنحتاج نشتغل شوية عشان نهضم الكحك والبيتيفور اللي أكلناه، بس الوضع مش هيطول عشان ما نهبطش برضه هي الصحة بنلاقيها في الأرض والا إيه؟! زقة خفيفة كده بخمس أيام لطاف في آخر شهر يونيو، صح ده معاد 30 يونيو اللي جاي يوم تلات، وأنت كل هدفك توصله بالويك إند اللي قبله أو اللي بعده .. ده يرجعلك المهم الموضوع يقفل معاك بخمس أيام أجازة.

شهر يوليو بقى فيه أجازة وحيدة وهي لونج ويك إند يوم الخميس 23 يوليو، حاجة بسيطة كده على الماشي.

وخد عندك بقى وقفة عرفات يوم 30 يوليو وبعدها العيد يبقى كده 5 أيام من غير أي مجهود، و في الواقع مفيش فرصة إنك تعمل أي مجهود لأن الأجازة دي هتبدأ يوم خميس وتخلص يوم الإتنين 3 أغسطس، ممكن طبعاً تجازف وتاخد 3 أيام أجازة بعدها اللي هو التلات والأربع والخميس عشان تقفّل الأسبوع برضه؛ بس ده محتاج قلب ميت؛ أو تستنى لغاية رأس السنة الهجرية اللي هتكون يوم الخميس 20 أغسطس وأهو لونج ويك إند حلو جميل يكسر شهر أغسطس الطويل.

المحطة الجاية هتكون 6 أكتوبر اللي جاي يوم تلات، ودي تالت أجازة توافق يوم تلات شكله كده بيحاول يحسن صورته مع المصريين تقريباً! وبما إنها التالتة وأكيد خلاص تبتت في دماغك وعارف هتعمل إيه، اوعى تضيع الفرصة دي من إيدك، أجازة تلات يعني تاخد بريدج الأحد والإتنين أو الأربع والخميس، وبعدها خلاص فاضلك آخر أجازة في 2020 واللي هتكون المولد النبوي الشريف يوم الخميس 29 أكتوبر، ومنها ندخل على نوفمبر وديسمبر اللي صحراء جرداء من الأجازات زي مانت شايف كده.

2020 مفيهاش أجازات طويلة وكتيرة زي 2019 بس دي فرصة لطيفة إنك تتفسح جوه مصر وتشوف فيها إيه أبعد من السخنة والساحل، ولو مشيت على اللي إتقال فوق ده هتكون بس استخدمت 12 أيام من أجازاتك، يعني هيكون لسه فاضل في رصيد أجازاتك أيام كتير تخططهم بقى وقت ما تحب في السنة. 

* تقدر تطبع الصورة من اللينك ده وتعلقها عندك عشان تبقى شايف الأجازات طول السنة