share this article

عارف سور الصين العظيم طوله أد ايه؟ 21 ألف كيلو متر، عارف بقى نوتيلا بتبيع كام برطمان نوتيلا في السنة؟ عدد يكفي إنه يغطي سور الصين العظيم كله 8 مرات! طبعاً ده يورّينا حجم الإدمان اللي احنا أصلاً عارفينه فيبقى طبيعي جداً إنهم يفكروا يعملوا فندق جديد كل حاجة فيه هتبقى ليها علاقة بالنوتيلا.

هوتيلا نوتيلا Hotella Nutella هيكون فندق مؤقت في كاليفورنيا، لمدة يومين بس من 10 لـ12 يناير 2020، وخلال اليومين دول الضيوف هيعيشوا تجربة 5 نجوم مع شيفات محترفين ومشاهير في عالم الطبخ؛ يعملولهم فطار كله أصناف معمولة من النوتيلا ويعلموهم كمان افتكاسات جديدة يعملوها لما يعوزوا يدلّعوا نفسهم بصنف أكل معمول من النوتيلا، كل ده وسط ديكورات وتفاصيل كلها نوتيلا في نوتيلا زي التصميمات اللي في الصور بالظبط.

الفكرة بقى إن الفندق المؤقت ده مش هيكون مفتوح لعامة الشعب وأي حد يجيب برطامنه في ايده وييجي، لأ عاملين مسابقة لمحبي النوتيلا من 13 نوفمبر لـ8 ديسمبر؛ أي حد يقدر يبعتلهم فيديو يشرح فيه إزاي نوتيلا بتأثر في في يومه بالذات لو أكلها على الفطار، وأهم حاجة إن الفيديو ده يكون على موقع من مواقع التواصل الإجتماع فيسبوك أو انستجرام أو تويتر مع هاشتاج #HotellaNutella.

تقدروا تدخلوا على الموقع بتاع هوتيلا نوتيلا عشان تعرفوا تفاصيل أكتر عن المسابقة.

المصدر: Insider